ປກສ ນະຄອນໄກສອນ ພົມວິຫານ ກັກຕົວ ແລະ ສຶກສາອົບຮົມກຸ່ມໄວໜຸ່ມປາຕີ້ມົ້ວສຸມຢາເສບຕິດ ສູບປູມເປົ້າ 14 ຄົນ

ພັທ ຄຳສີ ທູນທະວົງສັກ ຫົວໜ້າກອງບັນຊາການ ປກສ ນະຄອນໄກສອນພົມວິຫານ ໄດ້ລາຍງານໃຫ້ຮູ້ວ່າ: ວັນທີ 16 ມັງກອນ 2023 ຜ່ານມານີ້ ເຈົ້າໜ້າທີ່ ກອງບັນຊາການ ປກສ ນະຄອນໄກສອນ ໄດ້ນຳຕົວກຸ່ມໄວໜຸ່ມປາຕີ້ ມົ້ວສຸມຢາເສບຕິດ ສູບປູມເປົ້າ ຈຳນວນ 14 ຄົນ ມາສຶກສາອົບຮົມ ແລະ ກ່າວເຕືອນ ເພື່ອເຮັດໃຫ້ແຕ່ລະຄົນຮັບຮູ້ ແລະ ເຂົ້າໃຈໄພອັນຕະລາຍຂອງຢາເສບຕິດ.
ກຸ່ມໄວໜຸ່ມ ຈຳນວນ 14 ຄົນ ເຈົ້າໜ້າທີ່ວິຊາສະເພາະ ປກສ ນະຄອນໄກສອນພົມວິຫານ ກັກຕົວວັນທີ 4 ມັງກອນ 2023 ຜ່ານມາ ເນື່ອງຈາກມີການມົ້ວສຸມປາຕີ້ ມົ້ວສຸມຢາເສບຕິດ ຢູ່ຫ້ອງຄາຣາໂອເກະ ແຫ່ງໜຶ່ງ ພ້ອມຂອງກາງ ປູມເປົ້າທີ່ສູບແລ້ວຈຳນວນ 53 ໜ່ວຍ, ຢາສູບໄຟຟ້າຈຳນວນ 11 ອັນ, ບັ້ງແກັສ ສຳລັບອັດປູມເປົ້າຈຳນວນ 3 ບັ້ງ, ປູມເປົ້າທີ່ບໍ່ທັນໄດ້ອັດແກັສ ຈຳນວນ 113 ໜ່ວຍ.