ນະຄອນປາກເຊ ເຂັ້ມງວດຕິດຕາມກວດກາອາຍຸສິນຄ້າ, ການຄຸ້ມຄອງລາຄາສິນຄ້າ ແລະ ການຕິດລາຄາເປັນການຕາຕ່າງປະເທດ
ວັນທີ 28 ທັນວາ 2022 ນີ້ເຈົ້າໜ້າທີ່ກວດກາການຄ້າ ພະແນກອຸດສາຫະກໍາ ແລະ ການຄ້າ ແຂວງຈໍາປາສັກ ລົງເຄື່ອນໄຫວຕິດຕາມກວດກາການໝົດອາຍຸຂອງສິນຄ້າ ແລະ ຄຸ້ມຄອງລາຄາສິນຄ້າຢູ່ຕະຫຼາດໃໝ່ປາກເຊ ແລະ ບັນດາຮ້ານຂາຍສິນຄ້າຈໍານວນໜຶ່ງໃນເທສະບານນະຄອນປາກເຊ ທັງນີ້ກໍເພື່ອແນໃສ່ໃຫ້ຜູ້ຄ້າຂາຍສິນຄ້າປະເພດບໍລິໂພກທີ່ມີຜົນກະທົບໄວຕໍ່ຊີວິດການເປັນຢູ່ຂອງພໍ່ແມ່ປະຊາຊົນ ໄດ້ຂາຍສິນຄ້າຕາມລາຄາທີ່ທາງເຈົ້າໜ້າທີ່ພາກລັດກໍານົດໄວ້ ເປັນຕົ້ນ: ຊີ້ນໝູ, ຊີ້ນງົວ, ເຂົ້າສານ, ປານິນ, ໄກ່ປອກ, ໄຂ່ໄກ່, ພືດຜັກ. ພ້ອມນີ້ທາງເຈົ້າໜ້າທີ່ກໍແນະນໍາໃຫ້ຜູ້ຂາຍສິນຄ້າຕ້ອງໄດ້ຕິດລາຄາສິນຄ້າເພື່ອວາງຈໍາໜ່າຍ ແລະ ຮັບປະກັນສິນຄ້າທີ່ນໍາມາວາງຂາຍຕ້ອງບໍ່ທັນໝົດອາຍຸການນໍາໃຊ້ (ສິນຄ້າໝົດອາຍຸຫາມນໍາມາວາງຂາຍເດັດຂາດ) ແລະ ຫາມສວາຍໂອກາດຂຶ້ນລາຄາສິນຄ້າຕາມລໍາພັງໃຈໃນໄລຍະການສະເຫຼີມສະຫຼອງສົ່ງທ້າຍປີເກົ່າຕ້ອນຮັບປີໃໝ່, ພ້ອມນີ້ເຈົ້າໜ້າທີ່ການຄ້າກໍຮຽກຮ້ອງໃຫ້ຜູ້ທີ່ຊື້ສິນຄ້າຈົ່ງໄດ້ເອົາໃຈໃສ່ອ່ານເບິ່ງການກໍານົດເວລາໝົດອາຍຸຂອງສິນຄ້າທຸກປະເພດ ທຸກໆຄັ້ງກ່ອນຊື້ສິນຄ້າ.
ໃນໂອກາດລົງເຄື່ອນໄຫວຂອງເຈົ້າໜ້າທີ່ຄັ້ງນີ້ເຫັນວ່າລາຄາສິນຄ້າສ່ວນຫຼາຍແມ່ນຂາຍຕາມ ລາຄາທີ່ພາກລັດກໍານົດໄວ້ ແລະ ມີພຽງບາງປະເພດສິນຄ້າທີ່ມີລາຄາເໜັງຕີງເລັກນ້ອຍ ເປັນຕົ້ນ: ເຂົ້າສານ, ປານິນ, ໄຂ່ໄກ່ຊຶ່ງທາງເຈົ້າໜ້າທີ່ຈະຕ້ອງໄດ້ມີການແກ້ໄຂດັດປັບໃຫ້ລາຄາເໝາະສົມ.
