ຮົງກົງຍົກເລີກຄໍາສັ່ງໃສ່ຜ້າປິດປາກແລ້ວ ຫລັງບັງຄັບໃຊ້ມາເກືອບ 3 ປີ

ຮົງກົງປະກາດຍົກເລີກຄໍາສັ່ງໃສ່ຜ້າປິດປາກຢູ່ສະຖານທີ່ສາທາລະນະ ມີຜົນນັບແຕ່ວັນທີ 1 ມີນາ 2023 ຫລັງຈາກບັງຄັບໃຊ້ມາເຖິງ 959 ວັນ. ຂະນະທີ່ທາງການເລັ່ງເດີນໜ້າເປີດເມືອງກຽມພ້ອມຕ້ອນຮັບນັກເດີນທາງເພື່ອທຸລະກິດ ແລະ ນັກທ່ອງທ່ຽວທີ່ຈະກັບມາທ່ອງທ່ຽວຮົງກົງອີກ.

“ພວກເຮົາກໍາລັງກັບເຂົ້າສູ່ສະພາບປົກກະຕິ” ທ່ານ ຈອນ ລີ ຜູ້ບໍລິຫານສູງສຸດຂອງເຂດປົກຄອງພິເສດຮົງກົງ ກ່າວໃນການຖະແຫລງຂ່າວວັນທີ 28 ກຸມພາ ເຊິ່ງເປັນວັນທີ 959 ນັບແຕ່ທາງການຮົງກົງບັງຄັບໃສ່ຜ້າປິດປາກເປັນຄັ້ງທໍາອິດໃນວັນທີ 15 ກໍລະກົດ 2020 ໂດຍເວລານັ້ນເລີ່ມຈາກການໃສ່ຜ້າປິດປາກໃນລະບົບຂົນສົ່ງສາທາລະນະ ກ່ອນຈະຂະຫຍາຍຄໍາສັ່ງຄວບຄຸມພື້ນທີ່ໃນຮົ່ມ ແລະ ກາງແຈ້ງໃນອີກ 2 ອາທິດຕໍ່ມາ.

ໄລຍະ 2-3 ປີທີ່ໂຄວິດແພ່ລະບາດ ຮົງກົງເປັນໜຶ່ງໃນສະຖານທີ່ທີ່ມີນະໂຍບາຍຄວບຄຸມ ແລະ ປ້ອງກັນເຂັ້ມງວດທີ່ສຸດໃນໂລກ ໂດຍໃນໄລຍະທີ່ໂຄວິດລະບາດໜັກ ທາງການຮົງກົງກໍານົດກັກຕົວຜູ້ສໍາຜັດສ່ຽງສູງໃນຫ້ອງພັກໂຮງແຮມເຖິງ 21 ວັນ ທັງຍັງບໍ່ອະນຸຍາດໃຫ້ຄົນເຂົ້າຢາມ ແລະ ຫ້າມເປີດປ່ອງຢ້ຽມ. ນອກຈາກນີ້ ຂະນະທີ່ປະເທດສ່ວນຫລາຍໃນອາຊີເຊັ່ນ: ສ.ເກົາຫລີ, ຍີ່ປຸ່ນ ແລະ ໄຕ້ຫວັນ ຕ່າງຫລຸດຜ່ອນຄໍາສັ່ງໃສ່ຜ້າປິດປາກທັງໝົດ ຫລື ບາງສ່ວນ, ແຕ່ຮົງກົງພັດຍັງເປັນໜຶ່ງໃນເມືອງໃຫຍ່ຂອງໂລກພຽງບໍ່ເທົ່າໃດເມືອງທີ່ຍັງບັງຄັບໃສ່ຜ້າປິດປາກຢູ່ສະຖານທີ່ສາທາລະນະທຸກແຫ່ງ ໂດຍຜູ້ຝ່າຝືນອາດຖືກໂທດປັບໄໝສູງເຖິງ 1.000 ໂດລາ.

ເຖິງຢ່າງໃດກໍດີ, ໃນໄລຍະບໍ່ເທົ່າໃດເດືອນຜ່ານມາ ຮົງກົງເລີ່ມທະຍອຍຍົກເລີກມາດຕະການຄວບຄຸມການແພ່ລະບາດ ໂດຍສະເພາະການຍົກເລີກຂໍ້ບັງຄັບກັກຕົວຜູ້ໂດຍສານຂາເຂົ້າລະຫວ່າງປະເທດທັງໝົດ ເຊິ່ງການເຄື່ອນໄຫວດັ່ງກ່າວໄດ້ຮັບການຂານຮັບຈາກຊາວຮົງກົງທີ່ຕ້ອງການເດີນທາງ, ສະມາຊິກຄອບຄົວທີ່ຢູ່ໃນຕ່າງປະເທດ ແລະ ທຸລະກິດໃນທ້ອງຖິ່ນທີ່ກໍາລັງປະສົບບັນຫາ.

ທ່ານ ໂລເສິງເໝົາ ລັດຖະມົນຕີສາທາລະນະສຸກຂອງຮົງກົງ ກ່າວໃນການຖະແຫລງຂ່າວຮ່ວມກັບເຈົ້າຄອງເກາະຮົງກົງວ່າ: ການຍົກເລີກຄໍາສັ່ງໃສ່ຜ້າປິດປາກນັ້ນເທົ່າກັບວ່າ: “ຕອນນີ້ເຮົາໄດ້ຍົກເລີກຂໍ້ຈໍາກັດກ່ຽວກັບໂຄວິດທັງໝົດແລ້ວ”.

ອ້າງອີງ:

https://edition.cnn.com/…/hong-kong-mask…/index.html