G7 ຕົກລົງຂະຫຍາຍມາດຕະການຂວໍ້າບາດອຸດສາຫະກໍານໍ້າມັນຣັດເຊຍ

ອາເມລິກາ ແລະ ປະເທດພັນທະມິດ ເຫັນພ້ອມຈໍາກັດເພດານລາຄາຜະລິດຕະພັນປິໂຕຣລຽມເກຣດພຣີມຽມຂອງຣັດເຊຍເຊັ່ນ: ນໍ້າມັນແອັດຊັງຢູ່ລະດັບ 100 ໂດລາຕໍ່ບາເຣລ ແລະ ຈໍາກັດເພດານລາຄາຜະລິດຕະພັນນໍ້າມັນມູນຄ່າຕໍ່າເຊັ່ນ: ນໍ້າມັນເຕົາ ຢູ່ລະດັບ 45 ໂດລາຕໍ່ບາເຣລ.

ການເຄື່ອນໄຫວດັ່ງກ່າວຖືເປັນການຂະຫຍາຍມາດຕະການຂວໍ້າບາດຕໍ່ອຸດສາຫະກໍານໍ້າມັນຂອງຣັດເຊຍ ຫລັງຈາກກ່ອນໜ້ານີ້ໃນທ້າຍປີຜ່ານມາ ທາງກຸ່ມ G7 ມີມະຕິຈໍາກັດເພດານລາຄານໍ້າມັນດິບຣັດເຊຍໄວ້ໃນລະດັບ 60 ໂດລາຕໍ່ບາເຣລ ໂດຍມີເປົ້າໝາຍເພື່ອຄວບຄຸມລາຄານໍ້າມັນຂອງຣັດເຊຍໃນຕະຫລາດໂລກໃຫ້ຄົງທີ່. ຂະນະດຽວກັນກໍຫລຸດລາຍໄດ້ຂອງເກຣມລິນເພື່ອຕອບໂຕ້ການຮຸກຮານອູແກຣນ.

ການຈໍາກັດເພດານລາຄາຜະລິດຕະພັນນໍ້າມັນຂອງຣັດເຊຍຫລ້າສຸດນີ້ຈະເລີ່ມມີຜົນບັງຄັບໃຊ້ໃນວັນທີ 5 ກຸມພາ ເຊິ່ງເປັນມື້ດຽວທີ່ສະຫະພາບເອີຣົບ (EU) ຫ້າມນໍາເຂົ້າຜະລິດຕະພັນຂອງຣັດເຊຍເຂົ້າມາໃນກຸ່ມປະເທດສະມາຊິກ.

ທັງນີ້, ກຸ່ມປະເທດອຸດສາຫະກໍາຊັ້ນນໍາ 7 ປະເທດ ຮ່ວມກັບອົດສະຕຣາລີ ປະກາດເພດານລາຄາໃໝ່ໃນວັນທີ 3 ກຸມພາຜ່ານມາ ບໍ່ເທົ່າໃດຊົ່ວໂມງຫລັງສະຫະພາບເອີຣົບບັນລຸຂໍ້ຕົກລົງກ່ຽວກັບການລົງໂທດຄັ້ງໃໝ່ຕໍ່ຣັດເຊຍ.