ປະທານປະເທດ ເນັ້ນໃຫ້ອົງການກາແດງແຫ່ງຊາດລາວ ເອົາໃຈໃສ່ບັນຫາສຳຄັນວຽກງານສັງຄົມໃຫ້ກວ້າງຂວາງຂຶ້ນ
ໃນໂອກາດເຂົ້າຮ່ວມກອງກອງປະຊຸມສະຫລຸບວຽກງານກາແດງ ປີ 2022 ແລະ ທິດທາງແຜນການ ປີ 2023 ໃນວັນທີ 17 ມັງກອນນີ້ ທີ່ນະຄອນຫລວງວງຈັນ, ທ່ານ ທອງລຸນ ສີສຸລິດ ປະທານປະເທດ ແຫ່ງ ສປປ ລາວ ໂອ້ລົມ ແລະ ສະແດງຄວາມຊົມເຊີຍ ຕໍ່ພະນັກງານ-ລັດຖະກອນ, ຜູ້ຊົງຄຸນວຸທິ, ນັກຮຽນຮູ້ປັນຍາຊົນ, ກຳມະກອນ, ນັກທຸລະກິດ, ມຸນນິທິ, ອາສາສະໝັກກາແດງ ແລະ ປະຊາຊົນບັນດາເຜົ່າ ທີ່ໄດ້ເປັນເຈົ້າການເຂົ້າຮ່ວມ ແລະ ປະກອບສ່ວນເຄື່ອນໄຫວວຽກງານມະນຸດສະທຳຢ່າງເປັນຂະບວນ ແລະ ສະແດງຄວາມຍ້ອງຍໍຊົມເຊີຍ ແລະ ຕີລາຄາສູງຕໍ່ການນໍາພາ ຂອງຄະນະພັກ-ຄະນະນຳ ອົງການກາແດງແຫ່ງຊາດລາວ ທີ່ເຄື່ອນໄຫວຢ່າງເອົາຈິງເອົາຈັງ ແລະ ມີຜົນສໍາເລັດໃນຫລາຍດ້ານໃນໄລຍະທີ່ຜ່ານມາ ແລະ ໄດ້ເນັ້ນໃຫ້ອົງການກາແດງແຫ່ງຊາດລາວເອົາໃຈໃສ່ບາງບັນຫາສໍາຄັນຂອງວຽກງານສັງຄົມໃຫ້ກວ້າງຂວາງຂຶ້ນຕື່ມຄື:
ເພື່ອສ້າງບົດບາດສຳຄັນໃນການເຮັດວຽກງານມະນຸດສະທຳຕາມແນວທາງນະໂຍບາຍຂອງພັກ, ແຜ່ເມດຕາສົງສານດ້ວຍຄວາມເຫັນອົກເຫັນໃຈຕໍ່ກັບເພື່ອນມະນຸດດ້ວຍກັນ, ເບິ່ງແຍງບັນເທົາທຸກ ທັງດ້ານວັດຖຸ ແລະ ຈິດໃຈ ເພື່ອປົກປ້ອງຊີວິດ, ສຸຂະພາບ ແລະ ເຄົາລົບສິດຂອງຄວາມເປັນມະນຸດ ລວມທັງການສົ່ງເສີມ ແລະ ພັດທະນາຄວາມຍືນຍົງຂອງມະນຸດ ໂດຍສະເພາະຜູ້ໄດ້ຮັບຜົນກະທົບທາງດ້ານຮ່າງກາຍ, ຊີວິດ, ຈິດໃຈ ແລະ ຊັບສິນ ຈາກໄພພິບັດທາງທຳມະຊາດ ແລະ ໄພອື່ນໆ ທີ່ມະນຸດສ້າງຂຶ້ນ. ສະນັ້ນ, ພະນັກງານ ແລະ ອາສາສະໝັກກາແດງຕ້ອງແມ່ນຜູ້ທີ່ມີຈິດໃຈເມດຕາທຳ, ມີຈິດໃຈມະນຸດສະທຳອັນສູງສົ່ງ, ມີຄຸນສົມບັດສິນທຳ, ມີຄວາມຮູ້ຄວາມສາມາດ, ມີຈັນຍາທຳ ແລະ ມີຄວາມຮັບຜີດຊອບສູງ, ມີຄວາມປອດໃສ ຂາວສະອາດ, ທັງມີຄວາມເສຍສະຫລະ ເພື່ອເປັນການອຸທິດໃນການປະຕິບັດໜ້າທີ່ອັນມີກຽດນີ້;
ເພື່ອພັດທະນາວຽກງານມະນຸດສະທໍາຂອງອົງການກາແດງແຫ່ງຊາດລາວ ໃຫ້ມີຄວາມເຂັ້ມແຂງຍືນຍົງ ຕ້ອງໄດ້ເພີ່ມທະວີການມີສ່ວນຮ່ວມຂອງສັງຄົມໃຫ້ກວ້າງຂວາງ, ຍົກບົດບາດຂອງອົງການກາແດງແຫ່ງຊາດລາວໃຫ້ສູງຂຶ້ນ, ໂຄສະນາເຜີຍແຜ່ກົດໝາຍ, ພາລະບົດບາດໜ້າທີ່ຂອງອົງການກາແດງແຫ່ງຊາດລາວ ໃຫ້ເປັນທີ່ຮັບຮູ້ເຂົ້າໃຈຢ່າງເລິກເຊິ່ງ ແລະ ກວ້າງຂວາງໃນທົ່ວສັງຄົມ, ໂດຍສະເພາະແມ່ນການສົ່ງເສີມສຸຂະພາບຂັ້ນພື້ນຖານຢູ່ຊຸມຊົນ, ການບໍລິຈາກເລືອດ ແລະ ການສະໜອງເລືອດທີ່ປອດໄພ, ວຽກງານຫລຸດຜ່ອນຄວາມສ່ຽງ ແລະ ຕອບໂຕ້ໄພພິບັດ, ການຊ່ວຍກູ້ໄພສຸກເສີນ ແລະ ການຊ່ວຍເຫຼືອບັນເທົາທຸກເບື້ອງຕົ້ນ ຊຶ່ງແມ່ນວຽກງານມະນຸດສະທຳ ທີ່ສຳຄັນທີ່ສຸດ ແລະ ແມ່ນສິດທິພື້ນຖານຂອງມະນຸດທີ່ຈະຕ້ອງໄດ້ຮັບການເອົາໃຈໃສ່ເບິ່ງແຍງ.
