ທ່ານ ຄິຊິດະ ກ່າວວ່າ “ນີ້ເປັນໂອກາດດຽວເທົ່ານັ້ນ” ທີ່ຈະແກ້ໄຂບັນຫາ ອັດຕາການເກີດຫລຸດລົງຂອງຍີ່ປຸ່ນ

ວັນທີ 23 ມັງກອນ, ທ່ານ ຟູມິໂອະ ຄິຊິດະ ນາຍົກລັດຖະມົນຕີຍີ່ປຸ່ນ ໃຫ້ຄໍາໝັ້ນວ່າ: ລັດຖະບານຈະດໍາເນີນຢ່າງຮີບດ່ວນເພື່ອແກ້ໄຂບັນຫາອັດຕາການເກີດທີ່ຫລຸດລົງຂອງປະເທດ ໂດຍກ່າວວ່າ: “ນີ້ເປັນໂອກາດດຽວເທົ່ານັ້ນ” ສໍາລັບຍີ່ປຸ່ນ ເຊິ່ງກໍາລັງປະເຊີນບັນຫາສັງຄົມຜູ້ສູງອາຍຸ.

ທ່ານ ຄິຊິດະ ກ່າວໃນການປາໄສທາງນະໂຍບາຍ ໃນກອງປະຊຸມລັດຖະສະພາວ່າ: “ປະເທດຂອງພວກເຮົາກໍາລັງຢູ່ໃນຈຸດປ່ຽນສໍາຄັນວ່າພວກເຮົາຈະສາມາດຮັກສາສົມດູນທາງສັງຄົມໄວ້ໄດ້ ຫລື ບໍ່”.

“ນີ້ເປັນໂອກາດດຽວເທົ່ານັ້ນໃນການຊຸກຍູ້ນະໂຍບາຍດ້ານອັດຕາການເກີດ ແລະ ການລ້ຽງລູກ. ສິ່ງເຫລົ່ານີ້ເປັນບັນຫາທີ່ບໍ່ສາມາດລໍຖ້າໄດ້ອີກຕໍ່ໄປ” ທ່ານ ຄິຊິດະ ກ່າວ.

ນອກຈາກນີ້, ທ່ານ ຄິຊິດະ ຍັງລະບຸອີກວ່າ: ທ່ານຈສະເໜີແຜນເພີ່ມງົບປະມານສໍາລັບນະໂຍບາຍກ່ຽວກັບເດັກຂຶ້ນເປັນສອງເທົ່າພາຍໃນເດືອນມິຖຸນາ ແລະ ຈະຈັດຕັ້ງໜ່ວຍງານລັດຖະບານໃໝ່ເພື່ອແກ້ໄຂບັນຫານີ້ໂດຍສະເພາະໃນເດືອນເມສາ.

ທ່ານ ຄິຊິດະ ກ່າວວ່າ: ນະໂຍບາຍທີ່ກຽມອອກມາເພື່ອຊ່ວຍຫລຸດພາລະຂອງຜູ້ປົກຄອງໃນການລ້ຽງລູກນັ້ນ ຖືເປັນການລົງທຶນເພື່ອອະນາຄົດທີ່ມີປະສິດທິພາບຫລາຍທີ່ສຸດ ພ້ອມໃຫ້ຄຳໝັ້ນວ່າ: ຈະສ້າງເສດຖະກິດ ແລະ ສັງຄົມທີ່ເນັ້ນເດັກເປັນສູນກາງ ເພື່ອແກ້ໄຂບັນຫາອັດຕາການເກີດຕໍ່າ ເຊິ່ງສົ່ງຜົນກະທົບຕໍ່ການຂະຫຍາຍຕົວຂອງເສດຖະກິດຍີ່ປຸ່ນໃນໄລຍະຍາວ.

ການເຄື່ອນໄຫວດັ່ງກ່າວມີຂຶ້ນຫລັງຈາກລັດຖະບານເປີດເຜີຍຕົວເລກຄາດຄະເນໃນເດືອນທັນວາຜ່ານມາວ່າ: ອັດຕາການເກີດໃນຍີ່ປຸ່ນມີທ່າອ່ຽງຫລຸດລົງຕໍ່າກວ່າ 800.000 ຄົນເປັນຄັ້ງທຳອິດໃນປີ 2022 ໂດຍໜຶ່ງໃນປັດໄຈທີ່ເຮັດໃຫ້ອັດຕາການເກີດໜ້ອຍລົງ ເປັນຍ້ອນຄົນຍີ່ປຸ່ນລຸ້ນໃໝ່ເລີ່ມບໍ່ຢາກແຕ່ງດອງເພີ່ມຂຶ້ນ ໂດຍຜົນສໍາຫລວດຫລ້າສຸດຈາກມູນນິິທິ Nippon Foundation ເປີດເຜີຍວ່າ: ມີໄວໜຸ່ມຊາວຍີ່ປຸ່ນອາຍຸ 17-19 ປີ ເຖິງ 17,4% ທີ່ລະບຸວ່າ: ພວກເຂົາບໍ່ມີຄວາມຄິດຈະແຕ່ງດອງ ເນື່ອງຈາກບໍ່ຢາກມີພາລະໃນດ້ານການເງິນ ແລະ ບັນຫາທີ່ກະທົບຕໍ່ຈິດໃຈ.

ອ້າງອີງ:

https://english.kyodonews.net/…/caa2f6e816dc-pm-warns…

https://www.reuters.com/…/japan-pm-kishida-its-now-or…/