ການສ້າງຕັ້ງສະມາຄົມຊາວກະສິກອນລາວ ຈະຊ່ວຍຍົກສູງບົດບາດການຜະລິດກະສິກໍາເປັນສິນຄ້າຂອງລາວໃຫ້ສູງຂຶ້ນ

ທ່ານ ໄຊຍະມັງ ວົງສັກ ກໍາມະການ ສນຊ ສະໄໝທີ XI ຫົວໜ້າຄະນະທີ່ປຶກສາວຽກງານຂົນຂວາຍສ້າງຕັ້ງສະມາຄົມຊາວກະສິກອນລາວ ໄດ້ສະເໜີຜົນການຄົ້ນຄວ້າສ້າງຕັ້ງສະມາຄົມຊາວກະສິກອນລາວ  ຕໍ່ກອງປະຊຸມສາມັນຄົບຄະນະກຳມະການສູນກາງແນວລາວສ້າງຊາດ (ສນຊ) ຄັ້ງທີ 2 ສະໄໝທີ XI ໃນວັນທີ 12 ມັງກອນ 2023 ຜ່ານມານີ້ວ່າ:  ການສ້າງຕັ້ງສະມາຄົມຊາວກະສິກອນລາວ ແມ່ນຄວາມຈໍາເປັນພາວະວິໄສ ແມ່ນຄວາມຮຽກຮ້ອງຕ້ອງການຂອງໜ້າທີ່ການເມືອງ ແລະ ແມ່ນຄວາມຮຽກຮ້ອງຕ້ອງການຂອງຊາວກະສິກອນ.

ເພື່ອເຮັດໃຫ້ການຈັດຕັ້ງດັ່ງກ່າວໄດ້ຮັບການສ້າງຕັ້ງຂຶ້ນນັ້ນ ການນໍາພາ-ຊີ້ນໍາໂດຍກົງຂອງພັກ ແມ່ນມີຄວາມຈໍາເປັນ ແລະ ເລັ່ງດ່ວນ ເພາະຖ້າແກ່ຍາວເທົ່າໃດ ພວກເຮົາກໍຈະເສຍໂອກາດ ແລະ ຜົນປະໂຫຍດຫຼາຍເທົ່ານັ້ນ ຖ້າມີການຊັກຊ້າແກ່ຍາວ ຈະເຮັດໃຫ້ກໍາລັງແຮງສັງລວມໃນການຜະລິດກະສິກໍາເປັນສິນຄ້າຂອງປະເທດເຮົາບໍ່ເຂັ້ມແຂງ ບໍ່ສາມາດພັດທະນາກະສິກຳ-ຊາວກະສິກອນ-ຊົນນະບົດ ແລະ ແກ້ໄຂຄວາມທຸກຍາກຂອງປະຊາຊົນໃຫ້ຂາດຕົວໄດ້.

