ໄຟໄໝ້ປ່າຢູ່ຊິລີລຸກລາມໜັກ ເສຍຊີວິດແລ້ວຢ່າງໜ້ອຍ 24 ຄົນ ບາດເຈັບອີກເກືອບ 1 ພັນຄົນ

ນັກມອດໄຟ ແລະ ເຈົ້າໜ້າທີ່ໜ່ວຍກູ້ໄພຊິລີເລັ່ງຄວບຄຸມໄຟ ແລະ ຊ່ວຍເຫລືອຜູ້ປະສົບໄພຢ່າງຮີບດ່ວນ ຫລັງໄຟໄໝ້ປ່າຊິລີລຸກລາມຢ່າງໜັກໃນວັນທີ 5 ກຸມພາ ເຮັດໃຫ້ມີຜູ້ເສຍຊີວິດແລ້ວຢ່າງໜ້ອຍ 24 ຄົນ ແລະ ໄດ້ຮັບບາດເຈັບອີກເກືອບ 1 ພັນຄົນ ຖືເປັນເຫດໄພພິບັດທາງທໍາມະຊາດຮຸນແຮງທີ່ສຸດໃນຮອບຫລາຍປີຂອງຊິລີ.

ບັນດາປະເທດໃກ້ຄຽງ ແລະ ໜ່ວຍງານສາກົນເລີ່ມສົ່ງມອບການຊ່ວຍເຫລືອໃຫ້ທາງການຊິລີແລ້ວ ບໍ່ວ່າຈະເປັນອຸປະກອນຊ່ວຍເຫລືອທີ່ຈໍາເປັນ, ເຮືອບິນ ແລະ ທີມນັກມອດໄຟຜູ້ມີປະສົບການ ໂດຍໄຟໄໝ້ປ່າຈຸດຮຸນແຮງທີ່ສຸດໄດ້ເຜົາທໍາລາຍປ່າ ແລະ ເນື້ອທີ່ກະສິກໍາບໍລິເວນຕອນກາງຂອງຊິລີໄດ້ຮັບຄວາມເສຍຫາຍຢ່າງໜັກ.

ທ່ານ ກາເບຣຽວ ບໍຣິກ ປະທານາທິບໍດີຊິລີ ໄດ້ປະກາດສະຖານະການສຸກເສີນບໍລິເວນທີ່ໄຟໄໝ້ປ່າລຸກລາມຮຸນແຮງແລ້ວ ໄດ້ແກ່ ແຄວ້ນບິໂອບິໂອ, ແຄວ້ນນູເບລ ແລະ ແຄວ້ນອາເຮົາການີອາ ເພື່ອໃຫ້ການຊ່ວຍເຫລືອສົ່ງກົງເຖິງພື້ນທີ່ປະສົບໄພໄດ້ໄວຂຶ້ນ ໂດຍທ່ານ ບໍຣິກ ເຊື່ອວ່າ: ຄວາມຢືດຢຸ່ນ ແລະ ຄວາມພ້ອມຮັບມືຕໍ່ສະຖານະການວິກິດຂອງປະຊາຊົນຊິລີ ຈະມີສ່ວນສໍາຄັນທີ່ຊ່ວຍໃຫ້ຊິລີກ້າວຂ້າມໄລຍະເວລາທີ່ຍາກລໍາບາກເຊັ່ນນີ້ໄປໄດ້.

ໄຟໄໝ້ປ່າທີ່ລຸກລາມຢ່າງໜັກ ເປັນຜົນມາຈາກຄື້ນຄວາມຮ້ອນທີ່ແຜ່ປົກຄຸມຫລາຍປະເທດໃນເຂດອາເມລິກາໃຕ້. ຂະນະທີ່ອຸນຫະພູມສະເລ່ຍໃນບາງພື້ນທີ່ວັດແທກໄດ້ສູງເຖິງ 40 ອົງສາ ໂດຍທາງການຊິລີເຜີຍກວດພົບໄຟໄໝ້ປ່າຫລາຍກວ່າ 260 ຈຸດ ໃນຫລາຍແຄວ້ນທົ່ວຊິລີ ແລະ ໄດ້ຈູດທໍາລາຍເນື້ອທີ່ໄປແລ້ວ 2,7 ແສນເຮັກຕາ.

ໂດຍທາງການຊິລີປະກາດຂໍການຊ່ວຍເຫລືອຈາກສາກົນ ເພື່ອຮັບມືວິກິດໄຟໄໝ້ປ່າຄັ້ງນີ້ ຫລັງຈາກທີ່ມີໄຟໄໝ້ປ່າເກີດຂຶ້ນໃໝ່ໃນທຸກໆວັນ ສ່ວນຫລາຍເປັນການຊ່ວຍເຫລືອຈາກປະເທດໃກ້ຄຽງໃນອາເມລິກາລາຕິນເຊັ່ນ: ເບຣຊິນ, ໂກລົມບີ, ເອກົວດໍ, ປາຣາໄກວ, ອາເຈນຕິນາ, ເມັກຊິກ, ເປຣູ ແລະ ເວເນຊູເອລາ.

ອ້າງອີງ:

https://www.reuters.com/…/least-24-dead-chile…/

https://www.abc.net.au/…/at-least-24-dead-in…/101934136

https://www.theguardian.com/…/chile-wildfires-kill-at…