ຢ່າໃຫ້ນໍ້າເມົາມາເປັນພິດໄພຕໍ່ສັງຄົມ

ໄລຍະມໍ່ມານີ້ປາກົດມີຂ່າວໃນສື່ສັງຄົມອອນລາຍໃຫ້ເຫັນເປັນປະຈຳ ບໍ່ວ່າຈະເປັນການໃຊ້ອາວຸດເສິກ ຫລື ໃຊ້ກຳລັງແຮງ ຫລື ໃຊ້ວັດຖຸທີ່ເປັນອັນຕະລາຍຕໍ່ຮ່າງກາຍທຳລາຍກັນ ຊຶ່ງເຫດການລັກສະນະນີ້ທີ່ຜ່ານມາ ພວກເຮົາເຄີຍເຫັນແຕ່ຂ່າວທີ່ເກີດຂຶ້ນຈາກສັງຄົມອື່ນໂດຍສະເພາະປະເທດຕາເວັນຕົກທີ່ຈະເລີນຮັ່ງມີທາງວັດຖຸ, ແຕ່ວັດທະນະທໍາທີ່ດີງາມດັ້ງເດີມຂອງບັນພະບຸລຸດເສື່ອມສູນແລ້ວ. ຫລາຍທ່ານຄົງບໍ່ລືມຄຳສອນອັນໜຶ່ງຄື ໂມໂຫໂທໂສ ພາໂຕຕົກຕໍ່າ ໂດຍຄຳສອນນີ້, ພໍ່ແມ່ຜູ້ປົກຄອງທັງຫລາຍລ້ວນແຕ່ເຄີຍໃຊ້ບອກລູກສອນຫລານ ແລະ ດຽວນີ້ຄຳສອນດັ່ງກ່າວຍັງໃຫ້ຄວາມໝາຍໃນແງ່ຄົ້ນຄິດເປັນຢ່າງດີ ຊຶ່ງປັດຈຸບັນປາກົດວ່ານໍ້າເມົາໄດ້ກັບມາອາລະວາດໃນສັງຄົມເຮົານັບມື້ຫລາຍຂຶ້ນໂດຍສະເພາະຖັນແຖວໄວໜຸ່ມ, ປາກົດການນີ້ນັບມື້ມີຫລາຍເປັນຕົ້ນຢູ່ຕົວເມືອງໃຫຍ່ຕ່າງໆໄປທາງໃດກໍເຫັນຕັ້ງວົງດື່ມເຫລົ້າດື່ມເບຍຈົນນັບບໍ່ຖ້ວນ, ຮ້ານອາຫານ, ຮ້ານບັນເທີງປົ່ງອອກປານດອກເຫັດ, ບໍລິການບໍ່ມີທຸ້ມມີໂມງ, ເດັກບໍ່ເຖິງອາຍຸກະສຽນກໍສາມາດເຂົ້າດື່ມເຫລົ້າດື່ມເບຍໄດ້ ແລະ ອື່ນໆ…..

ຄວາມໂມໂຫໂທໂສ ເກີດຈາກຫລາຍສາເຫດ ບໍ່ວ່າຈະເປັນການດື່ມນໍ້າເມົາເກີນເຖືອດເກີດຄວາມສາມາດຮັບໄດ້ຂອງຮ່າງກາຍ ບໍ່ວ່າຈະເປັນຄວາມອະຄະຕິ ຄວາມເປັນບາດແປ້ວທາງໃຈ ຄວາມອາຄາດໝາດບາງຄວາມຂັດແຍ້ງ ຄວາມຫຶງຫວງ… ເມື່ອໃດບໍ່ສາມາດຄວບຄຸມອາລົມຈິດຂອງຕົນເອງໃນທຸກສະຖານະການໄດ້ ກໍຈະທຳລາຍກັນບໍ່ວິທີໃດກໍວິທີໜຶ່ງ. ແນວໃດກໍດີຍັງມີອີກຫລາຍຄົນທີ່ຮູ້ຈັກຄວບຄຸມອາລົມຈິດຂອງຕົນເອງໄດ້ບໍ່ວ່າຈະໃນທຸກສະຖານະການໃດ ຊຶ່ງຄົນປະເພນີ້ນັບເປັນຄົນສະຫລາດ, ແຕ່ກໍມີບໍ່ຫລາຍທີ່ສາມາດເຮັດໄດ້ ເນື່ອງຈາກເນື້ອແທ້ຈິດໃຈຂອງຄວາມເປັນຄົນກັບການກະທໍາມັກອອກມາຄືກັນ, ການຮູ້ສະຫງວນທ່າທີຢ່າງສະເໝີຕົ້ນສະເໝີປາຍບໍ່ແມ່ນເລື່ອງງ່າຍເພາະຄົນສ່ວນຫລາຍມັກກະທໍາຕາມໃຈຕົນເອງ. ໃນທີ່ນີ້ຂໍຍົກບັນຫາການດື່ມເຄື່ອງດື່ມ ທີ່ມີສານກໍ່ໃຫ້ເກີດຄວາມມຶນເມົາແລ້ວສາມາດຄວບຄຸມອາລົມຕົນເອງໄດ້ນັ້ນໂດຍທໍາມະຊາດແລ້ວເປັນໄປໄດ້ຍາກ ຊຶ່ງພາສາຊາວບ້ານມັກເວົ້າວ່າ ເຫລົ້າເຂົ້າປາກຄວາມຍາກບໍ່ມີ ຫລື ເອີ້ນເຄື່ອງດື່ມມຶນເມົາຢ່າງໜຶ່ງວ່າ ນໍ້າປ່ຽນນິໄສ…ແຕ່ກໍບໍ່ຍາກສະເໝີໄປຖ້າຮູ້ຮັກສາອາລົມ ແລະ ຄວາມຮູ້ ສຶກໃຫ້ດີເວລາມີສິ່ງກະຕຸກທາງປະສາດ.

