ການນຳໃຊ້ລົດ 3 ລໍ້ມໍເຕີໄຟຟ້າ ຍັງບໍ່ມີຄວາມເປັນລະບຽບຮຽບຮ້ອຍ ແລະ ບໍ່ສະເໝີພາບຕໍ່ລະບຽບຫລັກການ
ປັດຈຸບັນ ປາກົດມີລົດ 3 ລໍ້ຕິດມໍເຕີ ໄຟຟ້າທີ່ນຳໃຊ້ບັນທຸກຂົນເຄື່ອງຂອງຕ່າງໆເຄື່ອນຍ້າຍໄປ-ມາ ນັບມື້ເພີ່ມຂຶ້ນ, ໂດຍສະເພາະຢູ່ເມືອງຈັນທະບູລີ ແລະ ສີໂຄດຕະບອງ ເຂດບ້ານໜອງດ້ວງ, ເຕ້ 2, ທົ່ງຂັນຄຳ ແລະ ທົ່ງຕູມ ເຊິ່ງມີຊາວຄ້າຂາຍຕ່າງປະເທດອາໄສຢູ່ເປັນຈຳນວນຫລາຍ.
ລົດ 3 ລໍ້ ຕິດມໍເຕີ ເປັນລົດປະເພດໜຶ່ງ ທີ່ສາມາດຂັບຂີ່ຕາມຖະໜົນຫົນທາງຕາມລະບຽບກົດໝາຍ ແຕ່ບໍ່ຖືກຳນົດໃນລະບຽບ ເລື່ອງເອກະສານ ເປັນຕົ້ນແມ່ນ ເອກະສານເຕັກນິກ, ເສຍຄ່າທາງ ແລະ ຄາດວ່າ ຕ້ອງແລ່ນຢູ່ໃນຂອບເຂດທີ່ບໍ່ເປັນຊຸມຊົນ ຫລື ທາງຫລວງ ແລະ ຖືກຕາມລະບຽບຈະລາຈອນ.
ແຕ່ໃນຄວາມເປັນຈິງແລ້ວ ປາກົດເຫັນການນຳໃຊ້ລົດດັ່ງກ່າວ ແລ່ນຕາມຖະໜົນຫົນທາງ ແລະ ເສັ້ນທາງຫລວງຢ່າງແພ່ຫລາຍ ເຊິ່ງຜູ້ຂັບຂີ່ສ່ວນຫລາຍ ຍັງບໍ່ໄດ້ປະຕິບັດກົດຈະບຽບຈະລາຈອນເຂັ້ມງວດ, ເປັນຕົ້ນແມ່ນຂົນສົ່ງເຄື່ອງເຕັມ, ອອກທາງຮ່ອມບໍ່ລະມັດລະວັງ ທັງໝົດນັ້ນລ້ວນແຕ່ສ່ຽງຕໍ່ການເກີດອຸບັດຕິເຫດອີກດ້ວຍ.
ຈາກກໍລະນີທີ່ກ່າວມາປະຊາຊົນສ່ອງແສງ ແລະຖາມເຖິງລະບຽບສະເພາະຂອງການການນຳໃຊ້-ຄຸ້ມຄອງພະຫະນະ ປະເພດລົດ 3 ລໍ້ຕິດມໍເຕີ ເປັນຕົ້ນແມ່ນລະບຽບເສຍຄ່າທາງ, ການກວດກາເຕັກນິກ, ກຳນົດຊ່ອງທາງຈະລາຈອນ ແລະ ຂອບເຂດການໄປມາ ທັງນີ້ກໍເພື່ອຄວາມເປັນສະເໝີພາບຕໍ່ລະບຽບຫລັກການ ແລະ ຄວາມເປັນລະບຽບຮຽບຮ້ອຍບົນທ້ອງຖະໜົນ.
ເຖິງແນວໃດກໍຕາມຂໍໃຫ້ພາກສ່ວນຮັບຜິດຊອບ ຫລື ພາກສ່ວນກ່ຽວຂ້ອງເອົາໃຈໃສ່ໃນການຄຸ້ມຄອງ ຫລື ແກ້ໄຂ ການນຳໃຊ້ລົດດັ່ງກ່າວໃຫ້ຖືກຕ້ອງຕາມລະບຽບການ.
