ປິດຂົວນ້ຳຊ່ວງ ເມືອງນາຊາຍທອງ ຊົ່ວຄາວ ແຕ່ວັນທີ 4 ມັງກອນ ຫາ 15 ກຸມພາ 2023
January 4, 2023 - 4:06 PM
ວັນທີ 3 ມັງກອນ 2023 ນີ້, ບໍລິສັດຮັບເໝົາກໍ່ສ້າງໄດ້ປະກາດປິດຂົວນ້ຳຊ່ວງ ເຂດບ້ານນາງ່າ ເມືອງນາຊາຍທອງ ນະຄອນຫລວງວຽງຈັນ (ເສັ້ນທາງ 13 ເໜືອ) ຊົ່ວຄາວ ຕັ້ງແຕ່ວັນທີ 4 ມັງກອນ ຫາ 15 ກຸມພາ 2023 ເພື່ອເຮັດໃຫ້ໂຄງການກໍ່ສ້າງຂົວໃນໂຄງການກໍ່ສ້າງເສັ້ນທາງເລກທີ 13 ເໜືອ ໃຫ້ສຳເລັດຕາມແຜນການທີ່ໄດ້ກຳນົດໄວ້ ປະຊາຊົນ ຫລື ຜູ້ສັນຈອນທົ່ວໄປທີ່ຈຸດປະສົງທີ່ຈະເດີນທາງໄປ-ມາ ຜ່ານຈຸດດັ່ງກ່າວ ແມ່ນໃຫ້ໃຊ້ທາງເວັ້ນຕາມປ້າຍແຈ້ງເຕືອນຢູ່ຈຸດຕ່າງໆທີ່ທາງບໍລິສັດກຳນົດໃຫ້ ດັ່ງນີ້:
- ສຳລັບລົດທີ່ຕໍ່າກວ່າ 3 ໂຕນ ຫລື ລົດສາມລໍ້, ລົດຈັກ ສາມາດຜ່ານທາງເວັ້ນຊົ່ວຄາວ ຢູ່ຈຸດທີ່ມີການກໍ່ສ້າງຂົວໄດ້ເລີຍ
- ສຳລັບລົດທີ່ເດີນທາງມາແຕ່ທາງນະຄອນຫລວງ ເປັນຕົ້ນລົດບັນທຸກໜັກ, ລົດເມໃຫຍ່ ໄປເວັ້ນຢູ່ສະຖານີທາງດ່ວນນາຊອນ ແລ້ວອອກຢູ່ສະຖານີບ້ານບົວ, ຖ້າເປັນລົດຕ່ຳກວ່າ 10 ໂຕນ ເວັ້ນຢູ່ບ້ານຫ້ວຍນ້ຳເຢັນ ແລ້ວອອກຢູ່ບ້ານນາງ່າ
- ສຳລັບລົດທີ່ເດີນທາງມາແຕ່ໂພນໂຮງ ເປັນຕົ້ນລົດບັນທຸກໜັກ, ລົດເມໃຫຍ່ ໄປເວັ້ນຢູ່ສະຖານີທາງດ່ວນບ້ານບົວ ແລ້ວອອກຢູ່ສະຖານີທາງດ່ວນນາຊອນ, ຖ້າເປັນລົດຕໍ່າກວ່າ 10 ໂຕນ ແມ່ນເວັ້ນຢູ່ບ້ານນາງ່າ ແລ້ວອອກຢູ່ບ້ານຫ້ວຍນ້ຳເຢັນ
ດັ່ງນັ້ນຈຶ່ງຂໍໃຫ້ຜູ້ໃຊ້ຍານພາຫະນະຜ່ານຂົວດັ່ງກ່າວໃຫ້ຄວາມຮ່ວມມື ແລະ ປະຕິບັດຕາມປ້າຍສັນຍານຈາລະຈອນ ແລະ ການແນະນຳຂອງເຈົ້າໜ້າທີ່ ທີ່ປະຈຳການຢູ່ແຕ່ລະຈຸດ.
