ຕຳຫລວດຈະລາຈອນ ນະຄອນຫລວງວຽງຈັນ ມອບລົດຈັກທີ່ເກັບກູ້ມາໄດ້ ສົ່ງຄືນເຈົ້າຂອງ

ວັນທີ 19 ມັງກອນ 2023 ທ່ານ ພັທ ສັງຄົມ ພົມມະລາດ ຮອງຫົວໜ້າພະແນກຕໍາຫຼວດ ຈະລາຈອນ ຫ້ອງຕຳຫຼວດ ປກສ ນະຄອນຫຼວງວຽງຈັນ ພ້ອມດ້ວຍຄະນະ, ມອບ-ຮັບລົດຈັກເວບ 100 ສີດໍາ ບໍ່ມີປ້າຍທະບຽນ ທີ່ເກັບກູ້ຄືນມາໄດ້ຈາກຄົນຮ້າຍລັກໄປ ຄືນໃຫ້ເຈົ້າຂອງ.

ທ່ານ ພັທ ສັງຄົມ ພົມມະລາດ ໃຫ້ຮູ້ວ່າ: ໃນວັນທີ 28 ກັນຍາ 2022 ເຈົ້າໜ້າທີ່ຕຳຫຼວດຈະລາຈອນ ປະຈຳຢູ່ປ້ອມຫຼັກ 6 ກຳລັງປະຕິບັດໜ້າທີ່ກວດກາຍານພາຫະນະ ພົບເຫັນຜູ້ຂັບຂີ່ລົດຈັກເວບ 100  ຈຶ່ງໄດ້ຂໍກວດກາ ແຕ່ຜູ້ຂັບຂີ່ ບໍ່ມີເອກະສານມາອ້າງອີງ ໂດຍອ້າງບອກວ່າ: ເອກະສານເກັບຮັກສາໄວ້ຢູ່ເຮືອນ ເຈົ້າໜ້າທີ່ເກີດຄວາມສົງໄສຈຶ່ງໄດ້ກັກໄວ້ເພື່ອກວດກາ, ພາຍຫຼັງນຳເລກຈັກ, ເລກຖັງໄປກວດກາຢູ່ກອງຄຸ້ມຄອງພາຫານະ ແລະ ການຂັບຂີ່ ຈຶ່ງຮູ້ວ່າລົດຈັກ ເວບ 100 ສີດໍາຄັນດັ່ງກ່າວ ຖືກຄົນຮ້າຍລັກ ເຈົ້າໜ້າທີ່ຈຶ່ງໄດ້ປະກາດຫາເຈົ້າຂອງນຳເອກະສານຫຼັກຖານ ຜ່ານການກວດກາເຫັນວ່າ ທ່ານ ຄຳຮູ້ ດວງສີຫາລາດ ເປັນເຈົ້າຂອງລົດຄັນດັ່ງກ່າວແທ້ ຈຶ່ງໄດ້ມອບຄືນໃຫ້ຜູ້ກ່ຽວໄປຄຸ້ມຄອງ ແລະ ນໍາໃຊ້.