ປີ 2022 ດ່ານພາສີສາກົນຂົວມິດຕະພາບ III ສາມາດຈັດເກັບລາຍຮັບໄດ້ 422.323 ຕື້ກີບ ລື່ນແຜ່ນການວາງໄວ້

ແຫລ່ງຂ່າວຄຳມ່ວນລາຍງານວ່າ: ທ່ານ ນາງ ກິນນາລີ ທໍາມະວົງ ຮອງຫົວໜ້າດ່ານພາສີສາກົນຂົວມິດຕະພາບ III ໄດ້ກ່າວຕໍ່ກອງປະຊຸມສະຫລຸບວຽກງານປະຈໍາປີ 2022 ຂອງດ່ານສາກົນຂົວມິດຕະພາບ 3 ແຂວງຄຳມ່ວນວ່າ: ການຈັດເກັບລາຍຮັບປະຈໍາປີ 2022 ສາມາດຈັດເກັບລາຍຮັບໄດ້ 422.323 ຕື້ກີບເທົ່າກັບ 102,33% ຂອງແຜນການປີ (ຕົວເລກຕາມແຜນປີມອບໝາຍໃຫ້ ທັງໝົດ 412.700 ຕື້ກີບ), ຖ້າທຽບໃສ່ໄລຍະດຽວກັນຂອງປີຜ່ານມາແມ່ນເພີ່ມຂຶ້ນ 153,24 % ເທົ່າກັບ 146.730 ຕື້ກີບ. ມີພາຫະນະຂາເຂົ້າ 83.155 ຄັນ ເທົ່າກັບ 13.124 ຕື້ກວ່າກີບ, ພາຫະນະຂາອອກ 59.712 ຄັນ ເທົ່າກັບ 8.125 ຕື້ກວ່າກີບ, ຄ່າທໍານຽມຕູ້ລົດບັນທຸກຂາເຂົ້າ 20 ຟຸດ 40 ຟຸດ ຈໍານວນ 16.182 ຕູ້ ເທົ່າກັບ 484 ລ້ານກວ່າກີບ, ມູນຄ່າສິນຄ້າທີ່ຖືກຍົກເວັ້ນຄ່າຊັກພິເສດສົ່ງອອກປະຈໍາ 12 ເດືອນ ປີ 2022 ເທົ່າກັບ 147.920.607 ໂດລາສະຫະລັດ  ຫລື 2.067.546.542,700 ກີບ, ຄ່າພາສີ-ອາກອນນໍາເຂົ້າທີ່ຖືກຍົກເວັ້ນເທົ່າກັບ 63.375.908,500 ກີບ (ສິນຄ້າສ່ວນຫລາຍແມ່ນປະເພດເຄື່ອງອຸປະໂພກ-ບໍລິໂພກ, ເຄື່ອງກໍ່ສ້າງ ແລະ ເຄື່ອງໄຟຟ້າ).

ສ່ວນວ່າລາຍຮັບຈາກໝວດສິນຄ້າຕົ້ນຕໍທີ່ໄດ້ລື່ນແຜນປະກອບມີ: ປະເພດນໍ້າມັນເຊື້ອໄຟ ແລະ ອາຍແກັສ, ປະເພດນໍ້າມັນອື່ນໆ, ປະເພດພາຫະນະ, ສິນຄ້າປະເພດເຄື່ອງກໍ່ສ້າງ, ປະເພດສິນຄ້ານໍາເຂົ້າເພື່ອສົ່ງອອກຕໍ່, ສິນຄ້າປະເພດຊິ້ນສ່ວນອາໄຫລ່ ແລະ ຄ່າທໍານຽມຕ່າງໆ. ລາຍຮັບຈາກໝວດສິນຄ້າຕົ້ນຕໍທີ່ໄດ້ຫລຸດແຜນປະກອບມີ: ເຄື່ອງໃຊ້ໄຟຟ້າ ແລະ ເຄື່ອງອຸປະໂພກ-ບໍລິໂພກ.

ສຳລັບສິນຄ້ານໍາເຂົ້າເພື່ອສົ່ງອອກໃນປີ 2022 ປະກອບມີ: ປະເພດເຄື່ອງດື່ມກະທິງແດງ, ປະເພດງົວ, ຄວາຍ, ມ້າມີຊີວິດ, ປະເພດໝູພັນ-ໄກ່ພັນ, ປະເພດໝາກໄມ້ລວມ, ປະເພດເຂົ້າສານ ແລະ ເຄື່ອງອື່ນໆ.

ໃນທິດທາງແຜນການໃນປີ 2023 ດ່ານພາສີສາກົນຂົວມິດຕະພາບ III ໄດ້ຮັບມອບໝາຍຕົວເລກຈັດເກັບລາຍຮັບເຂົ້າງົບປະມານເປັນຈໍານວນ 602,851 ຕື້ກີບ.