ລົງມືຈູດໂຮງຮຽນ ຍ້ອນແຄ້ນໃຫ້ອາຈານເຄີຍຢຶດຢາສູບໄຟຟ້າ ແລະ ຖືກສຶກສາອົບຮົມຫລາຍຄັ້ງ

ເຈົ້າໜ້າທີ່ ປກສ ນະຄອນໄກສອນ ແຂວງສະຫວັນນະເຂດ ລາຍງານໃຫ້ຮູ້ວ່າ: ວັນທີ 14 ທັນວາ 2022 ເວລາ 24:00 ໂມງ ເກີດມີໄຟໄໝ້ໂຮງຮຽນມັດ ມຕ ເລກ 3 ຢູ່ບ້ານ ທ່າເມືອງ ນະຄອນໄກສອນ  ເສຍຫາຍທັງໝົດ ມູນຄ່າ 786 ລ້ານກວ່າກີບ ຜ່ານການກວດກາຂອງເຈົ້າໜ້າທີ່ຮູ້ໄດ້ວ່າ: ເກີດຈາກຄົນຈູດ ເພາະມີຮ່ອງຮອຍງັດແງະ ຈາກນັ້ນໄດ້ກຳນົດເປົ້າໝາຍ.

ມາຮອດວັນທີ 20 ທັນວາ 2022 ເຈົ້າໜ້າທີ່ສາມາດກັກຕົວຜູ້ກໍ່ເຫດໄດ້ 3 ຄົນຄື: ທ້າວ ສາຍຄຳ ຫລື ໄກ່ ບ້ານທ່າເມືອງ, ທ້າວ ບີ້ ບ້ານດົງດຳດວນ ແລະ ທ້າວ ຫຳນ້ອຍ ຫຼື ເປີ້ນ ບ້ານໂນນສະຫວາດ ນະຄອນໄກສອນ.

ຜ່ານການສືບສວນພວກກ່ຽວສາລະພາບວ່າ: ໄດ້ພາກັນປີນຂຶ້ນກຳແພງຮົ້ວແລ້ວງັດໜ່ວຍກະແຈເຂົ້າຫ້ອງການ, ຈາກນັ້ນ, ພາຍຫຼັງເຂົ້າໄປໄດ້ແລ້ວກໍ່ພາກັນຊອກຫາຢາສູບໄຟຟ້າທີ່ອາຈານຢຶດໄວ້ຂອງນັກຮຽນໃນຄັ້ງຜ່ານມາ ພົບເຫັນຈຳນວນ 11 ອັນ, ຫລັງຈາກເອົາແລ້ວຈັບເອົາເຈວລ້າງມືແລ້ວຍ່າງເຂົ້າໄປຫ້ອງຮອງອຳນວຍການ ແລ້ວຖອກໃສ່ໂຕະເອົາກັບໄຟຈູດແລ້ວເອົາຕົວຫຼົບໜີ.

ເຊິ່ງ ແຮງຈູງໃຈຍ້ອນທ້າວ ສາຍຄຳ ຫຼື ໄກ່ ເຄີຍເປັນນັກຮຽນຢູ່ໂຮງຮຽນດັ່ງກ່າວໄດ້ຖືກຄູ-ອາຈານເອີ້ນຂຶ້ນຫ້ອງການ ແລະ ພ້ອມທັງສຶກສາອົບຮົມຫຼາຍຄັ້ງຍ້ອນຜູ້ກ່ຽວເຮັດຜິດລະບຽບຂອງໂຮງຮຽນ ແລະ ຕິດຢາເສບຕິດ