ເນື່ອງຈາກໃນໄລຍະຜ່ານມາ ການຈັດຕັ້ງທີ່ເຮັດບົດບາດເປັນຕົວແທນແຫ່ງສິດ ແລະ ຜົນປະໂຫຍດໂດຍກົງຂອງຊາວກະສິກອນ ແຕ່ຂັ້ນສູນກາງລົງຮອດທ້ອງຖິ່ນຮາກຖານຊົນນະບົດ ບ່ອນທຳການຜະລິດ ຍັງບໍ່ທັນໄດ້ຮັບການສ້າງຕັ້ງຂຶ້ນ ເພື່ອເຮັດບົດບາດປົກປ້ອງ ຄຸ້ມຄອງເຕົ້າໂຮມຄວາມສາມັກຄີ ພົວພັນຮ່ວມມືຊ່ວຍເຫຼືອເຊິ່ງກັນ ແລະ ກັນໃນຂະບວນການຜະລິດແຕ່ຕົ້ນທາງຈົນຮອດປາຍທາງ ສ່ວນຫຼາຍມີພຽງແຕ່ການຈັດຕັ້ງເປັນກຸ່ມ ເປັນສະຫະກອນ ເປັນສະມາຄົມການຜະລິດ ແລະ ອື່ນໆ ເຊິ່ງບໍ່ມີອຳນາດໃນການຕໍ່ລອງ ຖືກເອົາລັດເອົາປຽບ ຖືເບົາການເຄື່ອນໄຫວຂອງຊາວກະສິກອນ ກ້າວໄປເຖິງບໍ່ມີຖານະເປັນການຈັດຕັ້ງ ຈຶ່ງຂາດອົງປະກອບ ແລະ ເງື່ອນໄຂຕ່າງໆໃນການພົວພັນຮ່ວມມື ການເຂົ້າເຖິງແຫຼ່ງທຶນ ການປົກປ້ອງສິດ ແລະ ຜົນປະໂຫຍດຕ່າງໆ ດ້ວຍເຫດນີ້ ຈຶ່ງມີຄວາມຈຳເປັນໃນການຄົ້ນຄວ້າ ສ້າງຕັ້ງສະມາຄົມຊາວກະສິກອນລາວຂຶ້ນ ເຊິ່ງແມ່ນອົງການຈັດຕັ້ງການເມືອງ-ສັງຄົມ ແລະ ທຸລະກິດ ເພື່ອເຮັດບົດບາດໃນການປົກປ້ອງສິດ ແລະ ຜົນປະໂຫຍດ ສຶກສາອົບຮົມ ເຕົ້າໂຮມຄວາມສາມັກຄີຊາວກະສິກອນຢູ່ຂັ້ນຕ່າງໆໃຫ້ມີຄວາມໜັກ ແໜ້ນເຂັ້ມແຂງທາງດ້ານການເມືອງ ແນວຄິດ ແລະ ການຈັດຕັ້ງ ເພື່ອປັບປຸງ ແລະ ເສີມຂະຫຍາຍກຳລັງການຜະລິດຢູ່ຮາກຖານຊົນນະບົດ ໃຫ້ສອດຄ່ອງກັນສະພາບ ແລະ ເງື່ອນໄຂໃໝ່.

ຖ້າສະມາຄົມຊາວກະສິກອນລາວ ໄດ້ຮັບການສ້າງຕັ້ງຂຶ້ນ ຈະເປັນການເພີ່ມທະວີບົດບາດການນໍາພາຂອງພັກຕໍ່ຊົນຊັ້ນຊາວກະສິກອນ ສ້າງໃຫ້ຖັນແຖວຊາວກະສິກອນມີການຈັດຕັ້ງທີ່ເປັນຂອງຕົນເອງ ເພື່ອເຮັດບົດບາດ ໜ້າທີ່ໃນການປົກປ້ອງສິດ ແລະ ຜົນປະໂຫຍດ ກໍຄືການເສີມຂະຫຍາຍສິດເປັນເຈົ້າຕົນເອງ ຊາວກະສິກອນສາມາດເຂົ້າເຖິງສິນເຊື່ອ ເຕັກນິກ ວິຊາການ ແລະ ການບໍລິການອື່ນໆຂອງລັດຖະບານ ແນໃສ່ປັບປຸງຊີວິດການເປັນຢູ່ຂອງຖັນແຖວຊາວກະສິກອນໃຫ້ດີຂຶ້ນ ກໍາລັງການຜະລິດດ້ານກະສິກໍາມີຂະໜາດໃຫຍ່ຂຶ້ນ ກາຍເປັນກໍາລັງແຮງສັງລວມໃນການຂັບເຄື່ອນເສດຖະກິດແຫ່ງຊາດ ສະນັ້ນ ຈຶ່ງຂໍສະເໜີມາຍັງບັນດາທ່ານຄະນະກໍາມະການ ສນຊ ພິຈາລະນາ ແລະ ປະກອບຄໍາເຫັນຕໍ່ການສ້າງຕັ້ງອົງການດັ່ງກ່າວ ເພື່ອຈະນຳເອົາຄໍາເຫັນຂອງບັນດາທ່ານ ສືບຕໍ່ລາຍງານຂໍການຊີ້ນໍາ ແລະ ການຕົກລົງຂອງຂັ້ນເທິງໃນຂັ້ນຕໍ່ໄປ.