ເຈົ້າໜ້າທີ່ໄທ ບຸກກວດຄົ້ນພ້ອມຢຶດເຄື່ອງສຳອາງແບຣນດັງ ແລະ ຢາຖູແຂ້ວປອມ ຫລາຍກວ່າ 70 ລາຍການ

ສຳນັກຂ່າວ thairath ລາຍງານວ່າ: ວັນທີ 13 ກຸມພາ 2023 ນີ້, ກອງບັງຄັບການປາບປາມການກະທຳຄວາມຜິດກ່ຽວກັບການຄຸ້ມຄອງຜູ້ບໍລິໂພກ ພ້ອມດ້ວຍຄະນະກົມການອາຫານ ແລະ ຢາ ຮ່ວມກັນຖະແຫລງຜົນການເຂົ້າກວດຄົ້ນ 3 ຈຸດ ໃນພື້ນທີ່ເຂດປະເວດ, ກຸງເທບມະຫານະຄອນ ແລະ ສະໝຸດປາການ, ຫລັງພົບວ່າມີການລັກລອບໃຊ້ເປັນສະຖານທີ່ແພັກສິນຄ້າ ແລະ ສາງເກັບສິນຄ້າປະເພດເຄື່ອງສຳອາງແບຣນໄທ ແລະ ຢາຖູແຂ້ວປອມ ຫລາຍຍີ່ຫໍ້.
ຈາກການກວດຄົ້ນຂອງເຈົ້າໜ້າທີ່ສາມາດກວດຢຶດເຄື່ອງສຳອາງ ແລະ ຢາຖູແຂ້ວຍີ່ຫໍ້ ເທບໄທປອມ ແລະ ແບຣນອື່ນໆ ຫລາຍກວ່າ 67,430 ອັນ ລວມ 70 ລາຍການ, ພ້ອມຈັບຜູ້ຕ້ອງຫາໄດ້ 1 ຄົນ ຊື່ທ້າວ ຈົງ ສັນຊາດ ຈີນ ເປັນຄົນເຝົ້າສະຖານທີ່ໂດຍມີນາຍທຶນຈີນເປັນຄົນສັ່ງ ແລະ ເຮັດວຽກມາຫລາຍກວ່າ 3 ເດືອນ ສ່ວນສິນຄ້າທັງໝົດແມ່ນມາຈາກປະເທດຈີນ.

ທ່ານ ດຣ ວິລະໄຊ ນະລົງໄຊ ຮອງເລຂາທິການ ຄະນະກົມການອາຫານ ແລະ ຢາ ກ່າວວ່າ: ແທ້ ຫລື ປອມ ໃຫ້ຕັ້ງຂໍ້ສັງເກດທີ່ຮູບແບບ ແລະ ພາສາທີ່ຂຽນຕິດໃສ່ໜ້າຜະລິດຕະພັນ, ເຊິ່ງການຈັບກຸມຄັ້ງນີ້ເປັນການຕັດວົງຈອນທາງເສດຖະກິດ ແລະ ແນະນຳໃຫ້ປະຊາຊົນ ໃນການເລືອກຊື້ສິນຄ້າອອນລາຍ ຕ້ອງຊື້ໃນຮ້ານທີ່ມີຄວາມໜ້າເຊື່ອຖື ແລະ ມີການຈົດລະບຽນເຄື່ອງໝາຍການຄ້າ, ພິຈາລະນາວ່າສິນຄ້ານັ້ນຖືກເກີນໄປ ຫລື ບໍ. ນອກນີ້ຍັງກວດພົບຖົງຢາງປອມທີ່ບໍ່ມີປະສິດທິພາບຈຳນວນໜຶ່ງ, ດັ່ງນັ້ນຈຶ່ງຂໍໃຫ້ຜູ້ບໍລິໂພກຊື້ສິນຄ້າດັ່ງກ່າວຜ່ານຮ້ານຂາຍຢາເທົ່ານັ້ນ.