ສານກິລາຢືນຢັນລົງໂທດຫ້າມ ເລວານດອບສະກີ ລົງສະໜາມ 3 ນັດ ຫລັງຖືກໃບແດງໃນເກມພົບ ໂອເຊຊູນາ
ບາເຊໂລນາ ພົບກັບບັນຫາໜັກ ຫລັງສານກິລາຂອງສະເປນ ຕັດສິນຢືນຢັນລົງໂທດຫ້າມ ໂຣເບີດ ເລວານດອບສະກີ 3 ນັດ ຈາກການຖືກໄລ່ອອກ ໃນເກມພົບກັບ ໂອຊາຊູນາ ຕັ້ງແຕ່ກ່ອນບານໂລກ.
ບາເຊໂລນາ ທີມໃຫຍ່ແຫ່ງເວທີ ລາ ລີກາ ຕ້ອງພົບກັບຂ່າວຮ້າຍ ຫລັງສານກິລາສະເປນ ຢືນຢັນບົດລົງໂທດຫ້າມ 3 ນັດຂອງ ໂຣເບີດ ເລວານດອບສະກີ ກອງໜ້າທຕົວເກ່ັງຂອງທີມ ສົ່ງຜົນໃຫ້ດາວຍິງທີມຊາດໂປແລນ ຈະຫມົດສິດລົງຊ່ວຍທີມໃນເກມລີກ 3 ນັດຖັດໄປ ເຊິ່ງທີມຈະພົບກັບ ແອັດເລຕີໂກ ມາດຣິດ, ເກຕາເຟ ແລະ ຄິໂຣນາ.
ເລວານດອບສະກີ ຖືກໃບເຫລືອງທີສອງ ກາຍເປັນໃບແດງໄລ່ອອກຈາກສະໜາມ ຈາກການງ້າງສອກໃສ່ ດາວິດ ກາເຊຍ ນັກເຕະຂອງ ໂອຊາຊູນາ ໃນເກມລີກນັດທີ່ທີມເອົາຊະນະ 2-1 ໃນໄລຍະກ່ອນການແຂ່ງຂັນບານໂລກ ເມື່ອໄລຍະເດືອນພຶດສະພາທີ່ຜ່ານມາ ແນວໃດກໍຕາມ ສະຫະພັນບານເຕະສະ ເປນ ສັ່ງລົງໂທດລາວເພີ່ມອີກ 2 ນັດ ເປັນ 3 ນັດ ໂທດຖານສະແດງພຶດຕິກຳບໍ່ເຫມາະສົມໃສ່ຜູ້ຕັດສິນ.
ແນວໃດກໍຕາມ ບາເຊໂລນາ ຕັດສິນໃຈຍື່ນອຸທອນບົດລົງໂທດດັ່ງກ່າວຕໍ່ສານກິລາໃນສະເປນ ແລະ ມີຄຳສັ່ງໃຫ້ລະງັບໂທດດັ່ງກ່າວເປັນການຊ່ົວຄາວ ລະຫວ່າງການພິຈາລະນາຄຳອຸທອນ ສົ່ງຜົນໃຫ້ ເລວານດອບສະກີ ສາມາດລົງສະໜາມໄດ້ໃນເກມລີກນັດດາບີ້ແມັດ ນັດທີ່ທີມເປີດສະໜາມສະເຫມີ ເອສປັນຢອນ 1-1 ເມື່ອໄລຍະທ້າຍອາທິດທີ່ຜ່ານມາ ເຊິ່ງສ້າງຄວາມບໍ່ພໍໃຈໃຫ້ກັບປະທານສະໂມສອນ ແລະ ຄະນະບໍລິຫານຂອງ ເອສປັນຢອນ ເປັນ ຢ່າງຫລາຍ.
