ປີ 2022 ມີພາຫະນະເຂົ້າ-ອອກ ດ່ານສາກົນນາເພົ້າ ແຂວງຄຳມ່ວນ ຫລາຍກວ່າ 93.000 ຄັນ

ແຫລ່ງຂ່າວຄຳມ່ວນໃຫ້ຮູ້ວ່າ: ທ່ານ ພັທ ພົມມະນີ ໄຊຍະລາດ ຫົວໜ້າຄຸ້ມຄອງດ່ານສາກົນນາເພົ້າ ແຂວງຄຳມ່ວນ ລາຍງານເມື່ອວັນທີ 20 ມັງກອນ 2023 ວ່າໃນໄລຍະ 1 ປີຜ່ານມາ ດ່ານສາກົນນາເພົ້າໄດ້ເອົາໃຈໃສ່ຕິດຕາມ, ກວດກາ ແລະ ຊຸກຍູ້ການເຄື່ອນໄຫວວຽກງານຕາມຂອບເຂດສິດ, ໜ້າທີ່ພາລະບົດບາດໃນການບໍລິຫານລັດທີ່ໄດ້ກຳນົດໃນດຳລັດ ກໍຄືນິຕິກຳຕ່າງໆທີ່ກ່ຽວຂ້ອງ ເຊິ່ງໃນປີ 2022 ມີພາຫະນະເຂົ້າ-ອອກ ທັງໝົດ 93.104 ຄັນ. ໃນນີ້, ພາຫະນະເຂົ້າ 27.703 ຄັນ, ອອກ 65.410 ຄັນ, ມີຈຳນວນຄົນເຂົ້າ-ອອກ ທັງໝົດ 180.842 ຄົນ. ເປັນຄົນລາວ 24.065 ຄົນ, ຄົນຫວຽດນາມ 155.528 ຄົນ, ຄົນໄທ 1.057 ຄົນ ແລະ ຄົນຕ່າງປະເທດໄປປະເທດທີ 3 ມີ 192 ຄົນ.

ສຳລັບໂຕເລກການຈັດເກັບລາຍຮັບຕາມການແບ່ງປັນຈຳນວນ 184,7 ຕື້ກີບ (ທຽບໃສ່ປີ 2021 ເພີ່ມຂຶ້ນ 91,4 ຕື້ກີບ) ຜ່ານການຈັດຕັ້ງປະຕິບັດໄດ້ທັງໝົດ 94,7 ຕື້ກີບ ເທົ່າກັບ 51,29% ຂອງແຜນການປີ, ສາເຫດທີ່ເຮັດໃຫ້ການຈັດຕັ້ງປະຕິບັດບໍ່ບັນລຸ ເນື່ອງຈາກສະພາບເສດຖະກິດເງິນຕາຕ່າງປະເທດບໍ່ຄົງທີ່, ການນໍາເຂົ້າສິນຄ້າໃນຫລາຍປະເພດຫລຸດລົງ, ການປະຕິບັດມູນຄ່າແຈ້ງຕາມລາຄາ ຊື້-ຂາຍ ຍັງບໍ່ທັນຄຸ້ມຄອງໄດ້ຢ່າງມີປະສິດທິພາບ, ການກຳນົດວາງແຜນເກັບລາຍຮັບໃນແຕ່ລະໄລຍະ, ແຕ່ລະເດືອນຍັງບໍ່ເປັນໄປຕາມເປົ້າໝາຍທີ່ຄາດໄວ້, ເສັ້ນທາງຂຶ້ນຫາດ່ານເປັນພູສູງຊັນ ແລະ ມີການເປ່ເພ ກໍເປັນສາເຫດໜຶ່ງເຮັດໃຫ້ມີຄວາມຊັກຊ້າ, ລະບົບໄຟຟ້າ, ລະບົບເອເລັກໂຕຣນິກ ບໍ່ຄ່ອຍປົກກະຕິ ແລະ ອື່ນໆ.

ດ່ານສາກົນນາເພົ້າເປັນດ່ານສາກົນປະເພດ 2 ແລະ ເປັນດ່ານທີ່ຕິດກັບດ່ານຊາຍແດນ ສສ ຫວຽດນາມ ເຊິ່ງຕັ້ງຢູ່ບ້ານນາເພົ້າ ເມືອງບົວລະພາ ແຂວງຄຳມ່ວນ ຫ່າງຈາກເທດສະບານແຂວງປະມານ 146 ກິໂລແມັດ, ປະກອບມີ 5 ຂະແໜງການ ທີ່ເຮັດໜ້າທີ່ບໍລິການຢູ່ພາຍໃນດ່ານຄື: ຫ້ອງການບໍລິຫານດ່ານ, ຂະແໜງພາສີ, ເຈົ້າໜ້າຕຳຫລວດກວດຄົນເຂົ້າ-ອອກ ເມືອງ, ຂະແໜງກະສິກຳ ແລະ ຂະແໜງສາທາລະນະສຸກ.