ທີ່ຍົກປະເດັນ ນໍ້າປ່ຽນນິໄສ ຫລື ນໍ້າເມົາຂຶ້ນມາຍ້ອນເຫັນວ່າ ບຸນ ຫລື ດອງ ຫລື ກິດຈະກໍາຕ່າງໆແຕ່ລະໂອກາດເກືອບວ່າປາສະຈາກບໍ່ໄດ້ການດື່ມນໍ້າເມົາ ແລະ ໄດ້ກາຍເປັນປາກົດການຫຍໍ້ທໍ້ໃນສັງຄົມ ຊຶ່ງຖ້າດື່ມເກີນເຖືອດ ຍ່ອມຂາດສະຕິສຳປັດຊະຍະ ເມື່ອຂີ່ລົດຂີ່ລາງອາດຈະສົ່ງຜົນຕໍ່ການເກີດອຸບັດເຫດທາງທ້ອງຖະໜົນ ຫລື ເກີດການອາລະວາດຕີກັນ, ກໍ່ກວນກັນ…

ບໍ່ວ່າຍາມໃດ ຜູ້ດື່ມນໍ້າເມົາ ກໍຂໍໃຫ້ພໍດີພໍງາມ, ຢ່າໃຫ້ນໍ້າເມົາຄວບຄຸມເຮົາ ເພາະຈະຂາດສະຕິການເວົ້າຈາ ແລະ ການກະທຳ. ຄົນບູຮານເຄີຍສອນວ່າ ການປ້ອງກັນຕົນທີ່ດີບໍໍ່ແມ່ນການມີອາວຸດດີໄວ້ຄອບຄອງ, ແຕ່ເປັນການເພີ່ມໝູ່ເພື່ອນຮັກແພງ ຫລື ເພີ່ມມິດນັ້ນເອງ. ຂະນະດຽວກັນ ຜູ້ປະກອບການຮ້ານບັນເທີງທີ່ບໍລິການຂາຍເຄື່ອງດື່ມມຶນເມົາກໍຂໍໃຫ້ມີຄວາມຮັບຜິດຊອບຕໍ່ສັງຄົມເຊັ່ນດຽວກັນໂດຍການປະຕິບັດຕາມກົດລະບຽບ ກົດໝາຍບ້ານເມືອງທີ່ກຳນົດໄວ້ ການໂຄສະນາຊວນເຊື່ອຍົວະຕາລໍ້ໃຈໂດຍການຫລຸດແລກແຈກແຖມພໍຢຸດໄດ້ກໍດີ, ອົງການປົກຄອງບ້ານ, ກອງຫລອນ, ປກສ ບ້ານ, ເມືອງ ຫລື ຂະແໜງການລັດ ທີ່ກ່ຽວຂ້ອງຕ້ອງຕິດຕາມກວດກາແທ້ໆ ແລະ ປະຕິບັດກົດໝາຍຢ່າງເຄັ່ງຄັດຕໍ່ຜູ້ປະກອບການຮ້ານບັນເທີງທີ່ມີປາກົດການຫຍໍ້ທໍ້ທັງຫລາຍເກີດຂຶ້ນຢູ່ຮ້ານຂອງຕົນ.