ຫລາຍພາກສ່ວນກ່ຽວຂ້ອງເລັ່ງສືບຕໍ່ສະກັດກັ້ນຄວັນໄຟຢູ່ສະໜາມຂີ້ເຫຍື້ອ ນະຄອນຫລວງພະບາງ ໃຫ້ໝົດໄປໂດຍໄວ

ແຫລ່ງຂ່າວ ແຂວງຫລວງພະບາງ ໃຫ້ຮູ້ວ່າ: ຕໍ່ເຫດການໄຟໄໝ້ຂີ້ເຫຍື້ອ ຢູ່ສະໜາມຂີ້ເຫຍື້ອ ເຂດບ້ານຫລັກແປດ ນະຄອນຫລວງພະບາງ ທີ່ເກີດຂຶ້ນວັນທີ 13 ກຸມພາ 2023, ເຊິ່ງມາຮອດປັດຈຸບັນສາມາດສະກັດກັ້ັນບໍ່ໃຫ້ໄຟລຸກລາມເປັນວົງກວ້າງ ແຕ່ຍັງມີໄຟໄໝ້ເນື້ອທີ່ຂີ້ເຫຍື້ອປະມານ 5 ເຮັກຕາ ເຊິ່ງເກີດຄວັນໄຟປົກຄຸມບໍລິເວນອ້ອມຮອບເຖິງວ່າທຸກພາກສ່ວນກ່ຽວຂ້ອງຈະສຸມໃສ່ດັບໄຟທີ່ໄໝ້ຢ່າງຕໍ່ເນື່ອງ.

ທ່ານ ດາວັນ ສີລິວົງ ຮອງຫົວໜ້າອົງການພັດທະນາ ແລະ ບໍລິຫານຕົວເມືອງ ນະຄອນຫລວງພະບາງ ໃຫ້ສຳພາດໃນວັນທີ 1 ມີນາ 2023 ນີ້ວ່າ: ຜ່ານມາຄະນະຮັບຜິດຊອບໄດ້ເຮັດຂຸມຂີ້ເຫຍື້ອເປັນລັກສະນະອ່າງເກັບ ໂດຍມີຄວາມເລິກຫລາຍແມັດ ແລະ ໄດ້ຖົມຂີ້ເຫຍື້ອເປັນ 3 ຊັ້ນ ຄາດວ່າໄຟອາດຈະໄໝ້ຂີ້ເຫຍື້ອຮອດຊັ້ນທຳອິດ ຈຶ່ງເຮັດໃຫ້ການດັບໄຟພົບຄວາມຫຍຸ້ງຍາກ ແລະ ເຮັດໃຫ້ເກີດມີຄວັນໄຟອອກມາຢ່າງຕໍ່ເນື່ອງ. ພາຍຫລັງເກີດໄຟໄໝ້ຂີ້ເຫຍື້ອດັ່ງກ່າວ ພາກສ່ວນຮັບຜິດຊອບສະໜາມຂີ້ເຫຍື້ອ ໄດ້ສົມທົບກັບເຈົ້າໜ້າທີ່ດັບເພີງ ກອງບັນຊາການປ້ອງກັນຄວາມສະຫງົບແຂວງ ສຸມໃສ່ດັບໄຟທີ່ກຳລັງລຸກໄໝ້ ທັງໄດ້ສ້າງແລວກັນໄຟບໍ່ໃຫ້ແຜ່ລາມເປັນວົງກວ້າງ ໂດຍໄດ້ດຳເນີນຕະຫລອດຄືນ ແຕ່ບໍ່ສາມາດດັບໄຟໄດ້, ມາຮອດປັດຈຸບັນຍັງມີຄວັນໄຟອອກມາຈາກອ່າງເກັບຂີ້ເຫຍື້ອ ເນື່ອງຈາກການດັບໄຟແມ່ນມີຄວາມຫຍຸ້ງຍາກ ຍ້ອນເນື້ອທີ່ຂອງຈຸດເກີດເຫດມີບໍລິເວນກວ້າງ;ການປະຕິບັດຕົວຈິງແມ່ນພົບຄວາມຫຍຸ້ງຍາກຫລາຍ ໂດຍສະເພາະແມ່ນຂາດງົບປະມານຈັດຊື້ນ້ຳມັນເຊື້ອໄຟ ແລະ ອຸປະກອນຈຳເປັນ, ພ້ອມນີ້ ພາຫະນະກົນຈັກທີ່ໃຊ້ຢູ່ພາຍໃນສະໜາມຂີ້ເຫຍື້ອ ມີຄວາມຊຸດໂຊມຕ້ອງໄດ້ສ້ອມແປງເປັນໄລຍະ, ປັດຈຸບັນພາກສ່ວນຮັບຜິດຊອບ ພວມສືບຕໍ່ສີດນ້ຳສະກັດຄວັນທີ່ອອກມາຈາກອ່າງຂີ້ເຫຍື້ອ ແລະ ໄດ້ນຳໃຊ້ດິນຖົມຂີ້ເຫຍື້ອທີ່ເກີດເປັນຄວັນ ໂດຍໄດ້ຮັບການຮ່ວມມືຈາກພາກລັດ ແລະ ພາກທຸລະກິດ ເປັນຕົ້ນ ການສົມທົບອຸປະກອນ ແລະ ພາຫະນະເຂົ້າຊ່ວຍ ຄາດວ່າຈະໃຊ້ເວລາອີກດົນສົມຄວນ.

ພ້ອມດຽວກັນນັ້ນ, ທ່ານ ຄຳຂັນ ຈັນທະວີສຸກ ເຈົ້າແຂວງຫລວງພະບາງ ໄດ້ລົງໄປກວດກາເບິ່ງພື້ນທີ່ຕົວຈິງ ແລະ ໄດ້ມີຄຳເຫັນຊີ້ນຳໃຫ້ພາກສ່ວນກ່ຽວຂ້ອງຂອງແຂວງ ລະດົມບັນດາບໍລິສັດທີ່ມີກົນຈັກເຂົ້າມາຊ່ວຍ, ທັງສະໜອງງົບປະມານເຂົ້າໃນການບໍລິຫານວຽກ ເພື່ອໃຫ້ສາມາດແກ້ໄຂບັນຫາສະພາບໃຫ້ດີຂຶ້ນ. ທັງຊີ້ນຳໃຫ້ອົງການປົກຄອງນະຄອນຫລວງພະບາງ ອອກແຈ້ງການເຕືອນໃຫ້ປະຊາຊົນພ້ອມກັນຮັກສາສຸຂະພາບ ດ້ວຍການໃສ່ຜ້າອັດປາກ-ດັງ ເວລາອອກນອກເຮືອນ.