ມາຊິຢາລ-ເຟຣັດ ຄົນລະປະຕູ ແມນຢູ ຖະຫລົ່ມ ຟໍເຣສ ລວມ 5-0 ເຂົ້າຊີງ ລີກຄັບ ກັບ ນິວຄາສເຊິນ
ເຂົ້າຊີງ ຄາຣາບາວ ຄັບ ໄປຕາມຄາດສຳລັບ ແມນເຊັສເຕີ ຢູໄນເຕັດ ຫລັງເປີດບ້ານເອົາຊະນະ ນອດຕິງແຮມ ຟໍເຣສ 2-0 ໃນນັດທີ 2 ຮອບຮອງຊະນະເລີດນັດທີສອງ ໃນຄືນວັນທີ 1 ກຸມພາ ທີ່ຜ່ານມາ.
ນັດທີ 2 ທີ່ ໂອແທຣັບຟອດ ທັບ “ເຈົ້າປ່າ” ທີ່ເສຍກ່ອນ 0-3 ໃນເກມທໍາອິດ, ເປີດເກມບຸກໃສ່ທີມເຈົ້າບ້ານຢ່າງບໍ່ຢ້ານ ແຕ່ກໍ່ບໍ່ສາມາດຍິງປະຕູໄດ້ ຈົນມາເຖິງເຄິ່ງເວລາທີສອງ ເມື່ອ “ຜີສາດແດງ” ສົ່ງອາວຸດໜັກຄື ມາຄັສ ແຣສຟອດ, ຈາດອນ ຊານໂຊ ແລະ ອອງໂຕນີ ມາຊີຢາລ ລົງສະໜາມ ເກມຂອງທີມເຈົ້າບ້ານດີຂຶ້ນທັນທີ.
ແລະ ມາເຖິງນາທີ 73 ແມນເຊັສເຕີ ຢູໄນເຕັດ ໄດ້ປະຕູຂຶ້ນນຳ 1-0 ຈາກການຍິງຊ້ຳຂອງ ອອງໂຕນີ ມາຊີຢາລ, ຕາມດ້ວຍ ເຟຣັດ ໃນນາທີ 76 ໄລ່ເພີ່ມອີກ 2-0 ຈົບເກມ ລວມ 2 ເກມ ທີມຂອງ ເອຣິກ ເທນຮາກ ຊະນະ 5-0 ເຂົ້າໄປຊີງແຊ້ມລາງວັນທໍາອິດໃນຮອບ 6 ປີ.
ສໍາລັບການແຂ່ງຂັນນັດຊີງຊະນະເລີດ ຄາຣາບາວ ຄັບ ແມນເຊັສເຕີ ຢູໄນເຕັດ ພົບ ນິວຄາສເຊິນ ຢູໄນເຕັດ ທີ່ຕັ້ງເປົ້າຄວ້າແຊ້ມຄັ້ງນີ້ເປັນຄັ້ງທໍາອິດເຊັ່ນກັນ. ທັງສອງທີມຈະແຂ່ງຂັນກັນໃນວັນທີ 26 ກຸມພາ ທີ່ສະໜາມກິລາ ເວມບຣີ.