ດ້ານງົບປະມານຮັບໃຊ້ການເຄື່ອນໄຫວວຽກງານກາແດງລາວ, ນອກຈາກແຫລ່ງລາຍຮັບທີ່ໄດ້ຈາກງົບປະມານຂອງລັດ, ການຊ່ວຍເຫລືອຈາກບຸກຄົນ, ນິຕິບຸກຄົນ, ການຈັດຕັ້ງພາຍໃນ, ອົງການຈັດຕັ້ງສາກົນ, ຄະນະນໍາກາແດງລາວແຕ່ລະຂັ້ນ ກໍ່ຕ້ອງມີຄວາມເປັນເຈົ້າການ, ມີຄວາມຄິດລິເລີ່ມ ແລະ ຫົວຄິດປະດິດສ້າງ ໃນການຄົ້ນຄວ້າສ້າງກິດຈະກຳເຄື່ອນໄຫວຕ່າງໆທີ່ຖືກຕ້ອງຕາມກົດໝາຍ ເພື່ອໃຫ້ມີແຫລ່ງລາຍຮັບທີ່ເປັນປົກກະຕິ, ເພື່ອສາມາດກຸ້ມຕົນເອງໃນບາງດ້ານ ເຊິ່ງອາດຈະດຳເນີນດ້ວຍຕົນເອງ ຫລື ຮູບແບບການຮ່ວມມືກັບພາກເອກະຊົນ, ເປັນຕົ້ນແມ່ນຂະແໜງການບໍລິການການຜະລິດທີ່ເປັນເອກະລັກຂອງກາແດງລາວ. ການສ້າງຕັ້ງກອງທຶນຊ່ວຍເຫລືອສຸກເສີນ ກໍໃຫ້ດຳເນີນໄປຢ່າງຖືກຕ້ອງຕາມກົດໝາຍ ແລະ ມີການບໍລິຫານຄຸ້ມຄອງຢ່າງມີປະສິດທິຜົນ ເພື່ອສາມາດຊ່ວຍເຫລືອຮີບດ່ວນທາງດ້ານວັດຖຸ ແລະ ຈິດໃຈ ຂັ້ນພື້ນຖານໃຫ້ແກ່ຜູ້ໄດ້ຮັບຜົນກະທົບຈາກໄພພິບັດ, ຜູ້ທຸກຍາກຂາດເຂີນ, ປ່ຽວພອຍດ້ອຍໂອກາດ, ກຳພ້າ, ກຳພອຍ, ຄົນພິການ ລວມທັງແມ່ຍິງ, ເດັກນ້ອຍ ແລະ ຜູ້ທີ່ຢູ່ຫ່າງໄກສອກຫລຸກກ.
ປຸກລະດົມຂົນຂວາຍການບໍລິຈາກເລືອດແບບສະໝັກໃຈ ບໍ່ຫວັງສິ່ງຕອບແທນ ແມ່ນສິ່ງຈຳເປັນ, ເປັນວຽກທີ່ສຳຄັນ ແລະ ຂາດບໍ່ໄດ້ຢູ່ໃນສັງຄົມ, ການໃຫ້ເລືອດກໍຄືການໃຫ້ຊີວິດ ຕໍ່ລົມຫາຍໃຈໃຫ້ແກ່ຄົນເຈັບທີ່ຕ້ອງການເລືອດ, ຖ້າບໍ່ມີເລືອດພຽງພໍກໍບໍ່ສາມາດຊ່ວຍເຫຼືອກອບກູ້ຊີວິດຂອງຄົນເຈັບ.
ພ້ອມດຽວກັນນີ້, ລັດຖະບານ ກໍໄດ້ເອົາໃຈໃສ່ປະກອບບຸກຄະລາກອນ ແລະ ງົບປະມານ ສະໜັບສະໜູນວຽກງານກາແດງລາວ, ແຕ່ໃນເງື່ອນໄຂທີ່ໂກຕາລັດຖະກອນ ແລະ ງົບປະມານ ຍັງຈຳກັດ, ສະນັ້ນ ອົງການກາແດງແຫ່ງຊາດລາວ ຕ້ອງໄດ້ສູ້ຊົນຂົນຂວາຍສະມາຊິກ, ອາສາສະໝັກກາແດງ ໃຫ້ຫລາຍຂຶ້ນ ແລະ ເຊື້ອເຊີນເອົາຜູ້ຊົງຄຸນວຸດທິ ທີ່ສະໝັກໃຈເຮັດວຽກເພື່ອສັງຄົມ ໂດຍບໍ່ຮຽກຮ້ອງສິ່ງຕອບແທນ ມາຮ່ວມເຄື່ອນໄຫວວຽກງານດັ່ງກ່າວນີ້.