ສໍາລັບການກໍານົດໂຄງສ້າງລາຄາ ຊື້-ຂາຍ ຊີ້ນໝູຢູ່ແຂວງຈໍາປາສັກ ສະບັບເລກທີ 93/ພອຄ. ຈສ, ລົງວັນທີ 23/3/2022 (ສະບັບປັບປຸງໃໝ່), ແມ່ນໄດ້ກໍານົດລາຄາ ຊື້-ຂາຍ ທີ່ເໝາະສົມ ຄື: ໃຫ້ຜູ້ປະກອບການຟາມໝູ, ຜູ້ປະກອບການໂຮງງານຂ້າສັດ ແລະ ຜູ້ປະກອບການຊື້ສັດ-ຂາຍຊີ້ນ ທົ່ວແຂວງຈໍາປາສັກ ປະຕິບັດ ເປັນເອກະພາບ: ໂດຍການຊື້-ຂາຍ ຊີ້ນໝູຂອດໜ້າຟາມ: ກໍານົດລາຄາ ຊື້-ຂາຍ ຊີ້ນໝູເປັນຢູ່ໜ້າຟາມ ສູງສຸດບໍ່ໃຫ້ເກີນ 35.200 ກີບ/ກິໂລ, ກໍານົດລາຄາຊື້-ຂາຍ ຊີ້ນໝູຢູ່ຂອດຊໍາແຫຼະ ສູງສຸດບໍ່ໃຫ້ເກີນ 42.000 ກີບ/ກິໂລ, ການຊື້-ຂາຍ ຊີ້ນໝູຂອດຢູ່ຕະຫຼາດທົ່ວໄປ (ຂອດລູກຂຽງ) ສູງສຸດບໍ່ໃຫ້ເກີນ 47.000 ກີບ/ກິໂລ ແລະ ການຊື້-ຂາຍຊີ້ນໝູ ຂາຍເຖິງຜູ້ບໍລິໂພກທົ່ວໄປ (ແຍກຊິ້ນສ່ວນຂາຍ) ແມ່ນມີຫຼາຍລາຄາອີງຕາມປະເພດຊີ້ນ ເປັນຕົ້ນ: ຊີ້ນໝູປະເພດ 1 ສູງສຸດບໍ່ໃຫ້ເກີນ 60.000 ກີບ/ກິໂລ, ຊີ້ນປະເພດ2 ສູງສຸດບໍ່ໃຫ້ເກີນ 55.000 ກີບ/ກິໂລ, ໂຄງກະດູກຂ້າງ 50.000 ກີບ/ກິໂລ.
ໂອກາດນີ້ເຈົ້າໜ້າທີ່ການຄ້າກໍໄດ້ຕິດຕາມກວດກາຮ້ານຂາຍຍົກ-ຂາຍຍ່ອຍ ທີ່ຈໍາໜ່າຍຜະລິດຕະພັນສິນສິນຄ້າໃນ
ຫາກພົບເຫັນສິນຄ້າທີ່ນໍາມາວາງຂາຍບໍ່ຖືກຕ້ອງ ເປັນຕົ້ນ: ສິນຄ້າໝົດອາຍຸ, ຂາຍສິນຄ້າໃນລາຄາແພງບໍ່ຖືກຕ້ອງກັບເຈົ້າໜ້າທີ່ພາກລັດກໍານົດ ແລະ ອື່ນໆທີ່ຜິດກັບລະບຽບ, ກົດໝາຍ ທ່ານສາມາດໂທແຈ້ງສາຍດ່ວນປົກປ້ອງຜູ້ຊົມໃຊ້ 1510 ເພື່ອໃຫ້ເຈົ້າໜ້າທທີ່ກວດກາການຄ້າໄດ້ແກ້ໄຂທັນການ.
ຂ່າວ: ໜັງສືພິມຈຳປາໃໝ່
