ລາວ ຈະນຳໃຊ້ລະບົບອົບແຫ້ງພະລັງງານແສງຕາເວັນແປຮູບຜະລິດຕະພັນກະສິກຳ ແລະ ສິນຄ້າ ໂອດັອບ

ສະຖາບັນຄົ້ນຄວ້າພະລັງງານ ແລະ ບໍ່ແຮ່ ເປີດເຜີຍວ່າ: ເມື່ອບໍ່ດົນມານີ້, ສະຖາບັນຕົນ ໄດ້ນຳສະເໜີ “ໂຄງການພັດທະນາ ແລະ ສົ່ງເສີມການນຳໃຊ້ລະບົບອົບແຫ້ງພະລັງງານແສງຕາເວັນສໍາລັບແປຮູບຜະ ລິດຕະພັນກະສິກຳ ແລະ ສິນຄ້າໂອດັອບ” ເພື່ອແຈ້ງໃຫ້ຜູ້ມີສ່ວນກ່ຽວຂ້ອງຮູ້ເຖິງການລິເລີ່ມຈັດຕັ້ງປະຕິ ບັດໂຄງການດັ່ງກ່າວ ພາຍຫລັງໄດ້ຖືກຮັບຮອງ ແລະ ອະນຸມັດໂດຍການສະໜັບສະໜູນງົບປະມານຈາກ ກອງທຶນການຮ່ວມມືແມ່ຂອງ-ເກົາຫລີ ຊຶ່ງມີສະຖາບັນແມ່ນໍ້າຂອງເປັນອົງການບໍລິຫານ.

ທ່ານ ພູວຽງ ແກ້ວບຸບຜາ ຫົວໜ້າສະຖາບັນຄົ້ນຄວ້າພະລັງງານ ແລະ ບໍ່ແຮ່ ກ່າວວ່າ: ຈະຈັດຕັ້ງປະຕິບັດໂຄງການນີ້ 2 ປີເລີ່ມເດືອນມັງກອນ 2023 ຫາ ເດືອນທັນວາ 2024 ໂດຍສະຖາບັນຄົ້ນຄວ້າພະລັງງານ ແລະ ບໍ່ແຮ່ ເປັນໜ່ວຍງານຫລັກຈັດຕັ້ງປະຕິບັດ ແລະ ມີທີ່ປຶກສາຈາກພາຍໃນ ແລະ ຕ່າງປະເທດ ເພື່ອພັດທະນາ ແລະ ສົ່ງເສີມການນຳໃຊ້ເຕັກໂນໂລຊີເຄື່ອງອົບແຫ້ງພະລັງງານແສງຕາເວັນເພື່ອຍົກສູງຄຸນນະພາບຂອງຜົນຜະລິດກະສິກຳ ແລະ ຜະລິດຕະພັນອົບແຫ້ງໃຫ້ມີຄຸນນະພາບສູງໂດຍການໝູນໃຊ້ບົດຮຽນ ແລະ ປະສົບການຂອງສະຖາບັນເອງກໍຄືບົດຮຽນຂອງບັນດາປະເທດແມ່ນໍ້າຂອງ ເຊັ່ນປະເທດໄທ ລວມທັງ ສ ເກົາຫລີ ນຳມາດັດປັບໃຫ້ເຂົ້າກັບສະພາບເງື່ອນໄຂຂອງປະເທດ ແລະ ຄຸນລັກສະນະການອົບແຫ້ງຂອງຜະລິດຕະພັນແຕ່ລະຊະນິດເພື່ອໃຫ້ເກີດປະສິດທິພາບ ແລະ ປະສິດທິຜົນສູງສຸດ ທັງການນໍາໃຊ້ພະລັງງານ ແລະ ຄວາມກຸ້ມຄ່າທາງເສດຖະກິດ.  ປັດຈຸບັນ, ລັດຖະບານພວມສຸມໃສ່ຈັດຕັ້ງປະຕິບັດໂຄງການຄໍ້າປະກັນສະບຽງອາຫານ ແລະ ການຜະລິດເປັນສິນຄ້າເພື່ອຊົມໃຊ້ພາຍໃນ ແລະ ສົ່ງອອກຂາຍຕ່າງປະເທດເພື່ອໃຫ້ເປັນທີ່ຍອມຮັບຂອງຕະຫລາດ ແລະ ຕີຖອຍຂໍ້ອ້າງການປິດກັ້ນ, ແຂ່ງຂັນ ຫລື ຍາດແຍ່ງຕະຫລາດກັບຕ່າງປະເທດ ຊຶ່ງສິ່ງທ້າທາຍຄືບັນຫາຄຸນະພາບ, ຄວາມສະອາດ ແລະ ມາດຖານສິນຄ້າ. ສຳລັບຜົນຜະລິດກະສິກຳຄວາມຊຸ່ມເປັນບັນຫາສຳຄັນຕໍ່ຄຸນະພາບ ແລະ ການຮັກສາ. ນອກນີ້, ຜະລິດຕະພັນອົບແຫ້ງຍັງໄດ້ເອົາໃຈໃສ່ເລື່ອງຄວາມສະອາດປາສະຈາກສິ່ງປົນເປື້ອນ ແລະ ຖືກຫລັກອະນາໄມ.

