ສະພາການຄ້າ ແລະ ອຸດສາຫະກຳແຫ່ງຊາດລາວ ເລັງລົງທຶນສ້າງໂລຈິກສະຕິກ ແລະ ນິຄົມອຸດສາຫະກຳ ແລະ ການຄ້າຢູ່ແຂວງອຸດົມໄຊ

ແຫລ່ງຂ່າວຈາກແຂວງອຸດົມໄຊ ລາຍງານວ່າ: ວັນທີ 12 ມັງກອນ, ທ່ານ ອຸເດດ ສຸວັນນະວົງ ປະທານສະພາການຄ້າ ແລະ ອຸດສາຫະກຳແຫ່ງຊາດລາວ ພ້ອມດ້ວຍຮອງປະທານສະພາການຄ້າ ແລະ ອຸດສາ ຫະກຳແຫ່ງຊາດລາວ, ປະທານບໍລິສັດ ພີທີແອວ ໂຮນດິ້ງຈຳກັດ ແລະ ຄະນະ ໄດ້ລາຍງານຕໍ່ທ່ານ ບຸນຄົງ ຫລ້າຈຽມພອນ ເຈົ້າແຂວງອຸດົມໄຊ ກ່ຽວກັບການເຄື່ອນໄຫວ ແລະ ເຮັດວຽກຢູ່ແຂວງອຸດົມໄຊ ເພື່ອສຶກສາຄວາມເປັນໄປໄດ້ລົງທຶນພັດທະນາສ້າງໂລຈິກສະຕິກ ແລະ ນິຄົມອຸດສາຫະກຳ ແລະ ການຄ້າ.

ເຈົ້າແຂວງໆອຸດົມໄຊ ໄດ້ຊີ້ໃຫ້ເຫັນຈຸດພິເສດ ແລະ ການພັດທະນາແຂວງເພື່ອເປັນຂໍ້ມູນພື້ນຖານໃຫ້ແກ່ ການສຶກສາ, ສຳຫລວດຄວາມເປັນໄປໄດ້ພັດທະນາໂຄງການຕ່າງໆໃນຕໍ່ໜ້າ ຊຶ່ງອຸດົມໄຊ ເປັນແຂວງໃຈ ກາງທາງຜ່ານຂອງບັນດາແຂວງພາກເໜືອ, ຕິດກັບ 5 ແຂວງຄື ທິດຕາເວັນອອກຕິດກັບແຂວງຫລວງພະບາງ, ທິດຕາເວັນຕົກຕິດກັບແຂວງບໍ່ແກ້ວ-ແຂວງຫລວງນ້ຳທາ, ທິດໃຕ້ຕິດກັບແຂວງໄຊຍະບູລີ ແລະທິດ ເໜືອ ຕິດກັບແຂວງຜົ້ງສາລີ ແລະ ສປ ຈີນ ໂດຍມີເງື່ອນໄຂສະດວກໃຫ້ແກ່ການຄົມມະນາຄົມ, ການໄປ ມາຫາສູ່, ການຂົນສົ່ງທາງບົກ, ທາງເຮືອ, ລົດໄຟ ໄປບັນດາແຂວງໃກ້ຄຽງ ແລະ ອອກສູ່ປະເທດອ້ອມຂ້າງເຊັ່ນ: ສປ ຈີນ, ສສ ຫວຽດນາມ ແລະ ຣາຊະອານາຈັກໄທ ແລະ ຈະເປັນທ່າແຮງຕໍ່ການພັດທະນາໃນອະນາຄົດ ໂດຍສະເພາະການສ້າງຕົວເມືອງທັນສະໄໝ, ເມືອງທ່ອງທ່ຽວ, ນິຄົມອຸດສາຫະກຳຕ່າງໆ.