ນະຄອນຫລວງວຽງຈັນ ເນັ້ນສົ່ງເສີມອຸດສາຫະກຳປຸງແຕ່ງ ແລະ ຫັດຖະກຳ ເພື່ອເປົ້າໝາຍເສດຖະກິດຂະຫຍາຍຕົວ

ທ່ານ ອາດສະພັງທອງ ສີພັນດອນ ເຈົ້າຄອງ ນວ ລາຍງານ ໃນກອງປະຊຸມສະໄໝສາມັນ ເທື່ອທີ 4 ຂອງສະພາປະຊາຊົນ ນວ ຊຸດທີ II ໃນເດືອນມັງກອນ 2023 ຜ່ານມານີ້ວ່າ: ປີ 2022 ຜ່ານມານີ້, ເສດຖະກິດ ຂອງນະຄອນຫລວງວຽງຈັນ ຂະຫຍາຍຕົວໃນລະດັບ 4,83% (ດັດແກ້ 4,36%, ສູ້ຊົນ 6,5%), ລວມຍອດຜະລິດຕະພັນພາຍໃນ ບັນລຸໄດ້ 62.243,93 ຕື້ກີບ (ດັດແກ້ 58.412,26 ຕື້ກີບ, ຄາດໝາຍສູ້ຊົນ 63.076 ຕື້ກີບ), GDP ສະເລ່ຍຕໍ່ຫົວຄົນ 62,91 ລ້ານກີບ (ມະຕິສະພາດັດແກ້ 60,28 ລ້ານກີບ), ໃນນັ້ນ ກະສິກຳ ເພີ່ມຂຶ້ນ 3,91% ກວມເອົາ 13,77% ຂອງ GDP, ອຸດສາຫະກຳເພີ່ມຂຶ້ນ 6,54% ກວມເອົາ 49,05% ຂອງ GDP, ບໍລິການ ເພີ່ມຂຶ້ນ 2,52% ກວມເອົາ 36,36% ຂອງ GDP.

ເພື່ອເຮັດໃຫ້ເສດຖະກິດຂອງ ນວ ຂະຫຍາຍຕົວຢ່າງຕໍ່ເນື່ອງ ໃນປີ 2023 ນີ້,  ຈະເລັ່ງແກ້ໄຂ ຂອດຂັ້ນ ແລະ ສິ່ງກີດຂວາງຕ່າງໆ, ເພື່ອສ້າງສະພາບແວດລ້ອມດຶງດູດການລົງທຶນ, ຄົ້ນຄວ້າ, ກຳນົດບັນຊີໂຄງການທີ່ເປັນບູລິມະສິດ ເພື່ອພັດທະນາໃນຮູບແບບການລົງທຶນຮ່ວມລະຫວ່າງພາກລັດ ແລະ ພາກເອກະຊົນ ໂດຍສອດຄ່ອງກັບແຜນຍຸດທະສາດການພັດທະນາ ຕາມແຜນພັດທະນາເສດຖະກິດ-ສັງຄົມ ແຫ່ງຊາດ ຫລື ແຜນຂອງຂະແໜງການ ແລະ ທ້ອງຖິ່ນ, ສືບຕໍ່ດຶງດູດການລົງທຶນເຂົ້າມາໃນເຂດເສດຖະກິດພິເສດ ຢູ່ນະຄອນຫລວງວຽງຈັນ.

ໃນປີ 2023 ນີ້, ນະຄອນຫລວງວຽງຈັນ (ນວ) ຈະເພີ່ມທະວີ ສົ່ງເສີມໃຫ້ໂຮງງານອຸດສາຫະກຳປຸງແຕ່ງ ແລະ ຫັດຖະກຳ ໃຫ້ຂະຫຍາຍຕົວຂຶ້ນຢ່າງຕໍ່ເນື່ອງ, ມູນຄ່າຜະລິດຕະພັນອຸດສາຫະກຳປຸງແຕ່ງ ຂະຫຍາຍຕົວບໍ່ໃຫ້ຫລຸດ 11,5%, ການຜະລິດຫັດຖະກຳບໍ່ໃຫ້ຫລຸດ 8%, ພ້ອມທັງ ຈະຊຸກຍູ້ການສ້າງລະບົບຈໍລະຈອນສິນຄ້າ ແລະ ເຂດໂລຈິສຕິກໃຫ້ເກີດຂຶ້ນ ເພື່ອຮອງຮັບໃຫ້ແກ່ການເກີດຂຶ້ນຂອງທາງລົດໄຟ ລາວ-ຈີນ. ພ້ອມນັ້ນ, ຍັງຈະເພີ່ມທະວີຈັດຕັ້ງປະຕິບັດແຜນງານ, ໂຄງການ, ໜ້າວຽກ ແລະ ກິດຈະກຳຂອງໂຄງການຄໍ້າປະກັນສະບຽງອາຫານ ແລະ ຜະລິດເປັນສິນຄ້າ, ການຜະລິດກະສິກຳສະອາດ ເພື່ອການຊົມໃຊ້ພາຍໃນ ຫລຸດຜ່ອນການນຳເຂົ້າ ແລະ ເປັນສິນຄ້າສົ່ງອອກ.