ພໍ່ ເມສຊີ່ ຢືນຢັນວ່າລູກຊາຍຈະບໍ່ກັບ ໄປຫລິ້ນໃຫ້ ບາເຊໂລນາ ອີກແນ່ນອນ ແລະ ບໍ່ເຄີຍມີຂໍ້ສະເໜີຈາກທີມເກົ່າເລີຍ

ຮໍເກ້ ເມສຊີ່ ພໍ່ ແລະ ຕົວແທນຂອງ ລີໂອເນວ ເມສຊີ່ ກອງຫນ້າ ປາຣີ ແຊງ-ແຊກແມັງ ສະໂມສອນມະຫາເສດຖີໃນລີກ 1 ຝຣັ່ງ ກ່າວວ່າ ລູກຊາຍຂອງລາວຈະບໍ່ຍ້າຍກັບໄປຢູ່ ບາເຊໂລນາ ຢ່າງແນ່ນອນ.

ອະນາຄົດຂອງ ເມສຊີ່ ເຕັມໄປດ້ວຍຄວາມບໍ່ແນ່ນອນຍ້ອນວ່າລາວເຫລືອສັນຍາພຽງຈົບລະດູການນີ້ເທົ່ານັ້ນ ຫລ້າສຸດມີຂ່າວອອກມາວ່ານັກເຕະທີມຊາດ ອາເຈນຕິນາ ມີຄວາມລັງເລໃຈຫລາຍກ່ຽວກັບການຂະຫຍາຍສັນຍາຂອງລາວ ເຊິ່ງເຊື່ອວ່າມີໂອກາດທີ່ລາວຈະອອກຈາກ ເປແອສເຊ ຫລັງຈົບລະດູການ 2022-23 ເຊິ່ງເຮັດໃຫ້ ເມສຊີ່ ມີຂ່າວກັບ ບາເຊໂລນາ ຕາມມາເຊັນກັນ.

ຮໍເກ້ ກ່າວຕໍ່ ໜັງສືພິມກິລາຂອງ Catalonia ວ່າ: “ຂ້ອຍບໍ່ຄິດວ່າ ລີໂອ ຈະຫລິ້ນໃຫ້ ບາເຊໂລນາ ອີກເທື່ອໜຶ່ງ, ພວກເຮົາບໍ່ສາມາດຕົກລົງເງື່ອນໄຂກັນໄດ້ກ່ອນໜ້ານີ້. ມາຮອດປະຈຸບັນນີ້ພວກເຮົາບໍ່ໄດ້ລົມກັບ (ໂຈນ ປະທານຂອງ ບາເຊໂລນາ)  ແລະ ຍັງບໍ່ມີການຍື່ນຂໍ້ສະເຫນີໃດໆທັງນັ້ນ (ຈາກຝ່າຍ ບາເຊໂລນາ).