ທໍນາໂດພັດຖະຫລົ່ມທາງຕອນໃຕ້ອາເມລິກາ ມີຜູ້ເສຍຊີວິດແລ້ວຢ່າງໜ້ອຍ 9 ຄົນ

ສໍານັກຂ່າວຕ່າງປະເທດລາຍງານວ່າ: ພາຍຸທໍນາໂດໄດ້ເຄື່ອນຕົວພັດຖະຫລົ່ມພື້ນທີ່ທາງຕອນໃຕ້ຂອງອາເມລິກາຢ່າງຕໍ່ເນື່ອງ ໂດຍສະເພາະເຂດລັດແອລະແບມາ ເຮັດໃຫ້ມີຜູ້ເສຍຊີວິດແລ້ວຢ່າງໜ້ອຍ 9 ຄົນ. ຫລ້າສຸດ ປະທານາທິບໍດີ ໂຈ ໄບເດນ ອະນຸມັດໃຫ້ປະກາດໃຊ້ສະຖານະການສຸກເສີນ ເນື່ອງຈາກໄພພິບັດໃນລັດດັ່ງກ່າວໄດ້ແລ້ວນັບແຕ່ເຊົ້າວັນທີ 15 ມັງກອນຕາມເວລາທ້ອງຖິ່ນ.

ໂດຍສູນບໍລິການດ້ານສະພາບອາກາດແຫ່ງຊາດອາເມລິກາ ເປີດເຜີຍວ່າ: ມີທໍນາໂດສູງເຖິງ 33 ຫົວທີ່ໄດ້ພັດຖະຫລົ່ມຫລາຍພື້ນທີ່ທົ່ວອາເມລິກາໃນບໍ່ເທົ່າໃດວັນຜ່ານມາ ໂດຍສະເພາະລັດທາງຕອນໃຕ້ ເຮັດໃຫ້ທາງການໃນລັດຈໍເຈຍ, ລັດນອດແຄໂຣໄລນາ, ລັດເຊົາແຄໂຣໄລນາ ເລີ່ມປະກາດເຕືອນໄພກ່ຽວກັບທໍນາໂດແລ້ວ.

ທ່ານ ເຄ ໄອວີ ເຈົ້າຄອງລັດແອລະແບມາ ໄດ້ປະກາດໃຊ້ສະຖານະການສຸກເສີນໃນ 6 ເຂດສໍາຄັນທີ່ໄດ້ຮັບຄວາມເສຍຫາຍຈາກທໍນາໂດຢ່າງໜັກ ບໍ່ວ່າຈະເປັນເຂດອໍເຕົາກາ, ແຊມເບີ, ໂກຊາ, ດັລລັສ, ເອລມໍ ແລະ ທັລລາໂປຊາ ໂດຍຜູ້ເສຍຊີວິດຢ່າງໜ້ອຍ 7 ຄົນ ອາໄສຢູ່ເຂດອໍເຕົາກາຂອງລັດແຫ່ງນີ້, ສ່ວນທ່ານ ໄບຣອັນ ເຄມ ເຈົ້າຄອງລັດຈໍເຈຍ ໄດ້ປະກາດໃຊ້ສະຖານະການສຸກເສີນເຊັ່ນດຽວກັນ ເຮັດໃຫ້ສະຖານທີ່ສຶກສາໃນລັດຈໍເຈຍຢຸດການຮຽນ-ການສອນຊົ່ວຄາວໃນວັນທີ 13 ມັງກອນຜ່ານມາ.

ທໍນາໂດເຫລົ່ານີ້ໄດ້ສ້າງຄວາມເສຍຫາຍຕໍ່ອາຄານບ້ານເຮືອນຈໍານວນບໍ່ໜ້ອຍ, ຫລາຍພື້ນທີ່ຕົ້ນໄມ້ໃຫຍ່ຫັກຂວາງເສັ້ນທາງສັນຈອນ, ບາງແຫ່ງນ້ຳຖ້ວມໜັກ, ເກີດດິນເຈື່ອນ ຖືເປັນໄລຍະເວລາທີ່ອາເມລິກາກໍາລັງຜະເຊີນໄພພິບັດທາງທຳມະຊາດຢ່າງໜັກ ນັບແຕ່ຕົ້ນປີ 2023 ເປັນຕົ້ນມາ, ທາງການຂາດ, ຕົວເລກຜູ້ເສຍຊີວິດ ແລະ ຂອບເຂດຄວາມເສຍຫາຍອາດຂະຫຍາຍເພີ່ມສູງຂຶ້ນອີກໃນອະນາຄົດອັນໃກ້.

ອ້າງອີງ:

https://www.cbsnews.com/…/tornado-alabama-georgia…/

https://www.reuters.com/…/biden-declares-emergency…/

https://www.accuweather.com/…/at-least-9-dead…/1468034