ການສະກັດກັ້ນຄວັນໄຟ ຈາກເຫດການໄຟໄໝ້ຂີ້ເຫຍື້ອ ຢູ່ສະໜາມຂີ້ເຫຍື້ອ ນະຄອນ ຫລວງພະບາງ ອາດໃຊ້ເວລາດົນ ເພາະຂາດງົບປະມານຫລາຍຢ່າງ

ນັບແຕ່ຄືນຂອງວັນທີ 13 ກຸມພາ 2023 ຜ່ານມາ ໄດ້ເກີດມີໄຟໄໝ້ຂີ້ເຫຍື້ອ ຢູ່ສະໜາມຂີ້ເຫຍື້ອ ເຂດບ້ານຫລັກແປດ ນະຄອນ ຫລວງພະບາງ ເຮັດໃຫ້ເກີດມີຄວັນໄຟປົກຄຸມບໍລິເວນອ້ອມຮອບຈົນເຖິງປັດຈຸບັນ ເຖິງວ່າທຸກພາກສ່ວນທີ່ກ່ຽວຂ້ອງ ຈະສຸມໃສ່ດັບໄຟທີ່ໄໝ້ຢ່າງຕໍ່ເນື່ອງ.

ທ່ານ ດາວັນ ສີລິວົງ ຮອງຫົວໜ້າອົງການພັດທະນາ ແລະ ບໍລິຫານຕົວເມືອງ ນະຄອນ ຫລວງພະບາງ ໄດ້ໃຫ້ສຳພາດວັນທີ 23 ກຸມພາ 2023 ນີ້ວ່າ: ພາຍຫລັງເກີດໄຟໄໝ້ຂີ້ເຫຍື້ອ ໃນຕອນກາງຄືນຂອງວັນທີ 13 ກຸມພາ ຜ່ານມາພາກສ່ວນຮັບຜິດຊອບສະໜາມຂີ້ເຫຍື້ອ ໄດ້ສົມທົບກັບ ເຈົ້າໜ້າທີ່ດັບເພີງ ຂອງກອງບັນຊາການປ້ອງກັນຄວາມສະຫງົບແຂວງ ສຸມໃສ່ດັບໄຟ ທີ່ກຳລັງລຸກໄໝ້ ທັງໄດ້ສ້າງແລວກັນໄຟບໍ່ໃຫ້ແຜ່ລາມເປັນວົງກວ້າງ ໂດຍໄດ້ດຳເນີນຕະຫລອດຄືນແຕ່ບໍ່ສາມາດດັບໄຟໃຫ້ມອດໄດ້ ມາຮອດປັດຈຸບັນ ຍັງມີຄວັນໄຟອອກມາຈາກອ່າງທີ່ເກັບຂີ້ເຫຍື້ອ ເນື່ອງຈາກການດັບໄຟແມ່ນມີຄວາມຫຍຸ້ງຍາກ ຍ້ອນເນື້ອທີ່ຂອງຈຸດເກີດເຫດມີບໍລິເວນກວ້າງ ຜ່ານມາຄະນະຮັບຜິດຊອບໄດ້ເຮັດເປັນລັກສະນະອ່າງເກັບ ໂດຍມີຄວາມເລິກຫລາຍແມັດ ແລະ ໄດ້ຖົມຂີ້ເຫຍື້ອເປັນ 3 ຊັ້ນ ຄາດວ່າໄຟອາດຈະໄໝ້ຂີ້ເຫຍື້ອຮອດຊັ້ນທຳອິດ ຈື່ງເຮັດໃຫ້ການດັບໄຟພົບຄວາມຫຍຸ້ງຍາກ ແລະ ເຮັດໃຫ້ເກີດມີຄວັນໄຟອອກມາຢ່າງຕໍ່ເນື່ອງ ສ່ວນສາເຫດຂອງການເກີດໄຟໄໝ້ ອາດຈະເກີດຈາກການຂາດສະຕິ ຂອງຜູ້ທີ່ເຂົ້າໄປໄຈ້ເອົາສີ່ງເສດເຫລືອຈາກຂີ້ເຫຍື້ອ ໂດຍເຮັດໃຫ້ເກີດໝັດໄຟໃສ່ຂີ້ເຫຍື້ອທີ່ເປັນອາຍແກ໊ສ ແລ້ວເກີດມີໄຟລຸກລາມ.

ນອກນັ້ນ, ທ່ານຍັງໃຫ້ຮູ້ຕື່ມວ່າ: ການປະຕິບັດຕົວຈິງແມ່ນພົບຄວາມຫຍຸ້ງຍາກຫລາຍ ໂດຍສະເພາະແມ່ນຂາດງົບປະມານຈັດຊື້ນ້ຳມັນເຊື້ອໄຟ ແລະ ອຸປະກອນຈຳເປັນ, ພ້ອມນີ້ ພາຫະນະກົນຈັກທີ່ໃຊ້ຢູ່ພາຍໃນສະໜາມຂີ້ເຫຍື້ອ ມີຄວາມຊຸດໂຊມຕ້ອງໄດ້ສ້ອມແປງເປັນໄລຍະ, ປັດຈຸບັນພາກສ່ວນຮັບຜິດຊອບພວມສືບຕໍ່ໃນການສີດນ້້ຳສະກັດຄັວນ ທີ່ອອກມາຈາກອ່າງຂີ້ເຫຍື້ອ ໂດຍໄດ້ຮັບການຮ່ວມມືຈາກພາກລັດ ແລະ ພາກທຸລະກິດ ເປັນຕົ້ນ ການສົມທົບອຸປະກອນ ແລະ ພາຫະນະເຂົ້າຊ່ວຍ ຄາດວ່າຈະໃຊ້ເວລາອີກດົນສົມຄວນ, ສຳລັບແຜນການໃນຕໍ່ໜ້າ ຈະສຸມໃສ່ໃນການສ້າງແລວກັນໄຟໃຫ້ເປັນເສັ້ນທາງອ້ອມຮອບ ເພື່ອໃຫ້ລົດນ້ຳເຂົ້າໄປສີດນ້ຳສະກັດໄດ້ງ່າຍ ພ້ອມທັງຈະລະດົມທືນເພື່ອຊື້ດີນຖົມໃສ່ຈຸດທີ່ເກີດມີຄວັນໄຟ ເພື່ອສະກັດກັ້ນບໍ່ໃຫ້ເກີດຄວັນໄຟຂຶ້ນອີກ.