ສະເທືອນຂວັນ! ນາງແບບສາວ ຖືກຄອບຄົວຂອງອະດີດສາມີ ຄາຕະກຳຢ່າງ ໂຫດຮ້າຍ

ສຳນັກຂ່າວສົດໄທລາຍງານວ່າ: ສື່ຮ່ອງກົງລາຍງານຂ່າວຄາຕະກຳສະເທືອນຂວັນທີ່ກຳລັງເປັນກະແສຮືຮາທົ່ວຮ່ອງກົງ ວ່າ ນາງ ແອັບບີ້ ຊອຍ ນາງແບບຊື່ດັງ ອາຍຸ 28 ປີ ຖືກຄາຕະກຳ ຫລັງຈາກທີ່ຫາຍຕົວໄປຕັ້ງແຕ່ວັນທີ 21 ກຸມພາ 2023.ເຈົ້າໜ້າທີ່ໄດ້ສືບສວນ-ສອບສວນ ຈົນພົບສົບຂອງນາງຢູ່ໃນຊຸມຊົນຫລຸງເໝີ່ຍ ໃນວັນສຸກ ທີ 24 ກຸມພາ 2023 ນີ້, ແຕ່ຮ່າງກາຍບໍ່ສົມປະກອບ ຍ້ອນພົບຂາສອງເບື້ອງຢູ່ໃນຕູ້ເຢັນ ພ້ອມບັດປະຈຳຕົວ, ບັດເຄດິດ, ແລ້ວພົບເນື້ອເຫຍື່ອຂອງຄົນຢູ່ໃນໝໍ້ແກງ ແລະ ສິ່ງຂອງອື່ນໆອີກຈຳນວນໜຶ່ງ. ນອກນັ້ນ, ຍັງພົບເຄື່ອງມືທີ່ໃຊ້ແຍກຊິ້ນສ່ວນຂອງຄົນ ເປັນຕົ້ນ ເລື່ອຍໄຟຟ້າ, ເສື້ອກັນຝົນແບບຍາວ, ຖົງມື, ຜ້າປິດປາກ-ດັງ ແລະ ເຄື່ອງບົດຊີ້ນ. ເຖິງຢ່າງໃດກໍຕາມເຈົ້າໜ້າທີ່ບໍ່ສາມາດບອກໄດ້ວ່າ ຫົວ, ລຳຕົວ, ແລະ ມື ຢູ່ໃສ.
ນອກນັ້ນເຈົ້າໜ້າທີ່ຍັງບອກອີກວ່າ: ຜູ້ເສຍຊີວິດມີຂໍ້ພິພາດທາງການເງິນກັບອະດີດສາມີກ່ອນເກີດເຫດໂສກນາດຕະກຳນີ້ຂຶ້ນ, ດັ່ງນັ້ນເຈົ້າໜ້າທີ່ຈຶ່ງເລັ່ງນຳຈັບຕົວອະດີດສາມີໃຫ້ໄວທີ່ສຸດ ພ້ອມທັງຈັບກຸມພໍ່ແມ່ ແລະ ນ້ອງຊາຍໄວ້ກ່ອນ.
ນາງ ແອັບບີ້ ຊອຍ ເປັນນາງແບບທີ່ມີຊື່ສຽງໂດ່ງດັງ ແລະ ມີຜູ້ຕິດຕາມໃນອິນສະຕຣາແກມ ຫລາຍກວ່າ 80.000 ຄົນ ພ້ອມທັງເປັນເຈົ້າຂອງອະສັງຫາລິມະຊັບຫລາຍແຫ່ງ, ເປັນຜູ້ບໍລິຫານບໍລິສັດ 4 ແຫ່ງ ລວມທັງເຮັດທຸລະກິດໃນຈີນອີກດ້ວຍ.