ປີ 2022 ທົ່ວປະເທດ ມີຜູ້ຕິດເຊື້ອພະຍາດໄຂ້ຍຸງລາຍ 32.000 ກວ່າຄົນ ແລະ ເສຍຊີວິດ 24 ຄົນ

ອີງຕາມການລາຍງານຂອງສູນຂ່າວສານການແພດສຸຂະສຶກສາ ກະຊວງສາທາລະນະສຸກໄດ້ສະຫລຸບລາຍງານກ່ຽວກັບການຕິດເຊື້ອພະຍາດໄຂ້ຍຸງລາຍ ທົ່ວປະເທດ ໃນໄລຍະ 1 ປີຜ່ານມາໃຫ້ຮູ້ວ່າ: ເລີ່ມແຕ່ວັນທີ 1 ມັງກອນ ຫາ 31 ທັນວາ 2022 ທົ່ວປະເທດມີຜູ້ຕິດເຊື້ອພະຍາດໄຂ້ຍຸງລາຍສະສົມ 32.364 ຄົນ ແລະ ເສຍຊີວິດສະສົມ 24 ຄົນ. ໃນນັ້ນ, ຕິດເຊື້ອຫລາຍກວ່າໝູ່ແມ່ນນະຄອນຫລວງວຽງຈັນ 15.358 ຄົນ, ເສຍຊີວິດ 6 ຄົນ, ແຂວງຫລວງນໍ້າທາ 4.899 ຄົນ, ເສຍຊີວິດ 5 ຄົນ, ຫລວງພະບາງ 1.759 ຄົນ ບໍ່ມີຄົນເສຍຊີວິດ, ອັດຕະປື 1.601 ຄົນ, ເສຍຊີວິດ 6 ຄົນ ແລະ ແຂວງອື່ນໆຕາມລຳດັບ.

ພະຍາດໄຂ້ຍຸງລາຍ ຫລື ພະຍາດໄຂ້ເລືອດອອກ ເປັນໜຶ່ງພະຍາດທີ່ສາມາດຕິດຕໍ່ໃສ່ຄົນໄດ້ໂດຍຜ່ານໂຕຍຸງທີ່ນຳເຊື້ອພະຍາດ ຫລື ເຊື້ອໄວຣັສມາກັດເຮັດໃຫ້ເກີດເປັນໄຂ້ຍຸງລາຍ ແລະ ພະຍາດດັ່ງກ່າວເກີດລະບາດຂຶ້ນຫລາຍທີ່ສຸດແມ່ນໄລຍະລະດູຝົນ.

ດັ່ງນັ້ນກໍຂໍໃຫ້ປະຊາຊົນສືບຕໍ່ເອົາໃຈໃສ່ເປັນເຈົ້າການປະຕິບັດມາດຕະການປ້ອງກັນພະຍາດໄຂ້ຍຸງລາຍຢ່າງເຂັ້ມງວດ ໂດຍສະເພາະການປະຕິບັດຫລັກການ 5 ປ ທີ່ກະຊວງສາທາລະນະສຸກວາງອອກຢ່າງເຂັ້ມງວດ ເພື່ອບໍ່ໃຫ້ນໍາຄວາມສູນເສຍຊີວິດມາສູ່ຄົນທີ່ເຮົາຮັກ, ຖ້າປະຕິບັດໄດ້ຍັງເຮັດໃຫ້ການແຜ່ລະບາດຂອງພະຍາດໄຂ້ຍຸງລາຍຫລຸດໜ້ອຍລົງ, ທີ່ສຳຄັນຖ້າຄົນໃນຄອບຄົວບໍ່ສະບາຍ ຫລື ເປັນໄຂ້ ບໍ່ຄວນຊື້ຢາມາກິນເອງ, ຄວນໄປພົບແພດ ໂດຍດ່ວນຢູ່ໂຮງໝໍເມືອງ, ແຂວງ, ສຸກສາລາໃກ້ບ້ານທ່ານເພື່ອກິນຢາຕາມແພດສັ່ງ ແລະ ປິ່ນປົວໃຫ້ທັນເວລາ, ຖ້າເປັນໄຂ້ຍຸງລາຍບໍ່ໄດ້ຮັບການປິ່ນປົວໃຫ້ຖືກວິທີ ແລະ ທັນເວລາກໍເຮັດໃຫ້ເສຍຊີວິດໄດ້.