ສະໂມສອນມາສເຕີ ເຊເວັ້ນ ໄດ້ແຕ່ງຕັ້ງ ທ່ານ ວຸດທິວັດ ແດງສະເໝີກຽດ ເປັນຄູຝຶກທີມຄົນໃຫມ່
ສະໂມສອນບານເຕະ ມາສເຕິ ເຊເວັ້ນ ເອຟຊີ( MASTER 7 FC) ໄດ້ແຕ່ງຕັ້ງຄູຝຶກທີມຄົນໃໝ່, ເຊິ່ງພິທີຖະແຫລງຂ່າວເປີດຕົວຢ່າງເປັນທາງການໄດ້ຈັດຂຶ້ນໃນຕອນແລງຂອງວັນທີ 3 ກຸມພາ 2023 ທີ່ ຫ້ອງການສະໂມສອນ ມາສເຕິ ເຊເວັ້ນ ບ້ານດົງຄໍາຊ້າງ ເມືອງຫາດຊາຍຟອງ ນະຄອນຫລວງວຽງຈັນ, ໂດຍໃຫ້ກຽດເຂົ້າຮ່ວມຂອງ ທ່ານ ບຸນຖະໜອມ ສີຫາລາດ ຮອງປະທານສະໂມສອນ.
ພາຍຫລັງແນະນໍາ ທ່ານ ວຸດທິວັດ ແດງສະເໝີກຽດ (Voottivat DAENGSAMERKIAT ) ສັນຊາດໄທໄດ້ຮັບການແຕ່ງຕັ້ງ ເປັນຫົວໜ້າຄູຝຶກຄົນໃໝ່ຂອງສະໂມສອນ, ທ່ານ ບຸນຖະໜອມ ສີຫາລາດ ໄດ້ລາຍງານເຖິງຄວາມພ້ອມຂອງທີມໃນການເຂົ້າຮ່ວມການແຂ່ງຂັນບານເຕະເປບຊີ ລາວລີກ 1 ປະຈຳປີ 2023 ວ່າ: ” ມາສເຕີ ເຊເວັ້ນ ໄດ້ດຶງຄູຝຶກ ທີ່ມີປະສົບການສູງ ແລະ ມີຜົນສໍາເລັດໃນວົງການບານເຕະໄທ ມາຊ່ວຍໃນການພັດທະນາວົງການບານເຕະລາວ ໃຫ້ດີຍິ່ງຂຶ້ນ ໂດຍສະເພາະແມ່ນນັກກິລາ ສະໂມສອນ ທີ່ເນັ້ນການພັດທະນາບານເຕະເຍົາວະຊົນ, ສ່ວນການເສີມນັກກິລາແມ່ນໄດ້ດຶງນັກກິລາທີມຊາດລາວ ຈຳນວນຫນຶ່ງມາຮ່ວມທີມ ແລະ ໄດ້ປ່ອຍນັກເຕະກຳລັງຫລັກບາງຕຳແຫນ່ງໃຫ້ກັບສະໂມສອນອື່ນ. ສ່ວນແຜນກອງເຊຍຂອງ ສະໂມສອນ ໃນປີນີ້ແມ່ນໄດ້ເພີ່ມອຸປະກອນໃນການເຊຍເພື່ອໃຫ້ມີສີສັນ ໂດຍມີການສະແດງຫລາຍຂຶ້ນບໍ່ວ່າຈະເປັນການສະແດງພື້ນເມືອງ ແລະ ສາກົນ ເພື່ອໃຫ້ມີສີສັນກວ່າເກົ່າ”.
ຂະນະທີ່ ທ່ານ ວຸດທິວັດ ແດງສະເໝີກຽດ ໄດ້ກ່າວວ່າ: ” ສໍາລັບປະສົບການຂອງຕົນເອງແມ່ນເຄີຍຕິດທີມຊາດໄທ, ເຄີຍຄຸມທີມຊາດໄທ ໃນຮຸ່ນເຍົາວະຊົນ ແລະ ເຄີຍຫລິ້ນໃຫ້ສະໂມສອນໃນລີກສູງສຸດຂອງປະເທດໄທ, ການເລືອກມາຄຸມ ສະໂມສອນ ມາສເຕີ ເຊເວັ້ນ ກໍ່ຢູ່ໃນເສັ້ນທາງ ແລະ ແນວຄິດ ລວມເຖິງຍຸດທະສາດໃນທາງດຽວກັນ ໂດຍສະເພາະແມ່ນການພັດທະນານັກເຕະເຍົາວະຊົນ, ພັດທະນາທີມ ແລະ ພັດທະນາວົງການບານເຕະລາວ, ເປົ້າຫມາຍແມ່ນຢາກຄວ້າແຊ້ມ ”.
