ເລື່ອນຊັ້ນພິເສດໃຫ້ນາຍຕຳຫຼວດ 2 ນາຍທີ່ມີຜົນງານໃນການເຮັດໜ້າທີ່ແກ້ໄຂຄວາມບໍ່ສະຫງົບຢູ່ເມືອງນານ
ວາລະສານປ້ອກັນຄວາມສະຫງົບລາຍງານໃຫ້ຮູວ່າ: ວັນທີ 13 ກຸມພາ 2023 ນີ້ ທ່ານ ພົຕ ວັນທອງ ກອງມະນີ ຮອງລັດຖະມົນຕີ ຫົວໜ້າກົມໃຫຍ່ການເມືອງ ປກສ ເຂົ້າຢ້ຽມຢາມນາຍຕໍາຫຼວດທີ່ໄດ້ຮັບບາດເຈັບໃນຂະນະປະຕິບັດໜ້າທີ່ສະກັດກັ້ນຄົນຮ້າຍຢູ່ເມືອງນານ ແຂວງຫຼວງພະບາງ ທີ່ໄດ້ມາປີ່ນປົວຢູ່ໂຮງໝໍສູນກາງ 103 ກອງທັບ ນະຄອນຫຼວງວຽງຈັນ ພ້ອມທັງ ເລື່ອນຊັ້ນພິເສດ ຮທ ຂຶ້ນເປັນຊັ້ນ ຮອ ໃຫ້ສະຫາຍ ພົມມາລາ ວິມະຈິດຕະພົງ ພະນັກງານພະແນກການເມືອງ ປກສ ເມືອງນານ ແລະ ເລື່ອນຊັ້ນ ຮຕ ຂຶ້ນ ຮທ ໃຫ້ສະຫາຍ ສົມໃຈ ແກ້ວມະນີຄະ ພະນັກງານກຸ່ມທົ່ງຈະເລີນ ປກສ ເມືອງນານ ແຂວງຫຼວງພະບາງ ມອບຫຼຽນໄຊພິລະອາດຫານ ຊັ້ນ I ໃຫ້ທັງສອງສະຫາຍ.
ທັງນີ້, ເພື່ອເປັນການປະຕິບັດນະໂຍບາຍຢ່າງຖືກຕ້ອງຕໍ່ນາຍຕຳຫຼວດທີ່ມີຜົນງານດີເດັ່ນພິເສດເຮັດໜ້າທີ່ສູ້ຮົບ, ຮັບໃຊ້ການສູ້ຮົບຢ່າງພິລະອາດຫານ ທັງເປັນການເສີມຂະຫຍາຍທາດແທ້ມູນເຊື້ອປະຕິວັດຂອງກຳລັງປ້ອງກັນຄວາມສະຫງົບປະຊາຊົນ ແລະ ເປັນການຍໍຍ້ອງສັນລະເສີນຜົນງານຄຸນງາມຄວາມດີໃຫ້ນາຍຕຳຫຼວດ ກະຊວງປກສ ທີ່ມີຜົນງານດີເດັ່ນໃນການປະຕິບັດໜ້າທີ່ແກ້ໄຂຄວາມບໍ່ສະຫງົບຢູ່ເມືອງນານ ແຂວງຫຼວງພະບາງ ໃນຄັ້ງວັນທີ 6 ກຸມພາ 2023 ໄດ້ສຳເລັດຕາມແຜນການ ເຊິ່ງຜົນງານດັ່ງກ່າວເປັນການປະກອບສ່ວນອັນສຳຄັນເຂົ້າໃນວຽກງານປ້ອງກັນຊາດ-ປ້ອງກັນຄວາມສະຫງົບ ເພື່ອປົກປັກຮັກສາ ແລະ ພັດທະນາປະເທດຊາດ.