ສຳລັບວິທີການອົບແຫ້ງ ຫລື ຕາກແຫ້ງໄດ້ນຳໃຊ້ມາດົນນານແລ້ວເພື່ອຊ່ວຍຫລຸດຜ່ອນຄວາມຊຸ່ມໃນວັດຖຸ ຫລື ຜົນຜະລິດກະສິກຳເຮັດໃຫ້ການເກັບຮັກສາໄວ້ໄດ້ດົນ, ຊ່ວຍແກ້ບັນຫາການເຊື່ອມຄຸນນະພາບ, ເຊື່ອມ ລາຄາຜົນຜະລິດ ແລະ ແກ້ໄຂບັນຫາຜົນຜະລິດລົ້ນຕະຫລາດໃນລະດູເກັບກ່ຽວ. ນອກນັ້ນ ຍັງແປຮູບເປັນ ຜະລິດຕະພັນອົບແຫ້ງເປັນສິນຄ້າເພື່ອເພີ່ມມູນຄ່າ ແລະ ສ້າງລາຍຮັບໄດ້ອີກທາງໜຶ່ງ ຊຶ່ງເຕັກນິກການອົບແຫ້ງສ່ວນໃຫຍ່ເຮັດແບບທຳມະຊາດໂດຍສະເພາະການຕາກແດດໂດຍກົງເພາະເປັນວິທີງ່າຍ ແລະ ຕົ້ນທຶນໜ້ອຍ, ແຕ່ຈະໄດ້ຜົນຜະລິດຄຸນນະພາບຕໍ່າ ແລະ ມີບັນຫາຄວາມສະອາດເພາະມີຂີ້ຝຸ່ນ, ສັດ, ແມງໄມ້, ແມງວັນລົບກວນ. ນອກນີ້, ການຕາກແຫ້ງຍັງຂຶ້ນກັບສະພາບອາກາດຖ້າຟ້າບົດ ຫລື ຝົນຕົກເຮັດໃຫ້ວັດຖຸບໍ່ແຫ້ງດີ ເກີດຄວາມສ່ຽງ ເກີດເຊື້ອລາ ແລະ ເນົ່າ.

ໂຄງການນີ້ໄດ້ອອກແບບ ແລະ ພັດທະນາເຄື່ອງອົບແຫ້ງໃຫ້ແທດເໝາະກັບການອົບແຫ້ງຜະລິດຕະພັນກະສິກຳແຕ່ລະຊະນິດໂດຍນຳໃຊ້ວັດຖຸດິບທີ່ຫາໄດ້ໃນທ້ອງຖິ່ນແນໃສ່ຫລຸດຜ່ອນຕົ້ນທຶນ ແລະ ກະສິກອນສາມາດຜະລິດໃຊ້ເອງໄດ້ເພື່ອສົ່ງເສີມການນໍາໃຊ້ເຕັກໂນໂລຊີອົບແຫ້ງໃຫ້ແກ່ກະສິກອນຫລຸດຜ່ອນການສູນເສຍ, ການເຊື່ອມຄຸນນະພາບ ແລະ ມູນຄ່າຂອງຜົນຜະລິດກະສິກຳຫລັງເກັບກ່ຽວ ເພື່ອເປັນການເພີ່ມມູນຄ່າໃຫ້ຜົນຜະລິດກະສິກໍາໂດຍການແປຮູບເປັນສິນຄ້າທັງເປັນການສ້າງຄວາມສາມາດໃຫ້ແກ່ນັກວິຊາການທ້ອງຖິ່ນໃນການບໍລິການໃຫ້ຄຳປຶກສາ, ອອກແບບເຄື່ອງອົບແຫ້ງ ແລະ ບໍລິການຕິດຕັ້ງເຄື່ອງອົບທີ່ແທດເໝາະກັບຄວາມຕ້ອງການຢູ່ທ້ອງຖິ່ນຂອງຕົນ.