ການເຮັດໜັງສືຜ່ານແດນຊັກຊ້າ ອາດເປັນຍ້ອນມີນາຍໜ້າຮັບຈ້າງລັດຄິວ

ຕາມຄຳແນະນຳຂອງກົມກົງສຸນ ກະຊວງການຕ່າງປະເທດ ທີ່ເຮັດປ້າຍຕິດໄວ້ຈຸດໜ້າຫ້ອງສຳພາດ ລະບຸຂັ້ນຕອນການເຮັດໜັງສືຜ່ານແດນ (ພາສປອດ) ມີດັ່ງນີ້:

ສຳລັບ ຜູ້ເຮັດໜັງສືຜ່ານແດນຫົວໃໝ່ ຈະຕ້ອງໄດ້ປະກອບເອກະສານລວມມີ: ສຳເນົາປຶ້ມສຳມະໂນຄົວ 1 ຊຸດ, ຕ້ອງຖື ບັດປະຕຳຕົວ ແລະ ສຳມະໂນຄົວຕົ້ນສະບັບມາພ້ອມ (ໃນປຶ້ມດັ່ງກ່າວຕ້ອງມີຮູບຜູ້ກ່ຽວ ປະທັບກາ ປກສ ເມືອງ), ສຳລັບຜູ້ທີ່ມີອາຍຸຕໍ່າກວ່າ 18 ປີ ຕ້ອງມີ ໃບອະນຸຍາດຈາກຜູ້ປົກຄອງ ໂດຍເຊັນຜ່ານອຳນາດການປົກຄອງບ້ານ 1 ໃບ, ສ່ວນຜູ້ທີ່ຈະປ່ຽນໜັງສືຜ່ານແດນໃໝ່ ຕ້ອງນຳເອົາໜັງສືຜ່ານແດນຫົວເກົ່າ ແລະ ສຳເນົາໜ້າທີ່ມີຮູບ 1 ໃບ, ພ້ອມນີ້ຕ້ອງມີໜັງສືຄຳຮ້ອງ ເຮັດໜັງສືຜ່ານແດນ ທີ່ສາມາດໂຫລດເອົາເອງໄດ້ໃນເວັບໄຊກະຊວງການຕ່າງປະເທດ http://www.mofa.gov.la/index ຫລື http://www.mof.gov.la/lo/passpoort_application (ເອກະສານລະບຸໄວ້ວ່າຫ້າມຂາຍ), ຂຽນໃສ່ຫວ່າງທີ່ກຳນົດໃຫ້ ແລະ ຕິດຮູບ ຂະໜາດ 4×6 ພື້ນສີຂາວ ພ້ອມປະທັບການາຍບ້ານ ແລ້ວນຳເອົາເອກະສານດັ່ງກ່າວນັ້ນມາຍື່ນຂໍສຳພາດຢູ່ກົມກົງສຸນ ດ້ວຍຕົນເອງ ເພື່ອຈະໄດ້ຮັບບັດນັດມື້ສຳພາດຕາມຄິວ. ໜັງສືຜ່ານແດນຈະໄດ້ຮັບພາຍຫລັງສຳພາດແລ້ວ ໂດຍໃຊ້ເວລາແຕ່ 10 ຫາ 15 ວັນ (ບໍ່ນັບວັນພັກລັດຖະການ) ໃນລາຄາປົກກະຕິແບບທຳມະດາແມ່ນ 400.000 ກີບ/ຫົວ

