ຊີເກມທີ່ຝັງໃຈ

ໂດຍ: ທິດ​ກໍ່າ

ງານມະຫາກໍາກິລາຊີເກມຄັ້ງທີ 29 ທີ່ມາເລເຊຍເປັນເຈົ້າພາບໄດ້ປິດສາກລົງຢ່າງຍິ່ງໃຫຍ່ອາລັງການໃນວັນທີ 30 ສິງຫາຜ່ານ ມາ ຖືວ່າເປັນພາລະກິດ ແລະ ບຸນປາງໃຫຍ່ຂອງປະຊາຄົມອາຊຽນ ​ເຊິ່ງມີ 11 ປະເທດໃນອາຊີຕາເວັນອອກສຽງໃຕ້ເຂົ້າຮ່ວມ.

ໃນງານມະຫາກໍາກິລາຊີເກມຄັ້ງນີ້, ສໍາລັບ ສປປ ລາວ ໄດ້ຫລຽນນໍາໝູ່ຄື: 2 ຫລຽນຄໍາ, 3 ຫລຽນເງິນ ແລະ 21 ຫລຽນທອງ ຈັດຢູ່ ອັນດັບ 9 ໃນຕາຕະລາງແຂ່ງຂັນ, ກໍຖືວ່າເປັນນາຍທ້າຍທີ່ດີໃຫ້ປະເທດອ້ອມຂ້າງເຂົາພາກັນຊ່ວງເສັງຍາດເອົາຫລຽນໄດ້ຜູ້ຫລາຍ ຜູ້ໜ້ອຍ. ປະເທດທີ່ໄດ້ຫລາຍກວ່າໝູ່ແມ່ນມາເລເຊຍທີ່ເປັນເຈົ້າພາບ. ອີກຕໍ່ໄປ​ໃນ​ປີ 2019 (ຄັ້ງທີ 30) ກໍຈະແມ່ນຟີລິບປີນເປັນ ເຈົ້າພາບ ໂດຍໝູນວຽນໄປຕາມຕົວອັກສອນ ແລະ ອີກຄັ້ງຕໍ່ໄປກໍອາດຈະແມ່ນໄທລາມໃສ່ຫວຽດນາມ. ສ່ວນວ່າລາວເຮົາແມ່ນຍັງ ຫລາຍປີຈຶ່ງຈະໝູນວຽນມາເຖິງ. ແຕ່ແນວໃດກໍຕາມ, ທິດກໍ່າວ່າເມື່ອໃດທີ່ລາວເຮົາໄດ້ເປັນເຈົ້າພາບຄັ້ງໜ້າກໍອາດຈະໄດ້ຫລຽນປະ ເພດຕ່າງໆລື່ນຄັ້ງ 29 ທີ່ຫາກໍຈົບລົງສົດໆຮ້ອນໆນີ້.

