ສາມາດຂຸດຄົ້ນສິ່ງເສດເຫລືອທະຫານອາເມລິກາຫາຍສາບສູນໃນປາງສົງຄາມຢູ່ລາວໄດ້ແລ້ວ 288 ຄົນ ຈາກທັງໝົດ 573 ຄົນ
ທ່ານ ບຸນເຫຼືອ ພັນດານຸວົງ, ຮອງລັດຖະມົນຕີ ກະຊວງການຕ່າງປະເທດ ລາຍງານ ເນື່ອງໃນ ໂອກາດ ພິທີມອບ-ຮັບສິ່ງເສດເຫຼືອຂອງທະຫານອາເມລິກາ ທີ່ຫາຍສາບສູນໃນປາງສົງຄາມຢູ່ລາວ ວັນທີ ວັນທີ 20 ກຸມພາ 2023 ນີ້ວ່າ: ການມອບຮັບຄັ້ງນີ້ ເປັນການທອບຮັບທີ່ໄດ້ຄົ້ນພົບຈາກການປະຕິບັດງານຮ່ວມພາກສະໜາມຂອງຄະນະວິຊາການ ລາວ-ອາເມລິກາ ໃນການສໍາຫຼວດ ແລະ ຂຸດຄົ້ນ ເພື່ອຊອກຫາຮ່ອງຮອຍ ແລະ ສິ່ງເສດເຫຼືອຂອງທະຫານອາເມລິກາ ທີ່ຫາຍສາບສູນໃນປາງສົງຄາມຢູ່ລາວ ຄັ້ງທີ 2 ປະຈໍາສົກປີ 2022-2023 ຢູ່ເຂດເມືອງຄໍາ ແລະ ເມືອງໜອງແຮດ, ແຂວງຊຽງຂວາງ ແລະ ເຂດເມືອງຫ້ຽມ, ແຂວງຫົວພັນ
ຜ່ານການປະຕິບັດງານຮ່ວມສອງຝ່າຍ ລາວ-ອາເມລິກາ, ມາເຖິງປັດຈຸບັນ ສາມາດຄົ້ນພົບສິ່ງເສດເຫຼືອຂອງທະຫານອາເມລິກາ ທີ່ໄດ້ຢັ້ງຢືນ ແລະ ສົ່ງມອບໃຫ້ຝ່າຍອາເມລິກາແລ້ວ ຈຳນວນ 288 ຄົນ ໃນຈໍານວນຜູ້ຫາຍສາບສູນທັງໝົດ 573 ຄົນ ຫຼື ຫຼາຍກວ່າ 50% ແລະ ຍັງອີກ 285 ຄົນ ທີ່ຈໍາເປັນຈະຕ້ອງໄດ້ສືບຕໍ່ມີການສໍາຫຼວດ ແລະ ຂຸດຄົ້ນຕໍ່ໄປ.
