ຕວກກີເລັ່ງສອບສວນສາເຫດອາຄານຖະຫລົ່ມຈາກແຜ່ນດິນໄຫວ ຖືກຈັບແລ້ວ 184 ຄົນ

ທ່ານ ເບກີ ບອດເດັດ (Bekir Bozdag) ລັດຖະມົນຕີວ່າການກະຊວງຍຸຕິທໍາຕວກກີ ເປີດເຜີຍໃນວັນທີ 25 ກຸມພາວ່າ: ທາງການຕວກກີໄດ້ສອບສວນຜູ້ຖືກສົງໄສ 600 ກວ່າຄົນທີ່ຄາດວ່າມີສ່ວນຮັບຜິດຊອບຕໍ່ເຫດອາຄານຫລາຍແຫ່ງພັງຖະຫລົ່ມຈາກແຜ່ນດິນໄຫວຄັ້ງໃຫຍ່ໃນວັນທີ 6 ກຸມພາຜ່ານມາ ໂດຍປັດຈຸບັນມີຜູ້ຖືກຈັບແລ້ວ 184 ຄົນ ທ່າມກາງຄວາມຄຽດແຄ້ນຂອງປະຊາຊົນທີ່ເບິ່ງວ່າການສ້າງອາຄານເຫລົ່ານີ້ມີການທຸຈະລິດເກີດຂຶ້ນ ຈົນເຮັດໃຫ້ເກີດເລື່ອງເສົ້າຕາມມາ.

ສໍາລັບຈໍານວນຜູ້ເສຍຊີວິດຈາກແຜ່ນດິນໄຫວຫລ້າສຸດມີ 44.128 ຄົນໃນຕວກກີ ເຊິ່ງຖ້າລວມກັບຈໍານວນຜູ້ເສຍຊີວິດໃນປະເທດໃກ້ຄຽງຄືຊີເຣຍແລ້ວຈະມີ 50.000 ກວ່າຄົນ ໂດຍສະເພາະຢູ່ຕວກກີປະເທດດຽວນັ້ນ ມີອາຄານ 160.000 ກວ່າຫລັງໄດ້ຮັບຄວາມເສຍຫາຍ ເຊິ່ງຈໍານວນນີ້ເປັນອາພາດເມັນຫລາຍແຫ່ງທີ່ພັງຖະຫລົ່ມ ຫລື ເສຍຫາຍຢ່າງໜັກຈົນບໍ່ສາມາດຢູ່ອາໄສໄດ້.

ທ່ານ ບອດເດັດ ກ່າວວ່າ: ຜູ້ທີ່ຖືກຈັບໄປແລ້ວ ໄດ້ແກ່ ຜູ້ຮັບເໝົາ 79 ຄົນ, ຜູ້ຮັບຜິດຊອບທາງກົດໝາຍດ້ານການສ້າງອາຄານ 74 ຄົນ, ເຈົ້າຂອງອາຄານ 13 ຄົນ ແລະ ຜູ້ທີ່ດັດແປງອາຄານ 18 ຄົນ.

ຫລັງເກີດແຜ່ນດິນໄຫວຂຶ້ນ ຊາວຕວກກີຈໍານວນບໍ່ໜ້ອຍໄດ້ອອກມາສະແດງຄວາມບໍ່ພໍໃຈ ເນື່ອງຈາກພວກເຂົາເບິ່ງວ່າການສ້າງອາຄານຫລາຍແຫ່ງໃນປະເທດມີການທຸຈະລິດ ລວມທັງການພັດທະນາເມືອງຂອງພາກລັດມີຂໍ້ບົກພ່ອງ. ຂະນະທີ່ປະທານາທິບໍດີ ເຣເຊບ ຕອຍຢິບ ເອິໂດກັນ ຜູ້ນໍາຕວກກີ ກ່າວວ່າ: ທ່ານຈະຮັບຜິດຊອບຕໍ່ຄວາມເສຍຫາຍທີ່ເກີດຂຶ້ນ.

ເຖິງວ່າເວລາຈະຜ່ານມາ 3 ອາທິດແລ້ວ, ແຕ່ຈໍານວນຜູ້ເສຍຊີວິດໃນຕວກກີຍັງບໍ່ຢຸດ ໂດຍລັດຖະບານຕວກກີບໍ່ໄດ້ມີການຖະແຫລງວ່າຍັງມີຮ່າງທີ່ຕົກຄ້າງຢູ່ໃຕ້ຊາກອາການຫລາຍໜ້ອຍຊໍ່າໃດ. ຂະນະທີ່ທີມກູ້ໄພເປີດເຜີຍຕໍ່ສື່ມວນຊົນວ່າ: ຍັງພົບຮ່າງຜູ້ເສຍຊີວິດຢູ່ແຕ່ລະວັນ. ປັດຈຸບັນ ປະຊາຊົນເກືອບ 2 ລ້ານຄົນໃນປະເທດຍັງບໍ່ມີບ່ອນຢູ່ອາໄສ ຕ້ອງອາໄສເຕັ້ນ, ຕູ້ຄອນເທັນເນີ ຫລື ທີ່ພັກອາໄສອື່ນໆຂອງລັດໃນການພັກອາໄສຊົ່ວຄາວ.

ອ້າງອີງ:

http://www.reuters.com/…/turkey-widens-probe-into…/