ຊື້ຢໍ່ໝູ ມີແຕ່ໃບຕອງເປັນສ່ວນຫລາຍເປັນການເອົາປຽບຜູ້ບໍລິໂພກເກີນໄປ

ອາຫານສຳເລັດຮູບປະເພດຢໍ່ໝູ ທີ່ຂາຍຕາມຕະຫລາດແມ່ນຫຸ້ມຫໍ່ດ້ວຍໃບຕອງ ເພາະມັນຈະຮັກສາກິ່ນ ແລະ ຄຸນນະພາບໄດ້ດົນກວ່າ, ແຕ່ສິ່ງທີ່ເປັນຄວາມສ່ຽງກໍຄືບໍ່ຮູ້ໄດ້ວ່າທາງໃນຈະມີຢໍ່ໝູໜ້ອຍຫລາຍພຽງໃດ ?
ມັນຈະສົມກັບລາຄາທີ່ວາງຂາຍນັ້ນບໍ? ຈາກປະສົບການລົງໄປທ່ຽວແຂວງພາກໃຕ້ ຍ້ອນຄວາມຫິວ ຈຶ່ງໄດ້ແວະຊື້ຢໍ່ໝູຫໍ່ໜຶ່ງໃຫຍ່ເຕີບ ໃນລາຄາ 20.000 ກີບ ແລະ ກໍຄິດໃນໃຈວ່າທາງໃນອາດຈະມີຢໍ່ສົມນໍ້າສົມຕ່ອນ ແລະ ອາດຈະແຊບສົມລາຄາແນ່ນອນ, ແຕ່ໜ້າເສຍດາຍມັນບໍ່ຄືດັ່ງທີ່ຄາດຄິດ ແລະ ກໍບໍ່ຮູ້ຈະເອົາເລື່ອງໃຜໃນເມື່ອຕົນເອງເປັນພຽງຄົນທຽວທາງ, ກໍພຽງທຳໃຈດັ່ງເຮົາຫລິ້ນເລກຫລິ້ນເບີ, ແຕ່ສິ່ງທີ່ໜ້າເປັນຫ່ວງນັ້ນກໍແມ່ນນໍ້າໃຈ ຫລື ຈັນຍາບັນຂອງຜູ້ຂາຍສິນຄ້າອາດມີອັນປ່ຽນໄປໃນຍຸກເສດຖະກິດຕະຫລາດ “ເຂົ້າຍາກໝາກແພງ”  ດັ່ງທຸກມື້ນີ້, ແຕ່ຖ້າພາກສ່ວນກ່ຽວຂ້ອງບໍ່ມີການກວດກາ, ຄຸ້ມຄອງທີ່ດີພວກເຮົາກໍຈະຖືກເອົາປຽບແບບນີ້ອີກ, ເຊິ່ງກໍອາດຈະມີພຽງຢໍ່ໝູເທົ່ານັ້ນມັນອາດກ້າວເຖິງວັດຖຸເງິນຄຳສິ່ງມີຄ່າສູງກ່ວານີ້ຕັ້ງຫລາຍເທົ່າອີກ.

ປະສົບການຊື້ຢໍ່ໝູ ຄັ້ງນີ້ອາດຈະບໍ່ແມ່ນບົດຮຽນທີ່ໃຫຍ່ໂຕພໍເທົ່າໃດ ແຕ່ຖ້າເຮົານຶກເຖິງຄວາມສົມເຫດສົມຜົນດ້ານລາຄາ, ການເອົາປຽບຜູ້ບໍລິໂພກ ກໍຖືວ່າມັນກໍເປັນສິ່ງໜຶ່ງທີ່ສະທ້ອນໃຫ້ເຫັນດ້ານຈັນຍາບັນໃນອາຊີບ ທີ່ເຮົາຄວນຄຳນຶງ.