ປະທານາທິບໍດີ ແລະ ຮອງປະທານາທິບໍດີໄຕ້ຫວັນຍອມເສຍສະຫລະເງິນເດືອນ ຊ່ວຍຜູ້ປະສົບໄພແຜ່ນດິນໄຫວຢູ່ຕວກກີ

ສໍານັກປະທານາທິບໍດີໄຕ້ຫວັນ ລະບຸໃນວັນທີ 9 ກຸມພາວ່າ: ທ່ານ ນາງ ໄຊ່ ອິງເຫວິນ ປະທານາທິບໍດີໄຕ້ຫວັນ ແລະ ທ່ານ ວິລລຽມ ໄລ່ ຊິງເຕີ ຮອງປະທານາທິບໍດີໄຕ້ຫວັນ ຈະບໍລິຈາກລາຍໄດ້ 1 ເດືອນຂອງຕົນເພື່ອຊ່ວຍບັນເທົາເຫດແຜ່ນດິນໄຫວຢູ່ຕວກກີ ເພີ່ມຈາກການຊ່ວຍເຫລືອທີ່ສົ່ງໄປແລ້ວ ແລະ ທັງສອງທ່ານຕັ້ງໃຈເຮັດໜ້າທີ່ໃນສ່ວນຂອງຕົນເພື່ອຊ່ວຍຕວກກີຟື້ນຕົວໃຫ້ໄດ້ໄວທີ່ສຸດເທົ່າທີ່ຈະເຮັດໄດ້.

ຫລ້າສຸດ, ສໍານັກຂ່າວ AFP ລາຍງານຈໍານວນຜູ້ເສຍຊີວິດຫລາຍກວ່າ 16.000 ຄົນຈາກເຫດແຜ່ນດິນໄຫວຄັ້ງໃຫຍ່ໃນວັນທີ 6 ກຸມພາ ໂດຍເປັນຜູ້ເສຍຊີວິດຢູ່ຕວກກີ 12.873 ຄົນ ແລະ ຢູ່ຊີເຣຍ 3.162 ຄົນ.

ຂະນະດຽວກັນ, ສໍານັກຂ່າວຣອຍເຕີລາຍງານວ່າ: ປະທານາທິບໍດີ ເຣເຊບ ຕໍຢິບ ເອີໂດກັນ ຜູ້ນໍາຕວກກີ ຍອມຮັບວ່າລັດຖະບານມີບັນຫາດ້ານການຕອບສະໜອງໃນເບື້ອງຕົ້ນຕໍ່ເຫດແຜ່ນດິນໄຫວດັ່ງກ່າວ.

ໃນປີຜ່ານມາ, ປະທານາທິບໍດີ ໄຊ ຜູ້ມີເງິນເດືອນປະມານ 400.000 ໂດລາໄຕ້ຫວັນ (13.300 ໂດລາສະຫະລັດ) ຮ່ວມກັບຮອງປະທານາທິບໍດີ ໄລ່ ເຊິ່ງມີທ່າອ່ຽງຈະລົງສະໝັກຊີງຕໍາແໜ່ງປະທານາທິບໍດີໄຕ້ຫວັນໃນການເລືອກຕັ້ງປີໜ້າ ໄດ້ບໍລິຈາກລາຍໄດ້ 1 ເດືອນຂອງຕົນເພື່ອໃຫ້ການຊ່ວຍເຫລືອທາງມະນຸດສະທໍາຕໍ່ອູແກຣນ.