ຫາລື ຮັບຮອງເອກະສານ ຄຳຮ້ອງສະເໜີ ອຸທິຍານແຫ່ງຊາດຫີນໜາມໜໍ່ ເປັນມໍລະດົກໂລກ ຮ່ວມຊາຍແດນ

ວັນທີ 20 ມັງກອນ 2023 ຜ່ານມານີ້ ຄະນະກຳມະການລະດັບຊາດເພື່ອມໍລະດົກໂລກວາລະ ຮັບຮອງເອົາເອກະສານຄຳຮ້ອງ ສະເໜີອຸທິຍານແຫ່ງຊາດ ຫີນໜາມໜໍ່ ເປັນມໍລະດົກໂລກ ຮ່ວມຊາຍແດນ ກັບອຸທິຍານແຫ່ງຊາດ ຟອງຫຍາແກບາງ ມໍລະດົກໂລກ ຂອງ ສສ ຫວຽດນາມ ໂດຍ ທ່ານ ວັນສີ ກົວມົວ ຮອງລັດຖະມົນຕີ ຖວທ.

ກອງປະຊຸມໄດ້ຫາລືຜົນສໍາເລັດຂອງຂະບວນການກະກຽມເອກະສານຄຳຮ້ອງສະເໜີ ອຸທິຍານແຫ່ງຊາດ ຫີນໜາມໜໍ່ ເປັນມໍລະດົກໂລກທາງທຳມະຊາດແຫ່ງທຳອິດ ຂອງ ສປປ ລາວ ແລະ ເປັນມໍລະດົກໂລກທາງທຳມະຊາດຮ່ວມຊາຍແດນ ແບບເຊື່ອມຕໍ່ ກັບອຸທິຍານແຫ່ງຊາດຟອງຫຍາແກບາງ ມໍລະດົກໂລກ ທາງທໍາມະຊາດຂອງ ສສ ຫວຽດນາມ; ຜົນສຳເລັດຂອງການຈັດຕັ້ງຂະບວນການ “ຄວາມມີອິດສະຫລະ, ການຮັບຮູ້ກ່ອນລ່ວງໜ້າ ແລະ ເຫັນດີຢ່າງສະໝັກໃຈ” ຂອງປະຊາຊົນ 10 ບ້ານອ້ອມຮອບອຸທິຍານ  ພ້ອມກັນປຶກສາຫາລື ແລະ ປະກອບຄໍາເຫັນໃສ່ເອກກະສານຄໍາຮ້ອງ ເປັນມໍລະດົກໂລກທາງທຳມະຊາດ ຮ່ວມຊາຍແດນ ຂອງ ສສ ຫວຽດນາມ ໃຫ້ມີເນື້ອໃນທີ່ຄົບຖ້ວນສົມບູນຍິ່ງຂຶ້ນ ກ່ອນທີ່ຄະນະຮັບຜິດຊອບໃນການກະກຽມເອກະສານ ຮ່າງຄຳຮ້ອງດັ່ງ ກ່າວ ຈະນຳສົ່ງຄຳຮ້ອງສະບັບສົມບູນ ເຖິງສູນມໍລະດົກໂລກ ກ່ອນວັນທີ 1 ກຸມພາ 2023 ທີ່ຈະມາເຖິງນີ້.

ຜ່ານຂອບການຮ່ວມມື ພາຍໃຕ້ການຈັດຕັ້ງປະຕິບັດສົນທິສັນຍາມໍລະດົກໂລກ 1972 ຂອງອົງການອຸຍແນັສໂກ ທີ່ ສປປ ລາວ ລົງນາມເຂົ້າຮ່ວມເປັນລັດພາຄີ ໃນປີ 1987 ແລະ ມາເຖິງປັດຈຸບັນນີ້ ສປປ ລາວ ມີມໍລະດົກໂລກທາງດ້ານວັດທະນະທຳ ທີ່ເປັນຮູບປະທຳເພີ່ມຂຶ້ນເປັນ 3 ແຫ່ງ ຄື: ນະຄອນປະຫວັດສາດຫລວງພະບາງ, ວັດພູ ພ້ອມດ້ວຍພູມີທັດວັດທະນະທຳ ຈຳປາສັກ ແລະ ທົ່ງໄຫຫີນ ແຂວງຊຽງຂວາງ. ນອກຈາກນີ້, ພາຍໃຕ້ສົນທິສັນຍາ 2003 ວ່າດ້ວຍການປົກປ້ອງມໍລະດົກທີ່ເປັນນາມມະທຳ ຂອງອົງການອຸຍແນັສໂກ ໃນທ້າຍປີ 2017 ສປປ ລາວ ກໍໄດ້ຂຶ້ນທະບຽນ ສຽງແຄນເຊື້ອຊາດລາວ ເຂົ້າຢູ່ໃນບັນຊີຕົວແທນແຫ່ງມໍລະດົກວັດທະນະທຳນາມມະທຳ ຂອງມວນມະນຸດສະຍະຊາດ, ນັ້ນເປັນຜົນງານ ແລະ ຜົນສຳເລັດເບື້ອງຕົ້ນສະທ້ອນໃຫ້ເຫັນຄວາມພະຍາຍາມ ແລະ ພັນ ທະສັນຍາຂອງລັດຖະບານ ສປປ ລາວ ຕໍ່ວົງຄະນາຍາດສາກົນ ໃນການປົກປ້ອງ ແລະ ສົ່ງເສີມຄຸນຄ່າມໍລະດົກຂອງຊາດ.

