ຮອງປະທານປະເທດ ເນັ້ນໃຫ້ແຂວງໄຊຍະບູລີ ເອົາໃຈໃສ່ພັດທະນາເສດຖະກິດ-ສັງຄົມ ແລະ ວຽກງານຈຸດສຸມຫລາຍຂຶ້ນ

ໃນໂອກາດເຄື່ອນໄຫວວຽກງານຢູ່ແຂວງໄຊຍະບູລີ ໃນວັນທີ 19 ມັງກອນ 2023 ນີ້, ທ່ານ ບຸນທອງ ຈິດມະນີ ຮອງປະທານປະເທດ ໄດ້ລົງຢ້ຽມຢາມ ແລະ ໂອ້ລົມການນໍາແຂວງໄຊຍະບູລີ ໂດຍທ່ານໄດ້ເນັ້ນໃຫ້ການນໍາແຂວງເອົາໃຈໃສ່ຫລາຍບັນຫາສຳຄັນເປັນຕົ້ນແມ່ນການພັດທະນາເສດຖະກິດ-ສັງຄົມ ຕ້ອງເອົາໃຈໃສ່ຂຸດຄົ້ນທ່າແຮງບົ່ມຊ້ອນພາຍໃນແຂວງ, ການດຶງດູດການລົງທຶນ ຈາກພາຍໃນ ແລະ ຕ່າງປະເທດ ໂດຍໃຫ້ຄວາມສະດວກ ແລະ ຄຸ້ມຄອງທີ່ດິນໃຫ້ໄປຕາມກົດໝາຍ ແລະ ລະບຽບການ.

ທ່ານຮອງປະທານປະເທດ ຍັງເນັ້ນອີກວ່າ: ໃຫ້ການນໍາຂອງແຂວງ ສືບຕໍ່ຍູ້ແຮງການຈັດຕັ້ງປະຕິບັດ ແລະ ຜັນຂະຫຍາຍມະຕິກອງປະຊຸມໃຫຍ່ຄັ້ງທີ XI ຂອງພັກ, ຂອງກອງປະຊຸມໃຫຍ່ອົງຄະນະພັກແຂວງໄຊຍະບູລີ ຄັ້ງທີ VII ໃຫ້ເຂົ້າສູ່ລວງເລິກ, ເປັນເຈົ້າການຍົກສູງສະຕິລະວັງຕົວ, ຕ້ານປະກົດການທີ່ບໍ່ຖືກຕ້ອງ, ມີສະຕິຕໍ່ກົນອຸບາຍຂອງອິດທິກຳລັງປໍລະປັກ ແລະ ຄົນທີ່ບໍ່ຫວັງດີ, ສືບຕໍ່ຕັ້ງໜ້າບຸກບືນສ້າງການຫັນປ່ຽນທີ່ແຂງແຮງ, ເລິກເຊິ່ງ ແລະ ຮອບດ້ານໃນທຸກຂົງເຂດວຽກງານ, ເອົາໃຈໃສ່ດ້ານການຈັດຕັ້ງປະຕິບັດວາລະແຫ່ງຊາດວ່າດ້ວຍການແກ້ໄຂຄວາມຫຍຸ້ງຍາກດ້ານເສດຖະກິດ-ການເງິນ, ວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ, ສືບຕໍ່ນຳພາຊີ້ນຳສະກັດກັ້ນ ແລະ ແກ້ໄຂບັນຫາປະກົດການຫຍໍ້ທໍ້ຕ່າງໆ ທີ່ເກີດຂຶ້ນຢູ່ແຂວງ ເປັນຕົ້ນ ບັນຫາການຂີ້ລັກງັດແງະ, ບັນຫາຢາເສບຕິດ, ອຸບັດເຫດຕາມທ້ອງຖະໜົນ, ການລັກລອບຄ້າຂາຍເຖື່ອນ, ການຕົ້ມຕຸນຮູບແບບ, ການລັກລອບຂຸດຄົ້ນຊັບພະຍາກອນທຳມະຊາດ, ສະພາບຫຍໍ້ທໍ້ບໍລິເວນຊາຍແດນ, ການເຄື່ອນໄຫວສາສະໜາບໍ່ຖືກຕ້ອງ ແລະ ອື່ນໆ. ພ້ອມນີ້, ໃຫ້ສືບຕໍ່ລົງກໍ່ສ້າງຮາກຖານການເມືອງຢ່າງມີຈຸດສຸມ ແລະ ມີເນື້ອໃນ, ຮູບການທີ່ແທດກັບສະພາບຕົວຈິງຢູ່ແຕ່ລະບ່ອນແນໃສ່ສ້າງ ແລະ ບູລະນະລະບົບການເມືອງຢູ່ຂັ້ນຮາກຖານໃຫ້ມີຄວາມເຂັ້ມແຂງ, ໜັກແໜ້ນ, ສາມາດນຳພາປະຊາຊົນ ເປັນເຈົ້າການປົກປັກຮັກສາ, ພັດທະນາຕົນເອງ, ພັດທະນາບ້ານຊ່ອງ ແລະ ເອົາໃຈໃສ່ປັບປຸງການບໍລິຫານ-ຄຸ້ມຄອງລັດໃຫ້ເຂັ້ມແຂງໜັກແໜ້ນ ແລະມີປະສິດທິພາບ.

