ການເຮັດທົດລອງກຸ້ມຕົນເອງດ້ານງົບປະມານຢູ່ 3 ໂຮງໝໍ ຍັງພົບບັນຫາຫຍຸ້ງຍາກ

ວັນທີ 22 ກຸມພາ ຜ່ານມາ ກົມງົບປະມານແຫ່ງລັດ ກະຊວງການເງິນ ນໍາໂດຍ ທ່ານ ພູວົງ ກິດຕະວົງ ຫົວໜ້າກົມງົບປະມານແຫ່ງລັດ, ທັງເປັນຫົວໜ້າຄະນະຮັບຜິດຊອບຄຸ້ມຄອງ, ແນະນຳ, ຕິດຕາມ, ຊຸກຍູ້ການຈັດຕັ້ງປະຕິບັດຫົວໜ່ວຍວິຊາການກຸ້ມຕົນເອງ ທາງດ້ານງົບປະມານ ຂອງໂຮງໝໍ 3 ແຫ່ງ ຄື: ໂຮງໝໍມະໂຫສົດ, ໂຮງໝໍມິດຕະພາບ ແລະ ໂຮງໝໍເສດຖາທິຣາຊ.

ໂຮງໝໍ 3 ແຫ່ງ ໄດ້ຮັບການມອບສິດຈາກລັດຖະມົນຕີກະຊວງສາທາລະນະສຸກສະບັບເລກທີ 763/ສທ, ລົງວັນທີ 28 ມິຖຸນາ 2022, ລວມເຖິງການທີ່ຈະຄົ້ນຄ້ວາຍົກລະດັບການຫັນກຸ້ມຕົນເອງຂຶ້ນຕື່ມ ໂດຍຜູ້ຕາງໜ້າຈາກກົມການເງິນ ກະຊວງສາທາລະນະສຸກ, ຄະນະອຳ ນວຍການທັງ 3 ໂຮງໝໍ ໄດ້ລາຍງານ, ສະເໜີສະພາບລວມ, ສະເໜີຂໍ້ສະດວກ, ຂໍ້ຫຍຸ້ງຍາກກ່ຽວກັບງານດັ່ງກ່າວ ຊຶ່ງເຫັນໄດ້ຄວາມສະດວກວ່ອງໄວ, ຮັບປະກັນຜົນສຳເລັດວຽກງານຂອງໂຮງໝໍໄດ້ເປັນຢ່າງດີ, ຄຽງຄູ່ກັບຈຸດດີນັ້ນ, ຍັງມີບາງບັນຫາທີ່ຍັງຈະໄດ້ສືບຕໍ່ຫາລືແກ້ໄຂ ຕື່ມອີກ.

ທ່ານ ພູວົງ ກິດຕະວົງ ຊີ້ນຳຕໍ່ກັບການສະເໜີຂອງ 3 ໂຮງໝໍ ເປັນຕົ້ນ ແມ່ນວຽກງານການຈັດຊື້-ຈັດຈ້າງ ຈະໄດ້ຄົ້ນຄວ້າກົນໄກໃນຕໍ່ໜ້າ ເພື່ອໃຫ້ສອດຄ່ອງໃນການປະຕິ ບັດຕົວຈິງ, ການສະເໜີເປັນຫົວໜ່ວຍຂັ້ນ 1 ແລະ ເງິນນະໂຍບາຍ ຊຶ່ງຕິດພັນກັບກະຊວງພາຍໃນ, ຈຶ່ງສະເໜີໃຫ້ກະຊວງພາຍໃນ ພິຈາລະນາຄົ້ນຄວ້າຄວາມເປັນໄປໄດ້ ໃນການຫັນເປັນຫົວໜ່ວຍຂັ້ນ 1, ກ່ຽວກັບການສະເໜີປັບອັດຕາແຮງຈູງໃຈ, ການກຳນົດລາຄາກາງ, ອັດຕາຄ່າປິ່ນປົວ ຫລື ເພີ່ມທາງເລືອກໃນການບໍລິການໃຫ້ມີຫລາຍຮູບແບບ ຫລາຍທາງເລືອກ ແລະ ບັນດານິຕິກຳທີ່ຕິດພັນກັບພາກສ່ວນຕ່າງໆ ແມ່ນສະເໜີໃຫ້ຄົ້ນຄວ້າເປັນເອກະພາບກັນ ແລ້ວລາຍງານຄະນະນຳກະຊວງຕົນ ເພື່ອຂໍທິດຊີ້ນຳໃນການຈັດຕັ້ງປະຕິບັດ.