ຂະບວນການດັ່ງກ່າວນີ້ໄດ້ລິເລີ່ມຂຶ້ນແຕ່ປີ 1999 ຈົນມາຮອດປີ 2003, ຄະນະເປັນມໍລະດົກໂລກທາງທຳມະຊາດ ກຳມະການມໍລະດົກໂລກຈຶ່ງໄດ້ຕົກລົງຮັບ ຮອງເອົາອຸທິຍານແຫ່ງຊາດ ຟອງຫຍາແກບາງ ກ່ອນ ໂດຍໃຫ້ລັດພາຄີຫວຽດນາມ ສືບຕໍ່ປຶກສາຫາລື ເພື່ອຮ່ວມມືກັບລັດພາຄີ ສປປ ລາວ ສະເໜີເອົາອຸທິຍານແຫ່ງຊາດຫີນໜາມໜໍ່  ເຊິ່ງຂະບວນການກະກຽມເອກະ ສານຄຳຮ້ອງຢູ່ພາຍໃນຂອງ ສປປ ລາວ ໄດ້ກະກຽມທັງທາງດ້ານຂໍ້ມູນ, ປັບປຸງທາງເຕັກນິກ ແລະວິຊາການມາໂດຍຕະຫລອດ ທັງຢູ່ຂັ້ນທ້ອງຖິ່ນໃນລະດັບແຂວງ, ເມືອງ ໂດຍສະເພາະ ລະຫວ່າງສອງອຸທິ ຍານແຫ່ງຊາດ ໄດ້ມີການໄປມາຫາສູ່, ແລກປ່ຽນບົດຮຽນ ແລະ ຂໍ້ມູນຂ່າວສານນຳກັນຢ່າງເປັນປົກກະ ຕິ. ຂະບວນການກະກຽມເອກະສານຄຳຮ້ອງ ສະເພາະຂອງຝ່າຍລາວ ຖ້ານັບແຕ່ອຸທິຍານແຫ່ງຊາດຟອງຫຍາແກບາງ ຂອງ ສສ ຫວຽດນາມ ໄດ້ຂຶ້ນທະບຽນເປັນມໍລະດົກໂລກ ຈົນມາຮອດປັດຈຸບັນນີ້ ມີອາຍຸ 20 ປີ ແລ້ວ.

ປັດຈຸບັນໄດ້ສຳເລັດຂະບວນການກະກຽມເອກະສານຄຳຮ້ອງກ່ຽວກັບການສະເໜີອຸທິຍານແຫ່ງຊາດ ຫີນໜາມໜໍ່ ເມືອງບົວພາ ແຂວງຄຳມ່ວນ ເປັນມໍລະດົກໂລກທາງທໍາມະຊາດຮ່ວມຊາຍແດນ ເຊື່ອມຕໍ່ກັບອຸທິຍານແຫ່ງຊາດຟອງຫຍາແກບາງ ມໍລະດົກໂລກທາງທຳມະຊາດ ແຂວງກວາງບິ່ງ ສສ ຫວຽດນາມ ທີ່ຈະກາຍເປັນມໍລະດົກໂລກທາງທຳມະຊາດແຫ່ງທຳອິດຂອງ ສປປ ລາວ ແລະ ເປັນມໍລະດົກໂລກທາງທຳມະຊາດຮ່ວມຊາຍແດນແຫ່ງທຳອິດ ໃນພາກພື້ນອີກດ້ວຍ.