ໂອກາດນີ້, ທ່ານ ພົງສະຫວັນ ສິດທະວົງ ເຂົ້າແຂວງໄຊຍະບູລີ ໄດ້ລາຍງານສະພາບການພັດທະນາເສດຖະກິດ-ສັງຄົມຂອງແຂວງໂດຍສັງເຂບ, ໂດຍລວມແລ້ວແຂວງ ໄຊຍະບູລີ ມີສະຖຽນລະພາບທາງດ້ານການເມືອງ, ສັງຄົມມີຄວາມສະຫງົບປອດໄພ, ສະພາບແນວຄິດຂອງພະນັກງານ, ສະມາຊິກພັກ, ກໍາລັງປະກອບອາວຸດ ແລະ ປະຊາຊົນບັນດາເຜົ່າແມ່ນມີຄວາມອຸ່ນອ່ຽນທຸ່ນທ່ຽນ, ເຊື່ອໝັ້ນຕໍ່ການນໍາພາຂອງພັກ-ລັດຢ່າງແທ້ຈິງ, ດ້ານເສດຖະກິດເຫັນວ່າ ເສດຖະກິດມະຫາພາກຂອງແຂວງ ບໍ່ສາມາດບັນລຸຄາດໝາຍ, ແຜນວາງໄວ້ 5%, ຜ່ານການສະຫລຸບຕີລາຄາ ບັນລຸ 4,9%, ລວມຍອດຜະລິດຕະພັນພາຍໃນ 12,339 ຕື້ກີບ, ສະເລ່ຍໃສ່ຫົວຄົນໜຶ່ງ 29,47 ລ້ານກີບ ຫລື ເທົ່າກັບ 1.734 ໂດລາສະຫະລັດ, ສະເລ່ຍ3.683 ໂດລາ/ຄົນ ເພີ່ມຂຶ້ນ 268 ໂດລາ/ຄົນ, ປະຕິບັດລາຍຮັບໄດ້ 1.197,84 ຕື້ກີບ, ໃນນັ້ນ ພູດສູນກາງປະຕິບັດໄດ້ 920,34 ຕື້ກີບ ແລະ ພູດທ້ອງຖິ່ນ ປະຕິບັດໄດ້ 277,50 ຕື້ກີບ, ສິນຄ້າສົ່ງອອກບັນລຸ 113,09 ລ້ານໂດສະຫະລັດ, ສິນຄ້ານໍາເຂົ້າ 111,31 ລ້ານໂດລາສະຫະລັດ, ການຜະລິດແມ່ນໄດ້ສຸມໃສ່ຜະລິດເຂົ້າ ເພື່ອຄໍ້າປະກັນສະບຽງອາຫານໃນເນື້ອທີ 49.168 ກວ່າເຮັກຕາ ຜົນຜະລິດໄດ້ທັງໝົດ 194.800 ກວ່າໂຕນ ແລະ ພືດເປັນສິນຄ້າເຊັ່ນ: ສາລີ, ໝາກເດືອຍ, ຖົ່ວເຫລືອງ ແລະ ພືດອື່ນໆ.