ສ້າງຄວາມເຂັ້ມແຂງພັດທະນາການທ່ອງທ່ຽວເຊື່ອມໂຍງບັນດາແຂວງພາກໃຕ້ ເຂດພູພຽງບໍລິເວນ ແກ້ໄຂຄວາມທຸກຍາກຂອງປະຊາຊົນ

ແຂວງເຊກອງ ຈັດກອງປະຊຸມສ້າງຄວາມເຂັ້ມແຂງພັດທະນາການທ່ອງທ່ຽວແຂວງເຊກອງ ເຊື່ອມໂຍງບັນດາແຂວງພາກໃຕ້ ເຂດພູພຽງບໍລິເວນ ຢູ່ເມືອງທ່າແຕງ ແຂວງເຊກອງ ເພື່ອຊຸກຍູ້ໃຫ້ວຽກງານການທ່ອງທ່ຽວຢູ່ 4 ແຂວງພາກໃຕ້ຂອງລາວຄື: ແຂວງເຊກອງ, ຈຳປາສັກ, ສາລະວັນ ແລະ ອັດຕະປື ມີການເຊື່ອມໂຍງກັນ ແລະ ຊ່ວຍເຫລືອຊຸກຍູ້ເຊິ່ງກັນ ແລະ ກັນ, ໂດຍການເຂົ້າຮ່ວມຂອງ ທ່ານ ນາງ ສວນສະຫວັນ ວິຍະເກດ ລັດຖະມົນຕີກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ (ຖວທ), ທ່ານ ເຫລັກໄຫລ ສິວິໄລ ເຈົ້າແຂວງເຊກອງ.

ທ່ານ ເຈົ້າແຂວງເຊກອງ ໃຫ້ຮູ້ວ່າ: ເຂດພູພຽງບໍລະເວນແມ່ນເຂດທີ່ມີຄວາມອຸດົມສົມບູນ, ເຊິ່ງກວມເອົາ 3 ເມືອງ ຂອງ 3 ແຂວງ, ມີອາກາດຊຸມເຢັນເປັນແຫລ່ງທ່ອງທ່ຽວທາງທໍາມະຊາດ ຕິດພັນກັບການທ່ອງທ່ຽວກະສິກໍາທີ່ອຸດົມສົມບູນ, ປະຊາຊົນບັນດາເຜົ່າມີວັດທະນະທໍາຮີດຄອງປະເພນີ ແລະ ວີຖີການດໍາລົງຊີວິດ ທີ່ມີຄວາມເປັນເອກະລັກສະເພາະທີ່ໂດດເດັ່ນຫລາກຫລາຍ, ມີຊາຍແດນຕິດຈອດກັບ ປະເທດໄທ, ຫວຽດນາມ ແລະ ເຊື່ອມຕໍ່ກັບ 3 ແຂວງທີ່ມີຊາຍແດນຄື: ອັດຕະປື, ຈໍາປາສັກ ແລະ ແຂວງສາລະວັນ ເຊິ່ງເປັນຕະຫລາດທ່ອງທ່ຽວໃຫຍ່ໃນພາກພື້ນ, ມີດ່ານສາກົນຈໍານວນ 5 ດ່ານ (ດ່ານລະໄລ ແຂວງສາລະວັນ; ພູເກືອ-ເບີອີ ແຂວງອັດຕະປື; ດ່ານໜອງນົກຂຽນ, ວັງເຕົາ-ຊ່ອງເມັກ ແຂວງຈໍາປາສັກ ແລະ ດ່ານສາກົນດາກຕະອອກ ແຂວງເຊກອງ) ທີ່ເປັນປະຕູທາງເຂົ້າຂອງນັກທ່ອງທ່ຽວຈາກປະເທດໃກ້ຄຽງ ແລະ ຈາກປະເທດທີ່ສາມ. ຍ້ອນເຫັນໄດ້ທ່າແຮງດັ່ງກ່າວ, ຈຶ່ງໄດ້ຮ່ວມກັນສ້າງແຜນພັດທະນາໃນເຂດພູພຽງບໍລະເວນ ໂດຍສຸມໃສ່ພັດທະນາ ແລະ ສົ່ງເສີມການທ່ອງທ່ຽວຮ່ວມກັນ ສໍາລັບປີ 2020-2030 ເພື່ອເປັນການຍູ້ແຮງການພັດທະນາຂອງຂະແໜງການທ່ອງທ່ຽວ ເພື່ອປິ່ນອ້ອມໃຫ້ພັດທະນາດ້ານອື່ນໆໄປພ້ອມໆກັນ ແນໃສ່ປະກອບ ສ່ວນເຂົ້າໃນການພັດທະນາເສດຖະກິດ-ສັງຄົມ ຂອງບັນດາແຂວງພາກໃຕ້ ກໍຄື ແຂວງເຊກອງ ທັງປະກອບສ່ວນແກ້ໄຂຄວາມທຸກຍາກຂອງປະຊາຊົນບັນດາເຜົ່າໃຫ້ນັບມື້ນັບຫລາຍຂຶ້ນ.

ໂອກາດນີ້, ທ່ານ ລັດຖະມົນຕີ ຖວທ ກ່າວວ່າ: ວຽກງານການທ່ອງທ່ຽວ ກາຍເປັນຫົວໃຈສໍາຄັນໃນການຊ່ວຍປະກອບສ່ວນເຂົ້າໃນການຟື້ນຟູ ເສດຖະກິດ-ສັງຄົມ ຂອງແຕ່ລະປະເທດ ແລະ ການທ່ອງທ່ຽວຍັງຊ່ວຍຂັບເຄື່ອນຕ່ອງໂສ້ວິສາຫະກິດຂະໜາດນ້ອຍ ແລະ ຂະໜາດກາງໄປໃນຕົວ. ສະເພາະຢູ່ ສປປ ລາວ ໂດຍພາຍໃຕ້ນະໂຍບາຍການສົ່ງເສີມການທ່ອງທ່ຽວພາຍໃນ “ລາວທ່ຽວລາວ” ແລະ ນະໂຍບາຍການເປີດປະເທດ ໃນປີ 2022 ມີນັກທ່ອງທ່ຽວພາຍໃນ ຈຳນວນທັງໝົດ 1.462.324 ເທື່ອຄົນ, ສາມາດສ້າງລາຍຮັບຈາກນັກທ່ອງທ່ຽວພາຍໃນ ໄດ້ຫລາຍກວ່າ 165 ລ້ານໂດລາ (165.169.496 ໂດລາ).