ຈຳປາສັກ-ອຸບົນຣາຊະທານີ ຮ່ວມຈັດກິດຈະກຳສົ່ງເສີມກິລາ ແລະ ການທ່ອງທ່ຽວທີ່ວັດພູຈຳປາສັກ

ແຫລ່ງຂ່າວແຂວງຈຳປາສັກ ລາຍງານວ່າ:ວັນທີ 15 ມັງກອນ 2023 ທີ່ສະຖານບູຮານວັດພູຈຳປາສັກມໍລະດົກໂລກແຫ່ງທີ 2 ຂອງລາວ, ທ່ານ ສົມບູນ ເຮືອງວົງສາ ຮອງເຈົ້າແຂວງຈຳປາສັກ, ທ່ານ ສົມເພັດ ສ້ອຍສະຄູ ຮອງເຈົ້າແຂວງອຸບົນຣາຊະທານີ ພ້ອມຄະນະ, ທ່ານ ບົວທອງ ສຸວັນນະສານ ຫົວໜ້າພະແນກສຶກສາທິການ ແລະ ກິລາແຂວງຈຳປາສັກ, ຄະນະນຳຜູ້ບໍລິຫານການສຶກສາ ມະຫາວິທະຍາໄລຣາຊະພັດ,ຄູອາຈານ, ນັກກິລາມະຫາວິທະຍາໄລ, ວິທະຍາໄລ ,ນັກສະແດງສິລະປະວັດທະນະທຳຈຳປາສັກ-ອຸບົນ,ການນຳເມືອງ ແລະ ມວນຊົນເມືອງຈຳປາສັກ ຢ່າງຫລວງຫລາຍໄດ້ຂົ້າຮວມກິດຈະກຳສົ່ງເສີມກິລາ ແລະ ການທ່ອງທ່ຽວ ລະຫວ່າງແຂວງຈຳປາສັກ ສປປລາວ ກັບ ແຂວງອຸບົນຣາຊະທານີ ຣາຊາອານາຈັກໄທ .
ທ່ານ ສົມບູນ ເຮືອງວົງສາ ຮອງເຈົ້າແຂວງຈຳປາສັກ ກ່າວວ່າ: ການຈັດກິດຈະກຳກິລາ ແລະການທ່ອງ ທ່ຽວ ເປັນການເຊື່ອມໂຍງລະຫວ່າງແຂວງຈຳປາສັກ ແລະ ອຸບົນຣາ ຊະທານີ ໂດຍຈັດຂຶ້ນຢູ່ບົນດິນແດນອະລິຍະທຳ, ມໍລະດົກໂລກວັດພູຈຳປາສັກ. ແຂວງຈຳປາສັກເປັນແຂວງໜຶ່ງທີ່ຕັ້ງຢູ່ໃຕ້ສຸດຂອງສປປ ລາວ ມີຊາຍແດນຕິດຈອດກັບບັນດາແຂວງ ແລະ ປະເທດໃກ້ຄຽງ ຄື ທິດເໜືອຕິດກັບແຂວງສາລະວັນ, ທິດຕາ ເວັນອອກຕິດກັບແຂວງເຊກອງ ແລະ ແຂວງອັດຕະປື, ທິດໃຕ້ຕິດກັບຣາຊະນາຈັກກຳປູເຈຍ ແລະ ທິດຕາ ເວັນຕົກຕິດກັບຣາຊະນາຈັກໄທ; ມີເນື້ອທີ່ 15,350 ຕາກິໂລແມັດ ແບ່ງເປັນສອງເຂດໃຫຍ່ຄື ເຂດທົ່ງພຽງກວມ 74% ແລະ ເຂດພູພຽງກວມ 26%, ມີແຫຼ່ງທ່ອງທ່ຽວທາງທຳມະຊາດ, ວັດທະນະທຳແລະ ປະຫວັດສາດ 244 ແຫ່ງ. ພິເສດມີແຫຼ່ງທ່ອງທ່ຽວວັດພູຈຳປາສັກທີ່ເປັນມໍລະດົກໂລກແຫ່ງທີ 2 ຂອງ ສ ປປ ລາວ ຊຶ່ງຫລາຍປີຜ່ານມາ, ມີນັກທ່ອງທ່ຽວເຂົ້າມາທ່ຽວຊົມແຂວງຈຳປາສັກບໍ່ຫຼຸດ 7-8 ແສນ ເທື່ອຄົນຕໍ່ປີ ແລະ ສຳລັບ ປີ 2022 ມີນັກທ່ອງທ່ຽວ ເຂົ້າມາທ່ຽວ 191.908 ເທື່ອຄົນ.
ກິດຈະກຳທີ່ຈັດຮ່ວມກັນປະກອບມີ ຕ້ອນຮັບຂະບວນຄະລາວານລົດໃຫຍ່ ຈາກອຸບົນຣາຊະທານີມາແຂວງຈຳປາສັກ ໄລຍະທາງ 45 ກິໂລແມັດ ຜ່ານດ່ານຊ່ອງເມັກ-ວັງເຕົ່າ ເຂົ້າເຖິງນະຄອນປາກເຊ, ກິດຈະກຳແລ່ນໄລຍະທາງ 5 ກິໂລແມັດ, ແລ່ນມິນິມາລາທອນໄລຍະທາງ 10 ກິໂລແມັດ, ຂີ່ຖີບລົດ ໄລຍະທາງ 15 ກິໂລແມັດ, ກິລາເປຕັງ, ກິລາບານເຕະທີມອາວຸໂສ 11 ຄົນ ອາຍຸ 40 ປີຂຶ້ນໄປ ແລະ ການສະແດງສິລະປະຂອງມະຫາວິທະຍາໄລລາດຊະພັດ ແລະ ຄະນະສິລະປະກອນແຂວງຈຳປາສັກ.
ການຈັດກິດຈະກຳດັ່ງກ່າວເປັນການຊຸກຍູ້ສົ່ງເສີມການທ່ອງທ່ຽວ ແລະ ພັດທະນາກິລາ-ກາຍະກຳ ແລະ ເປັນການຮັດແໜ້ນຄວາມສາມັກຄີ ແລະ ດຶງດູດການທ່ອງທ່ຽວຕິດພັນກັບການສ້າງຂະບວນການຕ້ອນຮັບບຸນນະມັດສະການຜາສາດຫີນວັດພູ ປີ 2023 ທີ່ຈະຈັດຂຶ້ນໃນວັນທີ 3-5 ກຸມພານີ້ທັງເປັນການຫັນເອົາກິ ລາ-ກາຍະກຳ ລົງສູ່ທ້ອງຖິ່ນ ເພື່ອພັດທະນາຊັບພະຍາກອນມະນຸດໃຫ້ເຂັ້ມແຂງ, ມີພະລະນາໄມສົມບູນ, ປຸກລະດົມຊຸກຍູ້ທົ່ວສັງຄົມ ເປັນຕົ້ນຊາວໜຸ່ມ ແລະ ທຸກຊັ້ນຄົນໃຫ້ມາຫຼິ້ນກິລາຢ່າງກ້ວາງຂວາງເພື່ອຫຼີກຫ່າງຈາກສິ່ງເສບຕິດ ແລະ ເປັນການແກ້ໄຂປາກົດການຫຍໍ້ທໍ້ໃນສັງຄົມ.