ເດັກນ້ອຍ ປະເທດອຸດສະເບກິດສະຖານ ເສຍຊີວິດຢ່າງໜ້ອຍ 18 ຄົນ ຫລັງ ກິນຢານ້ຳແກ້ໄອ

ສຳນັກຂ່າວຕ່າງປະເທດລາຍງານວ່າ: ວັນທີ 30 ທັນວາ 2022 ທີ່ຜ່ານມາ ທາງການອິນເດຍສັ່ງລະງັບການຜະລິດຂອງບໍລິສັດ ມາຣຽນ ໄບໂອເທັກ ບໍລິສັດຢາຍັກໃຫຍ່ອັນດັບສອງຂອງປະເທດ ແລະ ເລັ່ງສອບສວນຢາດັ່ງກ່າວ ພາຍຫລັງກະຊວງສາທາລະນະສຸກ ອຸດສະເບກິດສະຖານ ຖະແຫລງວ່າມີເດັກນ້ອຍຢ່າງໜ້ອຍ 18 ຄົນ ເສຍຊີວິດຫລັງກິນຢາ  ດ໋ອກ 1 ແມັກ (Dok-1 Max).

ຈາກການສອບສວນເບື້ອງຕົ້ນ ໃນຫ້ອງປະຕິບັດ ພົບວ່າຢານ້ຳແກ້ໄອ ຊຸດໜຶ່ງມີ່ການປົນເປື້ອນ ເອທິລິນໄກຄໍ ທີ່ນິຍົມໃຊ້ເປັນສານປ້ອງກັນນ້ຳແຂງຕົວ ແລະ ສານຫລໍ່ເຢັນ ນອກຈາກນີ້ຍັງເປັນການກິນໂດຍບໍ່ມີໃບສັ່ງຈາກແພດ ແລະ ຢາທີ່ກິນເຂົ້າໄປມີປະລິມານຫລາຍກວ່າປົກກະຕິສຳລັບເດັກນ້ອຍ.