ຄືດັ່ງພວກເຮົາຮູ້ນໍາກັນແລ້ວວ່າ, ງານມະຫາກໍາຊີເກມແມ່ນພາລະກິດອັນຍິ່ງໃຫຍ່ໃນການເຊື່ອມສໍາພັນທະໄມຕີ, ຄວາມສາ ມັກຄີອັນແໜ້ນແກ່ນຂອງປະຊາຊົນບັນດາເຜົ່າໃນຂົງເຂດອາຊີຕາເວັນອອກສຽງໃຕ້. ນັບແຕ່ກຸ່ມອາຊຽນໄດ້ກໍາເນີດເກີດຂຶ້ນຈົນ ພັດທະນາກາຍມາເປັນປະຊາຄົມອາຊຽນ ແລະ ພວມກ້າວເດີນໄປຕາມເສັ້ນທາງສາມເສົາຄໍ້າຢ່າງໜັກແໜ້ນ, ໄດ້ເຮັດໃຫ້ການ ເຊື່ອມໂຍງ ແລະ ເຊື່ອມຈອດກາຍເປັນປັດ​ໄຈແຫ່ງຂະບວນວິວັດໃນການພັດທະນາເສດຖະກິດ-ສັງຄົມຂອງອາຊຽນນັບມື້ເຂັ້ມ ແຂງຂຶ້ນເທື່ອລະກ້າວ. ອັນສໍາຄັນກ່ອນອື່ນໝົດແມ່ນໄດ້ເຮັດໃຫ້ອາຊຽນກາຍເປັນຄອບຄົວໃຫຍ່ທີ່ຢູ່ຮ່ວມກັນຢ່າງສັນຕິ, ເຮັດໃຫ້ ພາກພື້ນມີສັນຕິພາບ, ສະຖຽນລະພາບ ແລະ ມີຄວາມໝັ້ນຄົງນັບມື້ໜັກແໜ້ນເຂັ້ມແຂງ ແລະ ມີຄວາມແຂງແກ່ນທາງດ້ານ ທັກສະຄວາມສາມາດໃນການພັດທະນາວົງການກິລາ ແລະ ຍັງກາຍເປັນປັດ​ໄຈໜຶ່ງທີ່ສະແດງໃຫ້ເຫັນຄວາມຈະເລີນຮັ່ງມີທາງ ດ້ານເສດຖະກິດ-ສັງຄົມຂອງຊາດໜຶ່ງໆ ນັບທັງຄວາມກ້າວໜ້າໃນການພັດທະນາປະເທດ. ເພາະສະນັ້ນ, ຈຶ່ງເວົ້າໄດ້ວ່າຜູ້ໃດເກັ່ງ ກວ່າກໍແມ່ນຜູ້ຊະນະ. ການແຂ່ງຂັນກິລາລະຫວ່າງປະເທດປຽບເໝືອນການສູ້ຮົບເພື່ອຍາດແຍ່ງເອົາທຸກໄຊຊະນະມາຢູ່ໃນກໍາມື, ໃຜຈະໄດ້ ຫລື ເສຍແມ່ນຂຶ້ນກັບເກມເຕັກນິກ, ຍຸດທະວິທີ, ສິລະປະຍຸດ ແລະ ດ້ວຍວິທີການຕ່າງໆ ອາດຜິດແດ່ຖືກແດ່ຂໍພຽງແຕ່ ໄດ້ຮັບໄຊຊະນະ, ຜູ້ທີ່ຊະນະກໍມີຄວາມດີໃຈເບີກບານມ່ວນຊື່ນ, ສ່ວນຜູ້ທີ່ເສຍໄຊກໍມີຄວາມໂສກເສົ້າເສຍໃຈ ທັງກັ້ນນໍ້າຕາໃຫ້ກາຍ ເປັນມົນຂັງຝັງໃຈໃນຊີວິດ, ດ້ວຍຄວາມຫວັງ ແລະ ໄຊຊະນະມາໃຫ້ຕົນເອງ ແລະ ປະເທດຊາດ ບໍ່ວ່າປະເທດໃດກໍໄດ້ທຸ້ມເທແຮງ ຊັບ, ແຮງໃຈ, ແຮງກາຍ, ແຮງສະຕິປັນຍາເພື່ອຍາດເອົາໄຊຊະນະມາສູ່ຕົນເອງ ແລະ ປະເທດ ຊາດ. ນີ້ຄືເປົ້າໝາຍຂອງເຫລົ່າທັບ ນັກກິລາ ​ເຊິ່ງໃຜກໍໄຝ່ຝັນຫາຄວາມຍິ່ງໃຫຍ່, ແຕ່ທຸກສິ່ງຢ່າງທີ່ພິສູດອອກມາຢ່າງມີກຽດ ແລະ ສັກສີນີ້ຄືຫລຽນຫ້ອຍຄໍ.

ຕາມທິດກໍ່າວ່າ, ງານກິລາຊີເກມຄັ້ງທີ 29 ໄດ້ຈົບລົງ ແລະ ອໍາລາພວກເຮົາໄປແລ້ວ, ສິ່ງທີ່ເຫລືອກໍຄືຄວາມຊົງຈໍາ ແລະ ບັນດາ ຫລຽນຄໍາ, ຫລຽນເງິນ, ຫລຽນທອງ ອັນຊົງຄຸນຄ່າໃນຊີວິດບັ້ນໜຶ່ງທີ່ເກີດມາເປັນຄົນໄດ້ສ້າງຊື່ສຽງໃຫ້ຕົນເອງ ແລະ ປະເທດຊາດ, ຜູ້ທີ່ເສຍໄຊກໍຈົນ​ຫລັ່ງນໍ້າຕາທີ່ຝັງໃນດວງໃຈຈົນກວ່າມັນຈະເຫືອດຫາຍໄປຕາມການເວລາ ແລະ ມະຫາກໍາກິລາຊີເກມຈະປາກົດ ຕົວທີ່ນະຄອນຫລວງມະນິລາ ປະເທດຟີລິບປິນ ໃນປີ 2019 ຖ້າໃຜຢາກໄດ້ຫລຽນມາຫ້ອຍຄໍຕ້ອງໄດ້ເລີ່ມ​ເຝິກແອບໃຫ້ກາຍ​ເປັນ ອັດສະວິນທີ່ເກັ່ງນັບແຕ່ເວລານີ້ໄປ ເພາະວ່າບັນດາຫລຽນຄໍາ, ຫລຽນເງິນ ແລະ ຫລຽນທອງ ມັນບໍ່ໄດ້ຢູ່ໃກ້ເອື້ອມຄືຄິດ, ແຕ່ຂໍພຽງ ໃຈເຮົາເຖິງກໍສາມາດໄຂ່ວຄວ້າມາຄອງໄດ້ ​ແລະ ຫລີກ​ເວັ້ນປະໂຫຍກຄໍາວ່າ: “ຖອດຖອນບົດຮຽນ” ຢູ່ຕະຫລອດ ເພາະມັນລ້າສະ ໄໝແລ້ວ.