ຂຸດຄົ້ນ-ນໍາໃຊ້ທ່າແຮງທີ່ບົ່ມຊ້ອນໃຫ້ກາຍເປັນຈຸດຂາຍ ໃນການທ່ອງທ່ຽວ

ໂດຍ: ທິດກໍ່າ

ນັບແຕ່ການແພ່ລະບາດຂອງພະຍາດໂຄວິດ-19 ໄດ້ເບົາບາງລົງ ແລະ ມະຫັບມະຫາຍໄປຈາກປະເທດເຮົາ, ພັກ ແລະ ລັດຖະບານກໍໄດ້ເລີ່ມເປີດປະເທດຄືນໃໝ່ມາແຕ່ທ້າຍເດືອນພຶດສະພາ 2022 ຈົນມາຮອດປັດຈຸບັນ ກໍເຫັນວ່າຂະແໜງການທ່ອງທ່ຽວຂອງບ້ານເຮົາເລີ່ມມີບັນຍາກາດໃໝ່ເປັນໄລຍະໆຕະຫລອດມາ ອັນທີ່ໂດດເດັ່ນທີ່ສຸດໃນຍາມເທດສະການໄດ້ມີນັກທ່ອງທ່ຽວເດີນທາງໄປມາຜ່ານສາຍທາງລົດໄຟຄວາມໄວສູງ ລາວ-ຈີນ ຈົນໄດ້ລຽນຄິວອັ່ງອໍ ແລະ ເພີ່ມທ່ຽວ ເພື່ອສະໝອງກັບຄວາມຮຽກຮ້ອງຕ້ອງການຂອງມວນຊົນ. ນີ້ມັນເປັນສັນຍານເຕືອນວ່າອຸດສາຫະກໍາການທ່ອງທ່ຽວຢູ່ບ້ານເຮົາພວມນັບມື້ຈະເຕີບໃຫຍ່ ແລະ ຂະຫຍາຍຕົວຂຶ້ນເລື້ອຍໆ.

ໃນໄລຍະມໍ່ມານີ້ ຫລາຍເຂດແຂວງໄດ້ຈັດກິດຈະກຳ ເພື່ອສົ່ງເສີມ ແລະ ກະຕຸ້ນການທ່ອງທ່ຽວ ເປັນຕົ້ນແມ່ນ ແຂວງສະຫວັນນະເຂດໄດ້ສໍາເລັດການຈັດງານສະຫວັນພັນເຟສ (Savan fun fest) ເຊິ່ງໄດ້ຈັດຂຶ້ນໃນວັນທີ 24 ຫາ 29 ມັງກອນ 2023. ຕໍ່ມາໃນວັນທີ 13 ຫາ 20 ກຸມພາ 2023 ຜ່ານມານີ້ ແຂວງໄຊຍະບູລີກໍສໍາເລັດການຈັດງານມະຫະກໍາບຸນຊ້າງຢ່າງມີຄວາມໝາຍ ແລະ ຄຶກຄື້ນທີ່ສຸດ.

ໃນວັນທີ 24 ກຸມພາ 2023 ຜ່ານມາ ທິດກໍ່າກໍໄດ້ມີໂອກາດໄປສຳຜັດກັບແຫລ່ງທ່ອງທ່ຽວຖໍ້າກອງລໍ ໄດ້ເຫັນໃບໜ້າໃໝ່ຂອງຖໍ້າ ເຊິ່ງມີການປັບປຸງເສັ້ນທາງຍ່າງຕາມໂຂດຫີນຂຶ້ນລົງຢູ່ໃນຖໍ້າ ໂດຍໄດ້ສ້າງຂັ້ນໄດເຫລັກຢູ່ຫລາຍຈຸດ ເພື່ອອໍານວຍຄວາມສະດວກໃຫ້ນັກທ່ອງທ່ຽວເລາະລຽບຂຶ້ນລົງ. ນອກຈາກນັ້ນ ຍັງໄດ້ຄົ້ນພົບຖໍ້າໃໝ່ທີ່ໄດ້ເຊື່ອມຈອດກັນ ເຊິ່ງຜ່ານມາຍັງບໍ່ທັນມີການສໍາຫລວດ ແລະ ຄົ້ນພົບມາກ່ອນ. ນີ້ກໍສະແດງໃຫ້ເຫັນວ່າ: ໃນແຕ່ລະທ້ອງຖິ່ນເຂດແຂວງຕ່າງກໍໄດ້ຊອກທຸກວິທີເພື່ອຂຸດຄົ້ນທ່າແຮງທີ່ບົ່ມຊ້ອນໃນທ້ອງຖິ່ນຂອງຕົນ ເພື່ອເປັນຈຸດຂາຍການທ່ອງທ່ຽວໃນຍຸກເສດຖະກິດທີ່ພວມເປັນເງິນເປັນຄໍາ.

ປະເທດລາວເປັນປະເທດທີ່ອຸດົມສົມບູນໄປດ້ວຍທໍາມະຊາດ ມີພູຜາປ່າໄມ້, ແມ່ນໍ້າລໍາເຊທີ່ຫລາກຫລາຍໃນທົ່ວປະເທດ. ນອກນັ້ນ ຍັງມີປະເພນີ, ວັດທະນະທໍາ, ປູສະນີຍະສະຖານ, ວິຖີຊີວິດທີ່ເປັນເອກະລັກສະເພາະ ສາມາດດຶງດູດນັກທ່ອງທ່ຽວ, ແຂກຕ່າງດ້າວທ້າວຕ່າງແດນເຂົ້າມາທ່ອງທ່ຽວລາວ ເພື່ອສໍາຜັດກັບບັນຍາກາດຕົວຈິງ ທັງສຶກສາຄົ້ນຄວ້າເຖິງດິນແດນອະລິຍະທໍາທີ່ມີມາແຕ່ຍຸກລ້ານຊ້າງ.

ທິດກໍ່າເຫັນວ່າໃນຍຸກເຊື່ອມໂຍງການທ່ອງທ່ຽວເປັນອຸດສາຫະກໍາທີ່ນໍາເອົາເມັດເງິນຢ່າງມະຫາສານມາໃຫ້ປະເທດຊາດ ແລະ ປະຊາຊົນຮັ່ງມີ ຂຶ້ນໄດ້ຢ່າງແທ້ຈິງ. ຖ້າການນໍາເຂດແຂວງໃດຫາກຍັງບໍ່ທັນຕື່ນ, ບໍ່ຮູ້ຊອກ, ຮູ້ຫາ ແລະ ບໍ່ສາມາດຂຸດຄົ້ນຊັບພະຍາກອນທີ່ມີໃນທ້ອງຖິ່ນ ເພື່ອມາຮັບໃຊ້ໃນການທ່ອງທ່ຽວ ກໍຈະຖືວ່າເຂດແຂວງນັ້ນຖົງຫ່ຽວໄປຕາມການເວລາ.