ສີລັງກາຂຶ້ນຄ່າໄຟຟ້າ 66% ຫວັງຈູງໃຈ IMF ປ່ອຍເງິນກູ້ງວດໃໝ່
ລັດຖະບານສີລັງກາຂຶ້ນຄ່າໄຟຟ້າອີກ ໃນອັດຕາ 66% ເພື່ອຫວັງເພີ່ມຄວາມເພິ່ງພໍໃຈໃຫ້ກອງທຶນການເງິນສາກົນໃນການອະນຸມັດສິນເຊື່ອງວດໃໝ່.
ວັນທີ 16 ກຸມພາ, ສໍານັກຂ່າວຕ່າງປະເທດລາຍງານວ່າ: ກະຊວງພະລັງງານຂອງສີລັງກາອອກຖະແຫລງການ ເລື່ອງການປັບຂຶ້ນຄ່າໄຟຟ້າໃນອັດຕາ 66% ໂດຍບໍ່ໄດ້ລະບຸຢ່າງຈະແຈ້ງກ່ຽວກັບເພດານລາຄາ ແລະ ການກໍານົດໄລຍະລາຄາ, ແຕ່ມີການສະແດງຄວາມຫວັງວ່າ: ຈະສາມາດຫລຸດລາຄາຄ່າໄຟຟ້າລົງໄດ້ ເມື່ອຮອດກໍານົດການປະເມີນສະຖານະການຄັ້ງຕໍ່ໄປໃນເດືອນກໍລະກົດຈະເຖິງນີ້.
ສີລັງກາ ເຊິ່ງກໍາລັງປະສົບວິກິດເສດຖະກິດຄັ້ງຮ້າຍແຮງທີ່ສຸດໃນປະຫວັດສາດຂອງປະເທດ ປັບຂຶ້ນຄ່າໄຟຟ້າເປັນຄັ້ງທໍາອິດໃນຮອບ 9 ປີ ໃນເດືອນສິງຫາ 2021 ກໍານົດອັດຕາ 264% ໂດຍມີລາຍງານອີກວ່າ: ກ່ອນໜ້ານີ້ລັດຖະບານຕ້ອງການປັບເພີ່ມອັດຕາຄ່າໄຟຟ້າສູງເຖິງ 800% ແຕ່ຄະນະກໍາມະການກວດສອບສາທາລະນູປະໂພກກໍານົດເພດານໄວ້ສູງສຸດ 264%.
ເຖິງຢ່າງໃດກໍຕາມ, ປະມານສອງໃນສາມຈາກ 7,8 ລ້ານຄອບຄົວໃນສີລັງກາ ເຊິ່ງໃຊ້ກະແສໄຟຟ້າໜ້ອຍກວ່າ 90 ກິໂລວັດຕໍ່ເດືອນ ຈະຍັງໄດ້ຮັບຜົນກະທົບຈາກມາດຕະການຂຶ້ນຄ່າໄຟຟ້າຫລາຍທີ່ສຸດ ເນື່ອງຈາກຄ່າທໍານຽມຈະເພີ່ມແບບກ້າວກະໂດດ. ຂະນະທີ່ລັດຖະບານເນັ້ນ “ຄວາມຈໍາເປັນ” ຂອງມາດຕະການ ຫລັງຢຸດນະໂຍບາຍອຸດໜູນຄ່າໄຟຟ້າ ແລະ ເພື່ອຊ່ວຍໃຫ້ໜ່ວຍງານທີ່ກ່ຽວຂ້ອງ ວາງແຜນກໍານົດຄ່າໄຟຟ້າໃນໄລຍະຍາວຕໍ່ໄປ.
ການເຄື່ອນໄຫວດັ່ງກ່າວຂອງສີລັງກາເປັນສ່ວນໜຶ່ງ ຕາມ “ເງື່ອນໄຂອັນເຄັ່ງຂັດ” ຂອງກອງທຶນການເງິນສາກົນ (IMF) ເພື່ອແລກນໍາການປ່ອຍສິນເຊື່ອງວດໃໝ່ ມູນຄ່າ 2.900 ລ້ານໂດລາສະຫະລັດ ຕາມທີ່ມີການບັນລຸຂໍ້ຕົກລົງຮ່ວມກັນໃນເດືອນກັນຍາປີຜ່ານມາ.
