ໃນຍາມຝົນຕົກນ້ຳຖ້ວມຕ້ອງລະວັງພະຍາດຕາ

ໃນຍາມຝົນ ແລະ ຍາມນຳ້ຖ້ວມນີ້ອາດມີເຊື້ອພະຍາດທີ່ເຮັດໃຫ້ດວງຕາຕິດເຊື້ອໄດ້ ຈຶ່ງເປັນໄລຍະທີ່ຄວນເຝົ້າລະວັງເປັນພິເສດ ເພາະເຊື້ອພະຍາດເຫລົ່ານີ້ຈະປົນເປື້ອນຢູ່ໃນແຫ່ລງນຳ້ຕ່າງໆ ໂດຍສະເພາະແມ່ນນຳ້ທີ່ຖ້ວມຂຶ້ນມາ ຫາກບໍ່ຢາກຕິດເຊື້ອຄວນປະຕິບັດຕາມຄຳແນະນຳດັ່ງຕໍ່ໄປນີ້ :

1. ສັງເກດຄວາມຜິດປົກກະຕິຂອງດວງຕາ ບໍ່ວ່າຈະເປັນຕາແດງ, ລະຄາຍເຄືອງ, ປວດອ້ອມດວງຕາ, ແພ້ແສງ ຫລື ແສບຕາ, ການເບິ່ງເຫັນຫລຸດລົງ ຫລື ມົວລົງ, ນຳ້ຕາໄຫລ ຫລື ມີຂີ້ຕາຫລາຍຜິດປົກກະຕິ ເຫລົ່ານີ້ຄວນໄປໂຮງໝໍປົວຕາໂດຍໄວທີ່ສຸດ.
2. ບໍ່ຄວນຊື້ຢາຢອດຕາມາປິ່ນປົວເອງໃນກໍລະນີທີ່ດວງຕາຕິດເຊື້ອ ເພາະຢາຢອດຕາບໍ່ສາມາດປິ່ນປົວພະຍາດຕາໄດ້ທຸກຊະນິດ, ບາງເທື່ອອາດເກີດຜົນຮ້າຍ ແລະ ຜົນຂ້າງຄຽງຂອງຢາຢອດຕາບາງຊະນິດນຳອີກ ຄວນປຶກສາທ່ານໝໍກ່ອນດີກ່ວາ.
3. ຫາກມີນຳ້ເປື້ອນຟົ້ງເຂົ້າຕາຄວນລ້າງຕາດ້ວຍນຳ້ສະອາດ, ນຳ້ຢາລ້າງຕາ ຫລື ນຳ້ຢາລ້າງຄອນແທັກເລນທີ່ໄດ້ມາດຕະຖານ ບໍ່ຄວນໃຊ້ນຳ້ປະປາລ້າງ ໂດຍສະເພາະແມ່ນນຳ້ປະປາທີ່ມີບັນຫາຂອງຄຸນນະພາບນຳ້.
4. ທຸກຄົນສາມາດມີບັນຫາພະຍາດຕາຕິດເຊື້ອໄດ້ໝົດ ຈະພົບຫລາຍໃນກຸ່ມທີ່ໃສ່ຄອນແທັກເລນ ຫລື ຜູ້ທີ່ຜ່ານການຜ່າຕັດດວງຕາຕ່າງໆຄວນລະວັງເປັນພິເສດ.
5. ຜູ້ທີ່ມີບັນຫາຄວາມຜິດປົກກະຕິ ຄວນມີແວ່ນຕາສຳຮອງໄວ້ສະເໝີໃນກໍລະນີທີ່ບໍ່ສະດວກໃນການໃສ່ຄອນແທັກເລນ.
6. ສຳຫລັບຜູ້ທີ່ໃສ່ຄອນແທັກເລນ ຄວນຫລີກເວັ້ນການສຳຜັດກັບນຳ້ທີ່ຖ້ວມ ຫລື ຫາກຫລີກເວັ້ນບໍ່ໄດ້ຄວນຢຸດການໃສ່ຄອນແທັກເລນໄປກ່ອນ, ແຕ່ຫາກຫລີກເວັ້ນບໍ່ໄດ້ຄວນໃສ່ແວ່ນຕາປ້ອງກັນນຳ້ເປື້ອນຟົ້ງເຂົ້າຕາ ບໍ່ຄວນໃຊ້ນຳ້ປະປາໃນການລ້າງ ຫລື ເກັບມ້ຽນຄອນແທັກເລນ, ລ້າງມືໃຫ້ສະອາດກ່ອນສຳຜັດດວງຕາ ແລະ ຄອນແທັກເລນ, ຄວນໃຊ້ນຳ້ຢາເຮັດຄວາມສະອາດ ຫລື ຂ້າເຊື້ອຄອນແທັກເລນໂດຍສະເພາະ ໄປຈົນເຖິງຢາຢອດຕາຕ່າງໆທີ່ໄດ້ມາດຕະຖານ ແລະ ຄວນສຶກສາວິທີການໃສ່ ແລະ ເຮັດຄວາມສະອາດຄອນແທັກເລນຢ່າງຖືກວິທີກ່ອນຊື້ຫາມາໃຊ້.