ຊະລາຕັນ ຢືນຢັນ ຕົນຍັງເປັນພະເຈົ້າ ແລະ ເບີ 1 ຫລັງໃກ້ຄືນສະໜາມອີກເທື່ອຫນຶ່ງ
ຊະລາຕັນ ອີບຣາຮີໂມວິດ ດາວຍິງປະສົບການຫລາຍຊາວສະວີເດັນຂອງທີມ ເອຊີ ມິລານ ແຊ໊ມເກ່ົາຂອງ ເຊເຣຍ ອາ ອິຕາລີ ອອກມາປະກາດສຽງແຂງວ່າ ຕົນຍັງເປັນພະເຈົ້າ ແລະ ເປັນອັນດັບ 1 ຫລັງໃກ້ກັບມາລົງສະໜາມໃຫ້ກັບທີມໄດ້ອີກເທື່ອຫນຶ່ງ.
ກ່ອນໜ້ານີ້ ຊະລາຕົນ ອີບຣາຮີໂມວິດ ຕ້ອງເຂົ້າຮັບການຜ່າຕັດຫົວເຂົ່າ ຕັ້ງແຕ່ລະດູການທີ່ຜ່ານມາ ເຊິ່ງໄລຍະທຳອິດມີການກັງວົນກັນວ່າລາວອາດ ຈະຕ້ອງຫັ້ນຫລັງໃຫ້ກັບການເປັນນັກເຕະບານອາຊີບ ແນວໃດກໍຕາມດາວຍິງອາຍຸ 41 ປີ ຢືນຢັນວ່າ ລາວກັບມາລົງສະໜາມອີກເທື່ອຫນຶ່ງ ແລະ ຕອນນີ້ກັບມາຊ້ອມເຕັມຮູບແບບກັບເອຊີ ມິລານ ໄດ້ແລ້ວ ໃນອາທິດນີ້ ເຊິ່ງລາວຫມັ້ນໃຈວ່າຄວາມສາມາດຂອງລາວຈະສາມາດຊ່ວຍທີມໃຫ້ ມິລານ ກັບມາຢູ່ໃນຜົນງານທີ່ດີໄດ້ ຫລັງຕອນນີ້ເບິ່ງຄືວ່າຜົນງານຂອງລາວຈະບໍ່ຂ້ອຍດີ.
ໂດຍ ຊະລາຕັນ ກ່າວກັບສະປອດ ມິເດຍເຊັດ ວ່າ : “ ຂ້ອຍຍັງເປັນພະເຈົ້າ ຂ້ອຍຍັງເປັນເບີ 1 ຕອນນີ້ມາປ່ຽນເພງກັນ ຕອນທີ່ຂ້ອຍກັບມາ ຂ້ອຍຢາກເຮັດ ຫລາຍຢ່າງຫລາຍ ຫລັງຈາກທີ່ຂ້ອຍຕ້ອງພັກໄປຫລາຍເດືອນ ຂ້ອຍເສຍເວລາ ”.
“ ຂ້ອຍສະບາຍດີ ຂ້ອຍພ້ອມ ຂ້ອຍໄດ້ກັບມາຢູ່ກັບທີມ ແລະ ຂ້ອຍຮູ້ສຶກອິດສະຫລະ ທັງໃນ ແລະ ນອກສະໜາມ ຂ້ອຍຫມາຍເຖິງຂ້ອຍສະບາຍດີໃນເວລານີ້ ຂ້ອຍໄດ້ເຮັດທຸກຢ່າງເພື່ອຊ່ວຍຜູ້ຈັດການທີມ, ທີມງານ ແລະ ສະໂມສອນ ຈາກດ້ານນອກ ຂ້ອຍອົດທົນ ເພາະຂ້ອຍຕ້ອງກັບມາໃນຈຸດສູງສຸດ ການຟື້ນຟູ ເປັນໄປຕາມແຜນ ” .
ສ່ວນເລື່ອງຜົນງານອັນຕົກຕຳ່ຂອງ ມິລານ ລາວເປີດເຜີຍວ່າ : “ ຂ້ອຍບໍ່ກັງວົນ ນີ້ເປັນໄລຍະເວລາປົກກະຕິໃນການແຂ່ງຂັນ ຕອນນີ້ເຮົາຈຳເປັນຕ້ອງ ເວົ້າເຖິງກັນໃຫ້ໜ້ອຍລົງ ແລະ ສະແດງໃຫ້ເຫັນຄຸນຄ່າຂອງເຮົາໃນສະໜາມ ”.
