ຣຽວ ມາດຣິດ ຕໍ່ເວລາພິເສດໄລ່ເອົາຊະນະ ແອດ ມາດຣິດ ເຂົ້າຮອບຕັດເຊືອກ ໂຄປາ

ໂຄປາ ເດວເຣ ຮອບກ່ອນຮອງຊະນະເລີດ ໃນຄືນວັນພະຫັດທີ່ຜ່ານມາ, ຣຽວ ມາດຣິດ ຕ້ອງພະຍາຍາມຈົນເຖິງຕໍ່ເວລາພິເສດເປີດສະໜາມ ຊານຕິອາໂກ ເບີນາເບວ, ເອົາຊະນະຄູ່ແຂ່ງ ແອັດເລຕິໂກ ມາດຣິດ 3-1 ຫລັງຈົບ 90 ນາທີ ສະເໝີ 1-1 ຄວ້າປີ້ເຂົ້າສູ່ຮອບຮອງຊະນະເລີດໄດ້ສຳເລັດ.

ເກມນີ້ ແອັດເລຕິໂກ ມາດຣິດ ເລີ່ມຕົ້ນດີໄດ້ປະຕູຂຶ້ນນໍາກ່ອນ 1-0 ຈາກ ອັນວາໂຣ ໂມຣາຕາ ອະດີດກອງໜ້າຂອງ ຣຽວ ມາດຣິດ ໃນນາທີ 19 ຈາກນັ້ນ ນາທີໆ 79 ເຈົ້າບ້ານໄລ່ຕາມສະເໝີ 1-1 ຈາກຈັງຫວະ ທີ່ ໂຣດຣິໂກ ລາກບານຫລີກນັກເຕະ 4 ຄົນ ກ່ອນທີ່ຈະດີດບານຜ່ານມືຂອງ ຍານ ໂອບຣັກ ມືໜຶ່ງຂອງທີມເຂົ້າໄປແບບຄລາສສິກ. ໃນຊ່ວງເວລາທີ່ເຫລືອ ບໍ່ມີໃຜສາມາດເຮັດຫຍັງໄດ້ອີກເປັນຄົບ 90 ນາທີ, ທັງສອງທີມສະເໝີກັນຢູ່ທີ່ 1-1, ຕ້ອງໄດ້ສືບຕໍ່ກັນໃນຊ່ວງຕໍ່ເວລາພິເສດ.

ຂະນະທີ່ ໃນຊ່ວງເວລາພິເສດນາທີ 99 ແອັດເລຕິໂກ ມາດຣິດ ຕ້ອງເຫລືອຜູ້ຫລິ້ນພຽງ 10 ຄົນ ຈາກການຖືກໄລ່ອອກຂອງ ສະເຕຟານ ຊາວິຊ ເມື່ອໄດ້ປຽບຜູ້ຫລິ້ນ ຣຽວ ມາດຣິດ ຄອງເກມບຸກ ກ່ອນມາເພີ່ມອີກ 2 ປະຕູຈາກ ຄາຣິມ ເບນເຊມາ ໃນນາທີ 104 ແລະ ວີນິຊິສ ຈູເນຍ ໃນນາທີ 120+2 ສົ່ງໃຫ້ “ລາຊາຊຸດຂາວ. “ຊະນະຢ່າງສວຍງາມ 3-1.