ແຕ່ໄລຍະບໍ່ດົນມານີ້ ໄດ້ມີປະຊາຊົນຈຳນວນໜຶ່ງສ່ອງແສງມາວ່າ ການເຮັດໜັງສືຜ່ານແດນ ມີຄວາມຫຍຸ້ງຍາກຫລາຍ, ໃຊ້ເວລາດົນ ນັບແຕ່ມື້ຍື່ນເອກະສານ ແລ້ວຕ້ອງລໍຖ້ານັດສຳພາດ ໄວສຸດກໍແມ່ນ 21 ວັນ ຫລື ເປັນເດືອນກໍມີ, ຍ້ອນມີພວກນາຍໜ້າມາຮັບເອກະສານ ເພື່ອລັດຄິວ ແລະ ຫາລາຍໄດ້ທີ່ບໍ່ຊອບທຳ, ຫາກທ່ານໃດຕ້ອງການຮີບດ່ວນ ແລະ ຕ້ອງການເຂົ້າສຳພາດພາຍໃນວັນນັ້ນ ຈະຕ້ອງໄດ້ຈ່າຍເງິນໃຫ້ພວກເຂົາແຕ່ 1-2 ລ້ານກີບ. ດັ່ງນັ້ນ, ຈິ່ງເປັນສາເຫດເຮັດໃຫ້ຜູ້ບໍ່ມີຄວາມສາມາດຈ່າຍເງິນທີ່ມີມູນຄ່າສູງດັ່ງກ່າວ ຕ້ອງໄດ້ລໍຖ້າ ເປັນເວລາຍາວເກີນກ່ວາກຳນົດ.

ເຖິງຢ່າງໃດກໍດີ ການສ່ອງແສງດັ່ງກ່າວ ອາດບໍ່ມີຄວາມແນ່ນອນ ດັ່ງນັ້ນ, ວັນທີ 9 ກຸມພາ 2023 ນີ້ ທີມງານຂ່າວໜັງສືພິມລາວພັດທະນາ ຈຶ່ງໄດ້ລົງໄປສະຖານຕົວຈິງທີ່ອອກໜັງສືຜ່ານແດນ ຢູ່ນະຄອນຫລວງວຽງຈັນ ຜົນປາກົດວ່າ ເປັນດັ່ງທີ່ປະຊາຊົນສ່ອງແສງມາ. ນັບຕັ້ງແຕ່ກ້າວຂາເຂົ້າສູ່ເຂດ ທັງນອກ ແລະ ໃນກຳແພງ ຈະມີກຸ່ມນາຍໜ້າເຂົ້າມາສະເໜີເງື່ອນໄຂຄວາມສະດວກໃຫ້ ເປັນຕົ້ນແມ່ນສິດໃນການເຂົ້າສຳພາດພາຍໃນມື້, ສິດໃນການໄດ້ຮັບປຶ້ມໜັງສືຜ່ານແດນພາຍໃນ 3-5 ວັນ ແຕ່ຕ້ອງຈ່າຍເງິນ ຕາມລຳດັບຄວາມຮີບດ່ວນຢູ່ລະຫວ່າງ 1-2 ລ້ານກີບ ມີທັງບໍລິການເອົາປື້ມອອກມາໃຫ້ ຫລື ເຂົ້າໄປຮັບປື້ມເອງແລ້ວແຕ່ສະດວກຂອງຜູ້ຕ້ອງການເຮັດໜັງສືຜ່ານແດນ (ຄົນຮັບແລ່ນບໍ່ແມ່ນພະນັກງານ ເປັນພຽງນາຍໜ້າບໍ່ມີສັງກັດ).

ຈາກເຫດການທີ່ເກີດຂຶ້ນນັ້ນ ຖືວ່າເປັນນຶ່ງໃນບັນດາປາກົດການຫຍໍ້ທໍ້ທາງສັງຄົມ, ອັນສ້າງຄວາມຫຍຸ້ງຍາກລຳບາກແກ່ປະຊາຊົນ ແລະ ເປັນການກົດໜ່ວງຖ່ວງດຶງໃຫ້ພາບລັກຂອງການເຮັດວຽກໃນຂົງເຂດລັດມົວໝອງໄປນຳ.

ດັ່ງນັ້ນ, ຮຽກຮ້ອງໃຫ້ພາກສ່ວນກ່ຽວຂ້ອງ ລົງຕິດຕາມກວດກາ ແລະ ແກ້ໄຂ ບັນຫາຕ່າງໆນັ້ນໃຫ້ໝົດໄປ ເພື່ອຄວາມເປັນເອກະພາບ ແລະ ເທົ່າທຽມໃນສັງຄົມ ຕາມເປົ້າໝາຍ ແລະ ນະໂຍບາຍພັກລັດທີ່ວາງອອກດ້ວຍ.