ເຈົ້າແຂວງສະຫວັນນະເຂດ ເນັ້ນໃຫ້ວຽກງານການທ່ອງທ່ຽວແຂວງເອົາໃຈໃສ່ເພີ່ມຄວາມຫລາກຫລາຍ ເພື່ອສ້າງຖານເສດຖະກິດໝັ້ນຄົງ

ວັນທີ 21 ກຸມພາ 2023 ນີ້, ທ່ານ ບຸນ ໂຈມ ອຸບົນປະເສີດ ເຈົ້າແຂວງສະຫວັນນະເຂດ ແລະ ທ່ານ ປະສົງສິນ ຈະເລີນສຸກ ເຈົ້ານະຄອນ ໄກສອນພົມວິຫານ ພ້ອມດ້ວຍຄະນະພະແນກການ, ກົມກອງກ່ຽວຂ້ອງຂອງແຂວງ ໄດ້ລົງຊຸກຍູ້ ແລະ ຕິດຕາມເບິ່ງສະພາບການທ່ອງທ່ຽວພາຍໃນເທສະບານນະຄອນໄກສອນ ພົມວິຫານ.

ໂອກາດລົງເຄື່ອນໄຫວວຽກງານດັ່ງກ່າວ, ທ່ານຈົ້າແຂວງໄດ້ເຂົ້າຢ້ຽມຊົມຫໍພິພິທະພັນໄດໂນເສົາແຂວງ, ຫໍພິພິທະພັນແຂວງ, ແຫລ່ງທ່ອງທ່ຽວເຂດຕົວເມືອງເກົ່າ ແລະ ອື່ນໆ. ພ້ອມນີ້, ທ່ານຈົ້າແຂວງ ກໍໄດ້ໃຫ້ທິດຊີ້ນໍາຕໍ່ບັນດາພະແນກການ ແລະ ຂະແໜງການທີ່ກ່ຽວຂ້ອງຈົ່ງເອົາໃຈໃສ່ໃນການສ້າງ ແລະ ຂະຫຍາຍຮູບແບບແຫລ່ງທ່ອງທ່ຽວໃຫ້ມີຄວາມຫລາກຫລາຍ ເພື່ອສ້າງໃຫ້ເປັນຖານເສດຖະກິດອັນໝັ້ນຄົງ ແລະ ໜັກແໜ້ນຂອງແຂວງສະຫວັນນະເຂດ; ຕ້ອງສຸມໃສ່ທ່າແຮງການທ່ອງທ່ຽວທີ່ມີຢູ່ແລ້ວ ໂດຍສະເພາະແມ່ນອາຄານເກົ່າສະໄໝຝຣັ່ງ, ຈັດສັນເຂດທ່ອງທ່ຽວກິນດື່ມໃຫ້ມີຄວາມຈະແຈ້ງຊັດເຈນຂຶ້ນຕື່ມ, ເນື່ອງຈາກວ່າມີບາງດ້ານທີ່ຕ້ອງໄດ້ປັບປຸງແກ້ໄຂເປັນຕົ້ນແມ່ນ ມີບາງອາຄານເກົ່າທີ່ມີການຈັດວາງສິ່ງຂອງທີ່ບໍ່ເໝາະສົມ, ການຈັດເກັບວັດຖຸບູຮານ, ການສ້າງ ວັດຖຸຈໍາລອງ, ການປະດັບປະດາແຫລ່ງທ່ອງທ່ຽວ.

ດັ່ງນັ້ນ, ຈຶ່ງຮຽກຮ້ອງມາຍັງບັນດານັກທຸລະກິດໜຸ່ມກໍຄືອົງການຈັດຕັ້ງທີ່ກ່ຽວຂ້ອງຈົ່ງຊ່ວຍກັນຂຸ້ນຂ້ຽວປັບປຸງແກ້ໄຂຈຸດທີ່ຍັງບົກຜ່ອງ ພ້ອມສົ່ງເສີມສິ່ງທີ່ມີຢູ່ແລ້ວໃຫ້ເປັນແຫລ່ງດຶງດູດນັກທ່ອງທ່ຽວຈາກພາຍໃນ ແລະ ຕ່າງປະເທດ ເພື່ອໃຫ້ເຂົ້າມາທ່ຽວພາຍໃນນະຄອນໄກສອນພົມວິຫານ ກໍຄືແຂວງສະຫວັນນະເຂດໃຫ້ນັບມື້ເພີ່ມຂຶ້ນ.