ທ່ານ ຮັນ ດອກ ຊູ ສົ່ງສານສະແດງຄວາມຊົມເຊີຍເຖິງ ທ່ານ ສອນໄຊ ສີພັນດອນ ທີ່ໄດ້ຮັບຕຳແໜ່ງ ນາຍົກລັດຖະມົນຕີ ຄົນໃໝ່

ວັນທີ 9 ມັງກອນ 2023 ນີ້, ທ່ານ ສອນໄຊ ສີພັນດອນ ນາຍົກລັດຖະມົນຕີ ແຫ່ງສາທາລະນະລັດ ປະຊາທິປະໄຕ ປະຊາຊົນລາວ ໄດ້ຮັບສານສະແດງຄວາມຊົມເຊີຍຈາກ ທ່ານ ຮັນ ດອກ ຊູ ນາຍົກລັດຖະມົນຕີ ແຫ່ງສາທາລະນະລັດ ເກົາຫລີ ໃນໂອກາດທີ່ໄດ້ຮັບການແຕ່ງຕັ້ງ ເປັນນາຍົກລັດຖະມົນຕີ ແຫ່ງສາທາລະນະລັດ ປະຊາທິປະໄຕ ປະຊາຊົນລາວ ຄົນໃໝ່.

ເນື້ອໃນສານໄດ້ລະບຸວ່າ: ຂ້າພະເຈົ້າ ຂໍຕາງໜ້າລັດຖະບານ ແລະ ປະຊາຊົນ ແຫ່ງສາທາລະນະລັດເກົາຫລີ ສະແດງຄວາມປິຕິຍິນດີ ທີ່ທ່ານໄດ້ຮັບການແຕ່ງຕັ້ງ ເປັນນາຍົກລັດຖະມົນຕີ ແຫ່ງສາທາ ລະນະລັດ ປະຊາທິປະໄຕ ປະຊາຊົນລາວ.

ຂ້າພະເຈົ້າ ເຊື່ອໝັ້ນວ່າ: ພາຍໃຕ້ການຊີ້ນຳ-ນຳພາ ອັນປີຊາສາມາດຂອງທ່ານ ຜູ້ມີປະສົບປະ ການທີ່ຫລວງຫລາຍ, ຈະເຮັດໃຫ້ ສປປ ລາວ ສາມາດຈັດຕັ້ງປະຕິບັດແຜນພັດທະນາເສດຖະກິດ-ສັງ ຄົມ ແຫ່ງຊາດ ຄັ້ງທີ 9 ໄດ້ຢ່າງປະສົບຜົນສຳເລັດ ແລະ ເຮັດໃຫ້ ສປປ ລາວ ມີຄວາມຈະເລີນຮຸ່ງເຮືອງ ຂຶ້ນຕື່ມອີກ.

ຂ້າພະເຈົ້າ ຮູ້ສຶກດີໃຈ ທີ່ສາຍພົວພັນຮ່ວມມືທາງດ້ານການຄ້າ, ການລົງທຶນ, ການພັດທະນາ ແລະ ການແລກປ່ຽນຢ້ຽມຢາມ ເຊິ່ງກັນ ແລະ ກັນ ລະຫວ່າງ ສອງປະເທດ ໄດ້ຮັບການເສີມຂະຫຍາຍ ເປັນບາດກ້າວ ຢ່າງຕໍ່ເນື່ອງ ພາຍໃຕ້ບັນຍາກາດໄມຕີຈິດ-ມິດຕະພາບ ນັບແຕ່ສາທາລະນະລັດເກົາຫລີ ແລະ ສປປ ລາວ ໄດ້ສ້າງຕັ້ງສາຍພົວພັນການທູດ ໃນປີ 1995 ເປັນຕົ້ນມາ. ຫວັງວ່າ ຕໍ່ໄປນີ້ ຈະໄດ້ຮ່ວມມືກັບທ່ານນາຍົກລັດຖະມົນຕີ ເພື່ອເສີມຂະຫຍາຍການພົວພັນຂອງ ສອງປະເທດ ໃຫ້ມີບາດກ້າວຂະຫຍາຍຕົວ ຂຶ້ນຕື່ມ.

ຂ້າພະເຈົ້າ ຂໍຖືໂອກາດນີ້, ສະແດງຄວາມຂອບໃຈ ທີ່ ສປປ ລາວ ໄດ້ໃຫ້ການສະໜັບສະໜູນ ທີ່ສຳຄັນ ຕໍ່ການສະເໜີເປັນເຈົ້າພາບຈັດງານວາງສະແດງໂລກບູຊານ ປີ 2030 ຂອງ ສ ເກົາຫລີ, ງານວາງສະແດງໂລກບູຊານ ປີ 2030 ຈະເປັນເວທີທີ່ສຳຄັນ ໃນການແລກປ່ຽນບົດຮຽນ ແລະ ປະສົບການກ່ຽວກັບການພັດທະນາຂອງ ສ ເກົາຫລີ ພ້ອມທັງ ນຳສະເໜີວິໄສທັດ ກ່ຽວກັບການພັດທະນາ ແບບຍືນຍົງ ໂດຍໃນໂອກາດດັ່ງກ່າວ ສ ເກົາຫລີ ຈະສືບຕໍ່ຮ່ວມມືກັບ ສປປ ລາວ ເພື່ອເສີມຂະຫຍາຍການພົວພັນຮ່ວມມື ໃນຕໍ່ໜ້າ.

ອີກເທື່ອໜຶ່ງ, ຂໍສະແດງຄວາມຊົມເຊີຍທີ່ທ່ານ ໄດ້ຮັບການແຕ່ງຕັ້ງເປັນນາຍົກລັດຖະມົນຕີຄົນໃໝ່ຂອງ ສປປ ລາວ, ຂໍອວຍພອນໄຊ ອັນປະເສີດ ໃຫ້ທ່ານ ຈົ່ງມີພະລານາໄມສົມບູນ, ມີຄວາມຜາສຸກ ໃນຊີວິດ ແລະ ຂໍໃຫ້ສາທາລະນະລັດ ປະຊາທິປະໄຕ ປະຊາຊົນລາວ ຈົ່ງຈະເລີນຮຸ່ງເຮືອງ ຕະຫລອດໄປ.