ຟີຟາ ສັ່ງສອບສວນກໍລະນີ ມາຕີເນສ ສະແດງພຶດຕິກຳບໍ່ເຫມາະສົມນັດຊີງບານໂລກ

ຟີຟາ ສັ່ງສອບສວນກໍລະນີນັກເຕະອາເຈນຕີນາ ສະແດງພຶດຕິກຳບໍ່ເຫມາະສົມລະຫວ່າງນັດຊີງຊະນະເລີດບານໂລກ 2022 ແລ້ວ, ຖ້າຫາກມີຄວາມຜິດແທ້ ມີໂອກາດຖືກປັບແນ່ນອນ.

ສະຫະພັນບານເຕະນາໆຊາດ ຫລື FIFA ສັ່ງໃຫ້ດຳເນີນການສອບສວນເລື່ອງການສະແດງພຶດຕິກຳບໍ່ເຫມາະສົມຂອງນັກເຕະທີມຊາດອາເຈນ ຕີນາລະ ຫວ່າງການແຂ່ງຂັນບານໂລກ 2022 ນັດຊີງຊະນະເລີດທີ່ພວກເຂົາຍິງລູກໂທດເອົາຊະນະ ຝຣັ່ງ 4-2 ຫລັງສະເຫມີກັນໃນ 120 ນາທີ 3-3 ເມື່ອວັນທີ 18 ທັນວາທີ່ຜ່ານມາ.

ຄະນະກຳມະການຄວບຄຸມວິໄນຂອງຟີຟາ ພວມດຳເນີນການສອບສວນນັກເຕະອາເຈນຕີນາ ໃນຂໍ້ຫາລະເມີດກົດແຟເພລ ແລະ ການສະແດງພຶດ ຕິກຳບໍ່ເຫມາະສົມຕໍ່ຜູ້ຫລິ້ນຝ່າຍຄູ່ແຂ່ງ ຫລື ຜູ້ຕັດສິນ ເຊິ່ງຫາກພົບວ່າມີຄວາມຜິດແທ້ ສະມາຄົມບານເຕະອາເຈນຕີນາ ກໍມີສິດຈະຖືກລົງໂທດ ດ້ວຍການປັບເງິນຈຳນວນຫລາຍ.

ຂະນະທີ່ ເອມິເລຍໂນ ມາຕີເນສ ຜູ້ຮັກສາປະຕູມືກາວຈອມລີລາ ກໍມີສິດຈະຖືກປັບເຊ່ັນດຽວກັນ ຈາກການສະແດງພຶດຕິກຳບໍ່ເຫມາະສົມໃນ ໄລຍະຍິງລູກໂທດບໍ່ວ່າຈະເປັນການເຕັ້ນເຍາະເຍີ້ຍນັກເຕະຝຣັ່ງ ຫລັງຍິງລູກໂທດພາດ ຫລື ການຂວ້າງບານຖິ້ມຂະນະທີ່ ໂອເລຣຽງ ຊູອາເມນີ ພວມຈະຍິງລູກໂທດ ແລະຍັງສະແດງກິລິຍາຫຍາບຄາຍຫລັງໄດ້ຮັບລາງວັນຖົງມືຄຳນຳອີກ.

ນອກຈາກນີ້ ຜູ້ຮັກສາປະຕູແອສຕັນ ວິລລາ ຍັງສະແດງຄວາມບໍ່ມີນຳ້ໃຈເປັນນັກກິລາດ້ວຍການອອກມາເຍາະເຍີຍ ຄີລຽນ ເອັມບັບເປ ດາວຍິງຝຣັ່ງຫລາຍຄັ້ງ ໂດຍສະເພາະການອູ້ມຕຸກກະຕາ ເດັກນ້ອຍທີ່ທີ່ມີໃບໜ້າຂອງ ເອັມບັບເປ ຕິດຢູ່ແຫ່ໄປໃນຂະບວນສະຫລອງແຊ໊ມໂລກ ໃນນະຄອນຫລວງບົວໂນສ ໄອເຣສ.

ນອກຈາກນີ້ ຟີຟາ ຍັງສັ່ງລົງໂທດສະມາຄົມບານເຕະເມັກຊິໂກ ດ້ວຍການປັບເງິນເຖິງ 88,000 ປອນ ແລະ ສັ່ງໃຫ້ປິດສະໜາມເຕະອີກ 1 ນັດຈາກກໍລະນີມີການຮ້ອງດ່າສຽດສີເພດໃນຫມູ່ກອງເຊຍເມັກຊີໂກ.

ສ່ວນ ເຊີເບຍ ແລະ ເອກວາດໍ ກໍຖືກລົງໂທດສັ່ງປິດສະໜາມເຕະບາງສ່ວນ ແລະ ປັບເງິນອີກຊາດລະ 44,000 ປອນ ແລະ 18,000 ປອນ ຕາມລຳດັບໃນຄວາມຜິດຖານສຽດສີເພດເຊ່ັນດຽວກັນ ຂະນະທີ່ ໂຄຣເອເຊຍ ກໍພວມຖືກສອບສວນຖານຕ້ອງສົງໄສວ່າ ໜ້າຈະລະເມີດ ກົດເລື່ອງການສຽດສີເພດລະຫວ່າງເກມຊີງອັນດັບ 3 ກັບ ໂມຣ໊ອກໂກ.