ຫວຽດນາມສ້າງສະຖິຕິສົ່ງອອກກາເຟ 1,77 ລ້ານໂຕນ ໃນປີ 2022
ສະຖິຕິການສົ່ງອອກກາເຟຂອງຫວຽດນາມໃນປີຜ່ານມາ ບັນລຸ 1,77 ລ້ານໂຕນ ສ້າງລາຍໄດ້ເຂົ້າປະເທດຫລາຍກວ່າ 4.000 ລ້ານໂດລາສະຫະລັດ.
ວັນທີ 14 ມັງກອນ, ສໍານັກຂ່າວຊິນຮົວລາຍງານວ່າ: ລາຍງານໂດຍໜັງສືພິມ ຫວຽດນາມ ນິວ ລະບຸວ່າ: ຫວຽດນາມສົ່ງອອກກາເຟ 1,77 ລ້ານໂຕນ ໃນປີຜ່ານມາຄິດເປັນມູນຄ່າການຊື້ຂາຍຫລາຍກວ່າ 4.000 ລ້ານໂດລາສະຫະລັດ ເພີ່ມຂຶ້ນ 13,8% ໃນດ້ານປະລິມານ ແລະ 32% ໃນດ້ານມູນຄ່າການຊື້ຂາຍ ເມື່ອທຽບໃສ່ສະຖິຕິຂອງປີ 2021.
ຂະນະທີ່ຂໍ້ມູນຈາກສໍານັກງານພາສີອາກອນຫວຽດນາມ ລະບຸວ່າ: ສະຫະພາບເອີຣົບ (EU) ຍັງເປັນຕະຫລາດຜູ້ບໍລິໂພກກາເຟລາຍໃຫຍ່ທີ່ສຸດຂອງຫວຽດນາມ ໂດຍກວມອັດຕາ 39% ຂອງປະລິມານການສົ່ງອອກທັງໝົດ. ຂະນະທີ່ການເປີດຊາຍແດນຂອງຈີນນັບແຕ່ວັນທີ 8 ມັງກອນຜ່ານມາ ຍັງຖືເປັນໂອກາດຊ່ວຍໃຫ້ການສົ່ງອອກກາເຟຂອງຫວຽດນາມ ມີທ່າອ່ຽງຟື້ນການເຕີບໃຫຍ່ໃນຕະຫລາດນີ້ໄດ້ ພາຍໃນອະນາຄົດອັນໃກ້.
ຂະນະທີ່ການສົ່ງອອກໄລຍະຕົ້ນປີການປູກຝັງ 2022-2023 ຂ້ອນຂ້າງຢູ່ໃນລະດັບດີ, ແຕ່ການຄາດຄະເນບາງສ່ວນຊີ້ວ່າ: ການສົ່ງອອກກາເຟໃນປີນີ້ອາດຫລຸດລົງ ເນື່ອງຈາກອຸປະທານມີບໍ່ຫລາຍຄືປີກ່ອນໜ້າ. ນອກຈາກນີ້ ລາຄາກາເຟມີທ່າອ່ຽງປັບຫລຸດລົງ ເນື່ອງຈາກອຸປະສົງ ແລະ ອຸປະທານກາເຟປ່ຽນຈາກສະພາບຂາດເຂີນເປັນສ່ວນເກີນ.
ລາຄາສົ່ງອອກກາເຟໂລກໃນປີຜ່ານມາ ສ້າງສະຖິຕິສູງທີ່ສຸດໃນຮອບຫລາຍປີ ໂດຍສະເລ່ຍຢູ່ 2.282 ໂດລາຕໍ່ໂຕນ ເພີ່ມຂຶ້ນ 16% ເມື່ອທຽບໃສ່ແຕ່ລະປີ.
